自殺以後，進入了RPG的世界: 6.VS蛇

大蛇 LV15

HP:1488/1488
MP:1310/1310

力量:191  敏捷:175
防禦:130  魔力:134

同之前果堆怪物比，呢條蛇已經係好廢架啦。
不過，佢體型真係得人驚，身長起碼係我五倍。




我真係打得贏咩？

鬼靈殺戮者 LV10

HP:1501/1516
MP:1520/1520

力量:142  敏捷:162
防禦:131  魔力:141





最麻煩既係，我跟甩左果個男人。
可惡呀……
不過D怪開始愈黎愈低LV，姐係話我開始接近入口。

條蛇慢慢慢慢咁懶過黎，佢隻眼係到望住我。
蟲真係打得贏蛇？
一定有辦法既。

感動既係，終於見到有STATUS仲廢過既怪物。
希望唔會好似之前隻石像鬼咁有D咩煩膠技能啦。




希望啦。

突然之間，佢撲左過黎！
黎啦咩？受死啦！
蜘蛛鋼絲！
MISS！
避開左？
吓，有得避開架？

佢黎到我左邊啦！
唔理啦，再上啦，蜘蛛毒牙！
再一次避開？
條蛇真係好小心。
連續兩次避開左我既攻擊。
血同MP都比唔上我，但係力量同敏捷都係我之上。




佢應該係想我消耗哂MP，先至再攻擊。
點解一隻普通既怪物都有咁高智能架。
唔得，我要冷靜。
對面應該係戰鬥上面好有經……經你個頭呀，做乜無啦啦噴口水架仆街！
可惡……咦？我中左狀態？

[毒(10秒)]

佢識噴D毒出黎？
我中左毒？
好痛……
[毒狀態:每秒持續受到最大HP的0.5%傷害，每秒受到的傷害不多於500]

我既蜘蛛毒牙係賦予猛毒狀態，係1%，不過一定要埋到身先用到，唔似得佢果招咁方便。
唔得，我要反擊先得！




我走上去，點知佢係咁退後。
衰人呀，咪走呀你！
我唔夠佢快，佢係咁走。
頂……
第一次見到咁龜打既對手。
痴線架咩，邊有人咁打架！

佢又張開嘴，又想放毒？無咁易！
我即刻跑開，避開左佢D毒。
佢出技有時間，由張開嘴再噴毒大約係一秒時間。
短短一秒已經夠……啦。
我比佢一條尾車過黎。

呀，得番1000血到。
佢無扣到血。




好強。
呢個就係經驗差距？
不過，講到經驗，我多過你多多聲呀！
想當年我打緊機果陣，你都唔知出左世未呀！

佢突然之間轉守為攻，撲過黎。
因為血少左三分一就鬆懈左？
太天真啦！
蠢材！
呀。
好險。
斷左一隻腳，扣左少少血。
比想像中快。
不過，唔緊要。
佢淨係咬到我一隻腳，我即刻轉身射過三分波，蜘蛛鋼絲！




中左啦！
好野！
得5秒，不過5秒已經夠啦！
上啦，螳螂之鐮！
我一刀斬中佢個身體，一口氣扣左成400血。
比想像中高攻。

條蛇開始識驚，諗住轉身走人，不過我點會比你走呀！
蜘蛛鋼絲……咦？
我出技都有時間，佢撲左過黎。
哇！
佢咬中我，我中左毒。

[猛毒(5秒)]
[猛毒:每秒持續受到最大HP的1%傷害，每秒受到的傷害不多於1000]

同我果招毒牙一樣既猛毒，不過時間無咁長，但係佢咬落黎果下都扣左唔少血下。
好痛……好暈。
呢個世界都係會痛……
唔惦，血愈黎愈少。

不過，你已經中計啦！
蜘蛛鋼絲，當佢攻過黎時候，我開左呢招技。
呢招技最神奇既地方係，唔理我打中佢邊個位，佢都會成身郁唔到。
雖然我已經殘血，但係已經夠啦。
大隻生物既弱點都係果到，背脊。
正如有人迷戀鎖骨，我都係對背脊情有獨終。
不過人地係拎黎J，我係拎黎咬。
蜘蛛毒牙！
反擊啦！
束縛狀態過左，但係背脊係佢死角。
螳螂之鐮！

嗄……
就係咁，佢完全無還手之力下比我殺左。
意外既係，1LV都無升到。
唔係下話，打到爆哂血，都無LV升？
血就得番500幾，再有隻怪走過黎我就係咁先。
唔……肚餓，蛇應該都唔難食掛。
我咬……
似雞肉。
但係血淋淋真係好難食。
是但啦。

醫飽個肚會回血，唔知咩設定黎。
不過，真係食到我想嘔。
真係，真係再無下次啦。