自殺以後，進入了RPG的世界: #轉生

宗教之國外嘅廣場。
教皇企喺我身後，一句話都無講。
依靠住我呢位惡魔嘅力量，對抗異境之神。

嚟到我面前嘅，係梁同學。
應該叫你做阿撒托斯。
蜘蛛女王嘅臉孔，就好似講緊佢打從根本就唔係呢個世界嘅生物。
佢已經唔再係以前嘅佢，同樣我已經唔係以前嘅我。
所以，當我聽到阿撒托斯身後嘅蠍子女王嘅輕輕一句「Alice」，反而令我唔自在。





我已經唔再係Alice，唔係愛麗斯。
如今嘅我，係地獄大公爵，阿斯塔錄。
佢代表住RPG世界。
我就代表住惡魔。
而戰鬥嘅舞台只係碰巧喺地球，僅此如此。

我同佢之間嘅恩怨已經毫無所謂。
依家諗返轉頭，前世嘅恩怨情仇，到底有咩意義？
我哋，都已經轉生咗。
就算係阿撒托斯，佢都死過返生，展開咗一段新嘅生命。





因此，我無法理解班長嘅諗法。
明明我哋三個人入面，佢生存嘅時間係最長。
佢經歷咗幾段嘅人生，數千年嘅時間，居然只係諗住復仇。
無論身為龍王嘅佢，抑或係班長嘅佢，到頭嚟都只係白雪嘅延續。

我係咁諗，轉生嘅意義在於，帶有過往嘅經驗，再由零開始展開一段新嘅人生。
新嘅人生。
而唔係繼續返以前嘅人生，做返以前嘅事。





我同愛麗斯同Alice，已經係三個唔同嘅個體。
只係擁有一樣嘅記憶，一樣嘅靈魂，但已經係唔同嘅存在。
身為阿斯塔錄嘅我，無必要為Alice同愛麗斯復仇。
但溫蒂妮、班長、白雪，名義上嘅三個人，終究只係同一個人。
佢無變過，拒絕緊成長。

阿撒托斯走咗上前。
最終嘅決戰。
殺咗佢，我就搶到RPG世界嘅權限。
佢殺我，佢就保護到佢嘅世界。

二對二？
當然阿撒托斯由我嚟對付。
蠍子女王，佢最後都選擇咗阿撒托斯嗰邊？
我叫身後嘅路西弗格出嚟。




論戰力，路西弗格應該喺蠍子女王之上，畢竟係我摩下嘅六柱惡魔之首，地獄嘅宰相。
但問題係阿撒托斯。
眾所週知，阿撒托斯係噩夢般嘅存在。
戰無不勝，至高嘅惡神。
單憑我，真係未必贏得到佢。

佢擅長用魔眼、蜘蛛絲攻擊。
要搶先喺佢攻擊前用魔法轟炸？
但如果佢用空間魔法嘅話，我就要小心背後。
佢嘅殺著係，瞬間轉移到我後面，用蜘蛛絲絞殺我。

佢出手了。
一腳踏出嚟。
我冷汗冒起，慎重的觀察著佢嘅態勢。





只見——
「我投降。」

佢淡然咁講咗出呢句說話，打破咗我嘅佈局。

「停戰啦，我無必要同你哋打。」

無法理解，佢唔係應該要殺我架咩？
的確，為咗星球生物嘅多樣性，引入惡魔嘅血脈係一件更為有利嘅事。
但阿撒托斯呢位外道之神，根本就唔care呢啲事。
我同佢係敵人，僅此。
佢唔鐘意惡魔，就將我哋殺哂，理應如此。
但呢一刻，佢無咁做。

佢應該清楚，只要打贏我就得。




而戰鬥形勢，亦對佢有絕對嘅優勢。
但佢放棄咗戰鬥，佢選擇咗共存。

「你為咩？」我問佢。

「我可以比你哋進入RPG世界，同惡魔共存。但係，管理員權限唔可以俾你。」

合理。
管理員權限代表神嘅權能，得到咗權限意味住能夠掌控世界。
對我嚟講，用極少嘅犧牲嚟進入呢個世界，都算係件好事，亦無必要冒險去搶奪權限，權限雖然吸引，但要同阿撒托斯為敵，就要有犧牲一切嘅覺悟。

但依家嘅情況好似係，我哋佔足優勢，打到對家割地求和，要求保住最重要嘅嘢。
然而，實際情況係，阿撒托斯突破咗班長嘅防線，嚟到呢到刺殺我，形勢點都係佢佔優。

唔合理。




於是我問佢：「你仲要啲乜？」

「我只係要一個人。」

僅此如此。
你已經變咗。
已經唔係當年，隨便就殺紅了眼，隨心所欲，鐘意點就點嘅蟲形魔物。
依家嘅你，已經係帶負住世界，稱職嘅女神了。