自殺以後，進入了RPG的世界: 怪物

「勇者……？」白雪呆左咁望住我。
「無錯，當日果隻蟲就係我。」

我係魔王，同時亦都係勇者。
係矛盾既存在，大概本來係因為天照想玩鳩我所以先變成咁。

然後，我應該點做？
殺哂佢地？

就算三個人一齊上，佢地都係無可能打得贏我。




對我黎講，殺哂佢地都只不過好似係郁一郁隻手指咁。
輕而易舉。
一切都只係睇我既心情姐。

愛麗斯不顧一切咁衝左過黎。
STATUS上差太遠。

「聖光球LV3」
三個光球同時向我攻擊。
避都懶得避。




反正對我黎講都係R痕。

然後，用手捉住佢。
以我依家既STATUS，只要用力少少，就可以捏爆佢個頭。

「停手。」
排骨求我。
本來我都幾同情排骨呢個人，但係任何阻住我既人都要死。

等等！




話說我變左壞人？
咦咦咦？
點解搞到我好似係衰人咁既？
大佬，明明係……佢地無啦啦打過黎先……唔係喎，好似係我做左D衰野先。
唔係囉，次次都係佢地郁手先，我自衛還擊姐！
好明顯唔係我既錯囉！
大佬呀，你地次次都黎追殺我，我係為左自衛先至殺番你地D人囉！
我有咩錯？

「求下你，停手。」
排骨跪左係地，求我。
喂！你係咪男人黎架！
男兒膝下有黃金呀！
你為左咁樣既一個BITCH，跪係地上面求我？
毒撚真係毒撚，無撚得救。





反而，白雪衝左過黎。
咩都唔理，有勇無謀咁拎住把劍，想走過黎斬開我兩碌。
蜘蛛結界。
地上面既蜘蛛絲即時包起左佢。

「當我求下你啦，停手啦……就算唔係為左Alice，為左你自己，停手啦。」排骨講。
痴左線？
「你已經變成左一隻怪物啦，你已經唔再係人黎啦，收手啦，當係為左自己，為左自己既人性……」
「人性？人性係咩黎？以前既世界有人性呢樣野咩？有既話，就唔會逼到D學生跳樓啦。」我講。
「跳樓？」排骨望住我。

「你係咪想我收手？」我問。
「係呀！」
「OK。」我笑住講。





然後，用力捏爆左Alice個頭。
死左。

「呀呀呀！」白雪癲撚左咁衝埋過黎。
暗影長槍。
刺穿左佢既身體。

[獲得技能點數]

排骨咩都無講，仍然跪左係地無郁。
由於佢係骷髏族，成塊臉都只係得骨，所以我睇唔到佢呢一刻既表情。

係呀，我收左手啦。
我殺左白雪、Alice，偏偏留番排骨一條命。





火龍妹無表情咁望住我。
係呢個局外人眼中我係個點樣既人呢？
壞人？殺人狂？
我呀，點講都好，都只係一個魔王黎姐。

「係邊個！」我大嗌。
有人係出面望住呢一幕。
然後，有個人行左過黎。

「我係邊個？我係呢個世界上面最靚既人……不過似乎咁講實在有少少破壞氣氛。」

天照。
女神一步一步咁行左過黎。
想點？




女神事到如今又再出現究竟係想點？