自殺以後，進入了RPG的世界: 哎呀，等我變身先！

隻怪又再衝過黎斬我。
螳螂捕蟬‧黃雀在後。
好麻煩既對手，論速度，佢甚至係我之上。
我除左防禦同埋魔力之外，無一樣野比得上佢。
姐係話，我打得贏佢既身段，淨係可以依靠蜘蛛毒牙同埋暗影長槍。

用幻像魔法干擾佢先。
等佢誤判我既位置。
唔，但係咁都無乜太大用途，始終都做唔成任何既實際傷害。
不過，用黎避開既話，呢招非常之好用。





咦？咁既？
幻像魔法無用？
點會咁？發生左咩事？魔法反制？
唔係，唔係咁，唔係任何既技能令到我用唔到魔法反制。
姐係話，呢隻怪用緊外掛。
可惡，外掛真係黑人憎。

不過，好彩既係，佢既外掛唔係好勁。
最多只可以阻擋精神攻擊既程度姐，又唔係免疫哂實體既傷害。




即使係咁，我都好難打得贏佢。

蜘蛛結界！
放左結界出黎綁住佢先。
然後，去到佢後面，用蜘蛛毒牙咬佢。
再退後幾步，暗影長槍！

打中左。
不過，對佢黎講唔係好痛。
佢張開雙翼，飛左上天。





哇……仲識飛……
飛左去邊，我既視線入面無左佢既身影。
係邊呢？
哇！
羽毛好似針咁射落黎呀！
走開呀，避唔到呀！
我一定比D羽毛插到變成箭豬。

當我甩開D羽毛既時候，佢貼地低飛，螳螂張開雙臂，衝過黎斬我。
邊有咁易呀！
暗影長槍！

神奇既事情發生左。
黃雀同螳螂分左體。




吓？
咁都得？
佢地分體避開左？
我既暗影長槍係佢中間穿過，然後成隻螳螂就跳左過黎斬我。

可惡……喝！
避開！
一個靚轉身避開！
好險……
我……
飛左上天？
咦？

我望住螳螂同黃雀，兩個都眼甘甘咁望住我飛左上天。
發生咩事？




莫非我學識左飛天既技能？
唔通我真係天才？
犀利……呀，我另轉頭一望，原來係有一隻蟲捉住左我飛上天。

吓？
咩事？
OH SHIT！
隻黃雀飛左起身，用佢個嘴啄我！
呀！好痛！咩事呀！隻衰蟲做乜無啦啦捉住我呀？
睇真D，果隻原來係蟬黎。

唔撚係掛！
咁都得？
唉屌！蜘蛛結界！





束縛哂全場，我即刻由空中跳左落黎。
好癲……

佢地三隻野包圍住我。
蟬、螳螂、黃雀。
唔得……實在係……

然後，佢地三個合體呀！！！
我諗番起以前睇個既戰隊特攝片。
呢三隻動物走埋一齊，合體！

螳螂突然之間食左隻蟬，然後黃雀食左螳螂。

黃雀係本體！
蟬分左對翼出黎，癡左落黃雀對翼下面！




螳螂分左鐮刀出黎，放左係黃雀既心口到！
最後！蟬既頭部由黃雀個口到彈左出黎，然後縛左落去黃雀果頭到！
完成！螳螂捕蟬‧黃雀在後 真正型態！

你一定諗緊點解我唔趁佢合體既時候打佢。
人地合緊體既話，我地係唔可以打佢！
呢個係國際慣例黎！係禮貌黎！係道德黎！

唔得啦，呢隻生物真係……
真係……
真係實在太有型啦啦啦！
頂你咩！早知果陣就唔揀蛛女，揀螳螂捕蟬‧黃雀在後啦！
可惡呀！
好後悔呀！
搞錯呀！

之後，我就比隻螳螂捕蟬‧黃雀在後毒打左一餐。