自殺以後，進入了RPG的世界: ☣終局之戰

天空佈滿惡魔。
就算只有一隻惡魔，都遠遠凌駕於人類之上。
我都親身同惡魔打過，理解到惡魔嘅存在有幾咁嘅危險。
強大嘅肉體。
無法理解嘅魔法。
就好似係人類嘅天敵一樣。

但係，呢種天敵居然比子彈蟻獵殺。
只係得四個子彈蟻，區區四人居然反殺惡魔。
魔法嘅威力固然強大。




但打唔中嘅話毫無意義。
子彈蟻就好似習慣咗同惡魔戰鬥一樣。
明白施法會有些微嘅時間延遲。
避得嘅避，避唔到就直接槍殺佢。

佢哋手上步槍嘅劇毒，似乎比起之前戰鬥所使用嘅毒素更為強烈。
之前似乎係用自然界唔存在嘅蠍毒，而今次用嘅係另一種蜘蛛毒。
呢一種蜘蛛毒基本上係即死。
我唔明毒素喺身體嘅運作，但我估正常情況下應該都要等毒素游入身體侵蝕器官先可以殺死目標。
但呢一種蜘蛛毒，見血即殺。




幾乎無任何嘅延遲，只要打中目標，即死。
我覺得基本已經超出左毒嘅層面，已經係去到魔法嘅境界。

惡魔都明白形勢奇怪。
身為高等存在，人數上有絕對優勢，反而會比四個人類虐殺。
無論點都講唔過去，只好飛到高空，睇清形勢。

其中一隻子彈匿喺瓦礫之後，換出狙擊槍，將惡魔一一狩獵落嚟。
惡魔開始驚訝，自己居然會躲避人類，四圍搵位匿埋。





無幾耐之後，一隻巨型惡魔出現。
話就話巨型，不過實際上只有三米左右高。
佢全身披住奇怪嘅裝甲，應該係諗住咁樣，子彈就打唔入啦。
點知一個火箭砲車埋去，惡魔就變為肉醬。

惡魔見聞，紛紛退下。
呢個時候，另一隻惡魔正面企出嚟。

「我乃阿斯塔錄摩下六柱惡魔，第六柱，陸軍元帥內比羅斯......」

說話未完，子彈蟻已經開始對內比羅斯發動狙擊。
坂機扣動的同時，內比羅斯同時扭動頸部，一下子就避過咗超音速嘅子彈。

內比羅斯同一般嘅成年男人無異。
黑色扎起身嘅黑髮，似是東方人一樣嘅臉孔，唔講嘅話基本上分唔到係惡魔。




但啱啱嗰一下，我已經清楚明白，佢係惡魔。
統率住軍隊既惡魔大將。

佢拎住嘅西式長劍，單手出鞘。
輕輕一揮，巨大嘅衝擊波逼近，子彈蟻急忙從瓦礫後脫出。
果然迴避是正確的選擇，衝擊波將瓦礫一分為二，所到之處恰似紅海一樣分離。

但惡魔隨即攻擊，如雷鳴，銀光一閃，來到子彈蟻跟前。
腰斬吧，下一刀即將把那人分為兩半。
面對那神速攻勢，男人居然有能力應對下來，輕輕一轉閃開了那致命一擊。
男人的近身格鬥術很強，面對遠超人智嘅惡魔元帥，居然能連接幾招。
但又有乜嘢意義？
就算比到盡，假使男人格鬥能力更勝一籌，喺呢場戰鬥上都無意義。
四圍匿埋嘅惡魔同時轟炸內比羅斯同子彈蟻。
血肉之驅又點可能應付落嚟呢？





內比羅斯受到惡魔砲擊，似乎都只係受咗小傷。
佢一早就命令咗部下攻擊。
自己只係誘餌，就算一對一有絕對嘅優勢都好，佢都只係想引子彈蟻出嚟，拖住佢，務求必須要殺死嗰個男人。

獅子狩獵野兔都會出盡全力。
身為高等惡魔嘅佢，同時亦係陸軍元帥。
係真真正正嘅戰爭家，同其他嘅惡魔唔同。

我終於感受到力量嘅差距。
即使係子彈蟻，都無可能殺得死呢隻惡魔。

「......」
聽唔明嘅說話，但我大概都知係咩意思。
玩夠喇，浪費時間。





蜘蛛女企咗出嚟。
一步一步走向內比羅斯。

內比羅斯再一次拔劍，再一次以神速之劍斬殺蜘蛛。
但係，佢停咗喺到，嚟到蜘蛛面前，劍只係離蜘蛛一厘米左右，佢停咗喺到。
唔係佢停咗喺到，而係佢比蜘蛛捕捉到。
惡魔落入咗蜘蛛網之上。
而其他嘅惡魔，亦都一一墮入蛛網之中。

不知不覺間，有人默默咁支配咗整個戰場。
將瓦礫，將屍體，將所有嘢都化為佢嘅掌中。
佢係蜘蛛。
所到之處，都佈滿咗名為蜘蛛網嘅陷阱。