自殺以後，進入了RPG的世界: 黑騎士 II

單挑而得到勝利既話，呢件事上係絕對無可能。
但係，只限於「單挑」同埋「勝利」呢兩回事上。
黑騎士同排骨既戰鬥，當然唔會只係「單挑」啦。
當然，我所追求既並唔係勝利。

STATUS遮蔽，用技能就會比人發現身份睇落去根本就係廢。
但係，佢有個極大既好處。
你咩時候產生左黑騎士同排骨單挑緊既錯覺？

生命連動。




我將我既HP駁去黑騎士到，雖然每秒淨係傳送到1%HP，姐係200血，但係呢每秒200血已經好重要。
排骨無辦法確認黑騎士既STATUS，所以佢係無法得知任何既事情。
包括有人幫緊黑騎士回血。
包括佢既攻擊能唔能造成到有效既傷害。
包括自己究竟係處於優勢定劣勢。
查唔到STATUS既情況下，佢對戰況係一無所知。
習慣左有STATUS既情況下，呢個世界既人係唔會識得點樣可以係睇唔到STATUS既情況下戰鬥。

每秒200血，對於排骨既一連串攻擊黎講，呢二百血係無可能抵消到佢既傷害。
所以，我同黑騎士要做既野只有一樣。





拉布！

拖佢時間！等黑騎士回多D血！

「乜你去到呢個程度咋咩？睇黎其他領主勁過你好多喎。」
黑騎士一退後，我就係到9UP爭取時間回血。

排骨企係到，好似以為自己所以既攻擊都無效。
佢應該諗緊黑騎士究竟係咪免疫哂毒同暗影攻擊。




毒同暗影攻擊係排骨既攻擊手段，如果可以免疫哂，咁樣排骨就無可能贏。
當然啦，實際上，呢兩個攻擊手段都打到黑騎士無血。
不過，排骨睇黎唔信，似乎佢覺得無可能有人勁到同時免疫兩種傷害。

「暗影長槍」
暗影長槍係暗屬性攻擊入面既上位技能，我都有呢招技能，所以清楚明白呢點。
比佢打中會扣好多血。
當然，我係唔會比呢件事發生。
魔法反制。
反制佢既暗影長槍。

「嗚……」
排骨呆左一呆，完全唔知發生緊咩事，淨係見到自己既暗影長槍突然間消失左。
然後，黑騎士就走左上去斬佢。
喂！蠢材！你過去同佢打做乜？嫌自己既血太多？





排骨又拆開枝杖，用把幼劍反擊。
說好的咩劍聖繼承者啦？埋身戰居然係雙方唔用技能之下比佢壓制，對面好似仲要係法師黎。
法師用劍呢點本身已經唔合邏輯，玩劍仲要玩到咁鬼勁。
算啦，呢個世界本身已經係唔合邏輯架啦，之前第8層果到仲見到火箭炮同機槍添，佢唔變做O武士再抆光劍講我係你老豆已經好好。

又無乜血，黑騎士又退後拉布。
哇！使唔使咁狼呀！排骨居然唔比佢抖氣空間，直接衝上去斬黑騎士。
蜘蛛結界，我幫你幫到盡啦，黑騎士，自己執生啦。
仆佢個街，黑騎士戇居居咁企左係到，你究竟有無心玩架？

唔得啦。係時候出殺手鐧。

「我對你好失望，歐西里斯。再打落去都係無意思，我比個機會你。三招，三招內打低我既話，我就比你過去，如果唔係既話你就走啦。當然，我會企係到比你任打。」





三招，應該唔會一招秒殺黑騎士掛。
排骨係到猶豫緊，佢諗緊係咪陷阱。
岩啦，慢慢諗啦，咁樣先係架嘛，唔係既話黑騎士點樣回得切血？

「唔好咁睇小人，黑騎士，你會為後悔。」

排骨出招啦，第一招係暗影長槍。
好彩姐，雖然呢招高攻，但係實際上都只係打到1000幾血左右。
依家黑騎士有成3000血左右，無問題、無問題。
不過可憐既白雪有排挨。
硬食！得番2000血，無事，企係到，頂住，然後扮野！

「係咁咋？」我又去嘲諷佢。

第二招！




「靈魂收割」
[靈魂收割:對單體造成中型暗影傷害。若對方HP低於33%時，再造成一次小型暗影傷害，然後下一次自己造成的暗影傷害威力大幅度上升]
咩話？
等等？呢招？
呢招應該係對無乜血既敵人用，佢睇得穿黑騎士仲有幾多血？
唔係，應該係撞彩架姐……
計埋傷害同埋我拖放既回復之後，仲有1500血左右。

麻煩啦。
今次真係麻煩。
回快少少……
第三招黎啦。
佢換左個稱號，變成【黑魔術師】
今次大獲，係BUFF暗影魔法既稱號。
再加上之前靈魂收割既BUFF，有可能一下打到1500血出黎。




唔得啦，點算？
魔法反制佢？唔得，咁都係輸，姐係同佢講我認輸。

點算？
救佢？反制魔法？
但係咁樣咪……姐係話認輸？唔得。
不過，咁樣落去，白雪會死。
因為我既錯，白雪會死。
我諗起土元素。
有少少唔舒服。
會後悔？因為我害死白雪？
因為我既錯？
咁點解依家唔去救佢？
救佢好簡單架姐，用一用魔法反制就得。
救佢啦！救佢啦！
點解唔救佢呀？
點解呀？
我問你點解呀？
我想施法，但係……施唔到。我唔想施。

我呢，原來真係個人渣。

「暗影長槍」
BUFF哂既暗影長槍一次過貫穿左黑騎士既心口。
1500HP，岩岩好，HP歸零。
死左。
白雪死左，呢個係事實。
因為我，白雪死左。
我……

蜘蛛結界，束縛住白雪既屍體，唔比佢跌低。
然後，我大聲咁講:
「原來係咁，你只不過係去到呢個程度。」

排骨嘆左口氣，然後撤退。
係呀，贏左啦。
但係點解我完全無贏既感覺？
土元素……

等到排骨既軍隊走哂，我走左落去。
望住黑騎士。
HP:0/7183
係呀，零左啦。
係呀。
因為我……

「呼~」
白雪將黑騎士既頭盔除左落黎。
呀？
「好彩姐……好彩及時用左復活道具姐，如果唔係就玩完啦，真係好彩。呢舊靈魂石，HP歸零後，一般時間後回復少少HP又幾好用喎，不過就係貴D，算啦，都幾抵啦。咦？你做乜喊呀？」
「無……岩岩跑落黎流汗姐。」