自殺以後，進入了RPG的世界: 5.狗

一直以黎，我都好憎其他人既目光。
我受夠啦。
點解要望住我？
你地究竟係可憐我？定係嘲笑緊我？
我受夠啦。
點解？黎到呢到之後，連怪物都要用呢種目光望住我？

我受夠啦。
空間魔法。
我逃避左，逃走左。




話雖如此，依家既我仲係條龍既巢穴入面。
我無諗過要離開巢穴，亦都唔想咁做。
大概，果條龍都唔會追上黎。
是但啦。

鬼靈殺戮者 LV10

HP:1501/1516
MP:1520/1520





力量:142  敏捷:162
防禦:131  魔力:141
[飢餓]

呢個係我既新status。
確定既係，進化會回復都滿血。
不過最ON9既係，係唔會解除肚餓狀態。
搞錯呀。
而且，呢個肚餓狀態係會令我持續扣血。
頂！




HP:1486/1516

扣得咁快？
[進左飢餓狀態5分鐘後，每十秒將會減少1%HP]

使唔使咁呀？
HP:1471/1516

麻煩啦。
方圓十里有無咩獵物呢？
無。
……
痴線架。
不過就算有，都無用啦，我咁既LV，打得贏咩？
早知帶多幾條狼屍體先轉移啦。




血又扣左。
但係我仲未搵到獵物。

冷靜D。深呼吸。慢慢黎。
希望在明天吖嘛。
森林點樣先可以求生呢？

正當我煩緊野食既時候，天色已經開始昏暗。
唔……原來先過左一日。
應該話係一日都無。
我黎到呢個世界好似真係一日都無，但係已經發生左咁多事。
成為魔王、成為勇者、比隻雀仔屌打、比條龍嚇餐死。
不過，呢到都唔係地球，話唔定一日唔係廿四個鐘呢。
紅色既月亮今晚會唔會出現呢？
我會唔會番去地球呢？




或者呢到，只不過係我場夢。
好似係咩蝶夢莊周，不過依家就係廢青夢蟲，差唔多啦。

不過，我可以好肯定，呢到唔係一場夢。
死啦！好肚餓呀！
無力啦！
我仲係到思乜鬼野考人生呀？
HP愈黎愈少啦！
我係咁跑黎跑去，都搵唔到食物。
唔係就咁餓死下話？
點解唔到方圓十里都無生物架？
生物就有既，不過係樹囉，我諗都醫唔到肚。
不過，前面好似有舊石……
係遺跡？





巢穴入面有遺跡？
應該係咁。
講到遺跡就一定有生物，不過就一定好好打。
大概就係去到一拳秒殺我既程度啦。
呢個巢穴真係恐怖。
早知就唔留係到啦……
不過外面仲恐怖呀，好似係。
所以幾時都話，屋企先係最偉大既地方，出街太危險啦。
廢青有理！廢青萬歲！
講開而講，大約得番七成血左右。
SHIT！
點呀？
入去？
呀！





見到有隻石像鬼(好似係)，淨係知佢好勁啦。

【看門人】石像鬼 LV 62

HP:7035
MP:6288

力量:741  敏捷:721
防禦:1000  魔力:268

渣GA，仲廢過D龍。
走佬算。
雖然同隻雀仔差唔多LV，但係好明顯勁過隻雀好多。

我諗佢都唔會無啦啦打隻蟲姐……拿拿咪呀你……咪呀頂你……死開啦……SORRY囉……
唔好追住黎啦！
點解要打我喎？
點解要咁對我呀？

戰鬥？逃走？
點會打得贏呀師父！
佢仲有對翼，曉飛添。
公平咩？

可惡呀！點解次次都要見到呢D咁勁既怪物架？
唔好咁啦。

可惡呀！走又唔夠佢快！
蜘蛛鋼絲！
打中左，佢停左響到。
得5秒時間做到D咩？
答:扣0.5%HP(飢餓狀態)
前後受敵。

得900幾血既我，真係有勝算？
突然之間，佢噴火！
呀！搞錯呀！
點解束縛狀態都可以攻擊架？
遠攻咁勁既？
我又無左600幾血。
得番300，YEAH！

下一擊就會秒殺我！
162既敏捷幫唔幫到我？
冷靜D諗方法。
睇黎蜘蛛鋼絲都係無撚用架啦，我得番兩招可以用。
普通物攻既螳螂之鐮、毒傷害既蜘蛛毒牙。
趁佢仲比蜘蛛綱絲困住，我跑到去佢後面。
後面係死角，噴唔到火！
上啦！螳螂之鐮！
比我睇下新招既力量啦！
一刀斬過去，扣左20幾血。
……
點會咁架？LV差咁遠既？
[石像鬼擁用被動技能:礦物體質:物理傷害減半、毒屬性傷害無效、腐蝕傷害變成兩倍
而稱號【看門人】可以使其在範圍內戰鬥受到的傷害減少]

好麻煩！
不概係大型副本！
換言之，我所有既攻擊都係無用。
佢解開束縛，成條尾車過黎。
我一口氣跳上佢背脊。
唔得啦，我所有攻擊都無用。
係相性最差既對手。
就算佢殺我唔到，我都會餓死。
得二百零血既我，究竟做到D咩？
咩都做唔到。
呢個世界同果個世界一樣，都係咁絕望架啦。
唉。

咦？
有條友衝過黎斬隻石像鬼。

【劍聖】人類-烏瑟 戰士 LV99

HP:8208/10116
MP:5034/8254

力量:910  敏捷:763
防禦:1160  魔力:1256


佢仲未死？不過得番佢一個人？同其他同伴失散左？
果一劍斬到成200幾血。
咁高防都斬到二百幾？
呢個男人睇黎都幾勁。
STATUS上，男人勁過石像鬼。
石像鬼噴火，男人立刻避開。
反應好快！
男人跳上佢背脊到，用劍斬佢。
全程無用過MP，單純用普通攻擊斬到佢重傷。
大概係唔想浪費MP掛。
真係好勁。
一招都無用過，單統用物理攻擊打到佢重傷。

背脊睇黎真係弱點。
男人都幾重下，石像鬼飛唔到起身，而且背脊亦都係佢死角。
勝負已分。
犀利。

男人最後一刀桶落佢個頭到，暴擊添。
石像鬼咁就死左。
呢個就係人類最強既實力。
自言自語？
講緊咩？
[他在說自己將石像鬼看錯成蝙蝠，浪費了體力]
唔……其實有無得學識佢地既語言？
[需要獲得被動技能:智慧]
……吓？
家陣我好蠢咩？
我無智慧？
你係咪串緊我？
系統AI都串過人，垃圾GAME真係垃圾GAME。
算。

咁點攞？
[怪物無法增加被動技能]
是但啦。預左。
咦，係喎。
個男人啤住我。
……
死……死開啦！仆街！
佢又講左咩呀？
[他說為什麼會有低LV怪物出現在巢穴深處]
……
姐係，唔會殺我？
佢笑左，然後DOM左舊野過黎。
係肉呀！
好滾動呀！原來係大好人！
嗟來之食，我係乞衣咩？我係狗咩？
算！我忍你！
我心情好，唔同你計較，我食囉！

咦，係喎。
佢話點解有低LV怪出現係到，姐係呢個巢穴係有低LV怪，姐係話入口果到有低LV怪？
跟住佢既話……會唔會去到入口？
唔理啦！
咩話？你話我似隻流浪狗，DOM舊肉比佢就跟住走？
我話你都痴線既，我會趁機殺左佢，一野升到爆LV。