自殺以後，進入了RPG的世界: #白兔與白雪

離開左中立地區，我同白兔一齊前往暴風龍巢穴。
一路上白兔係到諗緊野咁，一句說話都無講過。

暴風龍巢穴好似就係風龍王既巢穴。
好似係我以前果條村果到，搭船好快就去到。

我等級升到LV30，除左STATUS上升就好快之外，技能無增加過。
應該比以前勁左。

但係，望住白兔，無論點我都覺得佢好奇怪。




佢一直思考既女神既事？
一路以黎，女神只係個宗教信仰，大概無乜人真係知道女神既存在。
應該無人估到女神係一個咁鮮明既形象，同人無異。
然後，外星人既事又點睇呢？

既然呢個世界有神，自然有另一個世界既神。
大概係因為咁，所以佢地稱之為外神。
呢班外神既目的係為左毀滅世界？
然後，蝴蝶女王既目的係咩呢？整到火龍王發癲，去毀滅世界？
幫外神？點解要咁做呢？





雖然，呢D野我諗黎都無用，我亦都唔想去理。
對我黎講，呢個世界毀滅都無乜所謂。
我又唔係呢個世界既人。

行入森林既時候，有一個人擋住左我地既前路。
查唔到STATUS？
一個著住黑色盔甲既人！
拎住把劍，擋係我地面前。
STATUS全部都係黑色，連佢叫咩名、有幾多血都查唔到。




只可以睇到佢既稱號－－

【黑騎士】

白兔抆劍指住佢，問:「你係咩人？」
黑騎士:「我係邊個唔重要。重要既係你唔可以再行前一步。」
「咩意思？」
「我唔會比你地見風龍王。」
「你係外神既人？」

黑騎士無再回答，然後白兔咩都無講，直接衝上去斬佢。
完全查唔到佢數值，就連佢LV都查唔到。

黑騎士用劍還擊。
點講好呢，睇住佢地既交鋒，點解會有種奇怪既感覺呢？




應該話，兩人既劍法好相似。

兩人過左十幾個回合之後，分開。

白兔:「呢種劍法……你係白雪？」
黑騎士:「……」
「你係咪白雪呀！究竟發生左咩事？同不死族領主打完之後發生左咩事！點解你會變成咁！」
「我唔係白雪。」
「明明就係！呢種劍法，一定係白雪！白雪，同我講，發生左咩事！不死族領主對你做過D咩！」

黑騎士無再講野，再衝過去攻擊。

「白雪！你唔好唔記得你從來一次都無打贏過我！」

白兔手上既劍比黑騎士撞開左，跌到去我腳邊。





「所以話，我唔係白雪。」

「皇家守護」我高舉聖杖，然後出現左兩個LV30既黃金盔甲保護白兔。
「冰封暴雪」黑騎士舉劍，然後出現左暴風雪，封住哂兩個黃金盔甲。

「火焰斬擊」白兔撲左上去，用技能攻擊。
「水球術」黑騎士隻手出現左個水球，將白兔擊開。

呢個人真係白雪？
完美咁壓制住我同白兔。
恐怕，呢個人既實力係不死領主之上。

「收手啦，我唔想殺你。」黑騎士講。





「你明明就係白雪，呢幾招係白雪成日用既技能！」白兔講。

「都話，我唔係白雪！」

「我唔信！」

「咁好啦，比你見識下白雪無既技能啦。」

突然之間，風雲色變。

「大海嘯」

大海嘯？呢到係內陸地區黎架喎……
真係有D咁既技能？
一個人可以操縱海嘯？你係海神咩？





「魔法反制，你傻左咩，黑騎士！」
突然間，出現左一把聲，阻止左大海嘯。

「SORRY，太激動姐。」黑騎士講。

然後，我同白兔比人強行轉移左去第二到。