自殺以後，進入了RPG的世界: SPIDER & DRAGON

「唔走啦咩，卑賤既蟲！」
火龍係我面前咆哮。

我笑一笑，然後望住佢。
單論實力黎講，我係絕對無勝算。
無論係邊個，一打一，即使係組隊一齊圍佢都好，都無可能有勝算。
但係，只限於正面戰鬥！

火龍張開口，大概係準備噴火。
呢個時候，無頭騎士衝左上去，用劍刺佢隻眼。




當然，係無用架啦，火龍一隻手掌就打走左隻無頭騎士。
呢個時候，我用蜘蛛鋼絲，封住佢隻眼。

束縛效果只係其次，我既目標係封住佢既視線，等佢打唔中我。
然後，黎啦！

土元素開始攻擊，一舊巨大既山岩飛左去條龍到。
當然，係無用架啦，山岩撞到粉碎，但係火龍一D事都無。

火龍又開始發癲，四圍噴火。




果然係咁。
頭先我放左蜘蛛鋼絲之後，一即係到退後。
土元素同無頭騎士係到攻擊佢，等佢以為我仲係果到同果兩隻野並肩作戰。

錯啦！
一早已經計劃好！
火龍黎到呢到之前，我一早已經破壞哂呢區山岩既結構，只要條龍發癲噴火……
就會好似依家咁，成個洞穴倒塌。
哇，都好大規模下。
倒塌左既洞穴將土元素、無頭騎士、火龍埋左係巨石下面。





倒塌落黎既山石超越左火龍本身既重量，令到佢郁唔到。
已經贏左。
比想像中簡單。
火龍的確係勁，但係實在太衝動。

我走左過去，條龍繼續係到鬧我，雖然佢走唔到出黎。
我揭起左一塊石頭，見到佢隻眼。

「快D放左我！」

就算你咁講，我只係一介蟲蟲，邊夠力放走你啊！

「蟲！你會為你既傲慢付出代價！」





無囉！邊有傲慢呀！我只係咁比你打，然後依家反擊姐，有錯咩？
蜘蛛毒牙，蠍尾射擊。
條龍發出慘叫，應該係好辛苦。
唔緊要，好快就會解脫架啦。
就算再強都好，依家既佢只可以任我魚肉。

玩完啦。
「你……究竟係咩人？」
唉屌，都話唔識講野咯。
「你……唔通真係唔係佢地？」
我搖一搖頭，唔知佢講乜。
「唔……咁……你最好走啦。離開呢個地下城。」
又點呀？
「第八層，絕對唔可以落去。」
做咩呀又？




你話唔落就唔落我咪好無面？
「不過……你最好唔好殺我，雖然你一定會殺我……」
廢話。
「如果可以既話，我希望你可以守護第7層。不過，以你既實力應該做唔到。」
點呀？
「我唔係唔想死，只不過我死左就無人守住第7層姐。算啦，大地班人應該會有對策……」
哂鳩氣，唔知做乜。

佢既血愈黎愈少。
火龍閉上眼睛，等待死亡既來臨。
完全唔知想點。
不過，第8層，一定有問題。
情報掌握！

[尤克特拉希爾地下城-第8層:虛空。]





咦？
得虛空兩個字？
咩事？

[擊殺龍種，獲得稱號【屠龍者】]
[【屠龍者】:和龍種戰鬥時，全STATUS上升]

[擊殺一定數量的魔物，獲得稱號【魔物殺手】]
[【魔物殺手】:和魔物戰鬥時，全STATUS上升]

上升？上升幾多又唔講，無理由會係一樣掛，【屠龍者】應該升得多D。
唔係，依家唔係處理稱號既時候，要搞清第8層先。

[等級上至60]





奇美拉蟲 LV60

HP:10642/10642
MP:10678/10678

力量:1075  敏捷:1109
防禦:1025  魔力:1075

哇！STATUS……升得好快……
因為殺左龍？

[可以選擇進化，請選擇一項]
>蛛女
>天蠍
>螳螂捕蟬‧黃雀在後

咦？無亂碼？
但係又出左奇怪野……
螳螂捕蟬‧黃雀在後 係乜鬼野黎？生物黎架？
不安……咁奇怪既，個生物名。
我打死都唔揀佢。

天蠍同蛛女，揀邊樣好？
諗番起第6層果隻突變型奇美拉蟲我就覺得不安。
應該兩個都唔會進化到咁既樣掛。
天蠍，感覺上都係蟲型既生物。
但係蛛女唔同！

蛛女……
蛛女應該係上半身係人，下半身係蜘蛛既生物！
咁我咪開始接近人形囉？
話唔定會變成蜘蛛精呢？
有個女字，點諗都會係人形生物……終於……終於都可以……
我揀硬蛛女！

你以為我會咁講咩？
好笑，我中左咁多次伏，點都唔會再中伏架啦！
蛛女喎，去到呢隻GAME一定係上半身係蜘蛛，下半身係人類既詭異怪物，我先唔會上當！
去到最盡，佢可能玩到雌性蜘蛛咁就算！
所以，我都係揀天蠍啦。

但係，人類(蟲類)係一種犯賤既生物。
明知山有虎，我都係要揀蛛女。
唔理啦，死就死啦！
蛛女！！！