自殺以後，進入了RPG的世界: 自由

呢到究竟係邊到？
我依稀記得，自己比阿斯塔錄手下嘅子彈蟻殺死。
之後黎到呢到。

漆黑無重力嘅空間。
巨大嘅蟲卵結構生物。
仲要——
蜘蛛女王。

我瞬間明白，自己又再死左，然後比神明救返嘅事實。




之前試過一次，天照back up左我⋯⋯

「並唔係back up。」
蜘蛛開口說話。
然後又再陷入沉默。
蟲卵生物代言。

「根本唔存在back up呢個功能。上次嘅事，上一次嘅你真係死左，依家嘅只不過係重新構成嘅你。」
又再次講左d好震撼嘅事實。
姐係話，依家嘅我同以前死左嘅我係兩個唔同嘅生命體黎。




依家嘅我，只不過係擁有相同記憶、一樣肉體嘅第二個生命體。

「生命體？NPC都稱得上係生命？你只係AI。」
蜘蛛嘲諷道。

「咁，以前嘅果個我⋯⋯比你殺死嘅我，係真人，唔係NPC？」
「一樣都係NPC。」蟲卵說。
「你覺得自己只係第二代？」蜘蛛開口講。

我停左係到，然後望住佢。




「依家嘅你係第三千五百一十七代，我地只係保留左一次你版殺嘅記憶。三千五百一十七化入面，其中三百二十八代比魔物殺死，二千六百四十三代比蜘蛛大人殺死，六十七代因為程式問題產生固障，一代因為分裂而被移除，兩代因為合併而被移除，一百九十二代比人殺死⋯⋯」
「夠啦！」我打斷左蟲卵生物嘅說話。

完全唔想知嘅情報。
點解要話比我知。

「咁我頭先係咪又死左一代？」
「唔係，我及時用空間魔法救左你。」
「事到如今，點解要救我？明明整多個新嘅就得！」
「救你只係順便，風龍王唔可以死。」

順便。
是但啦。
無所謂啦。





「荒謬。死左幾多次對你黎講有咩分別！明明有一樣嘅肉體同記憶，重新整多個新同返生有咩分別？你就係你。」
「但係靈魂唔係唔同咩？」
「NPC無靈魂。而且靈魂係屬於神域範疇嘅野，你地低等生物無辦法證明到靈魂嘅存在，既然係咁，就不如當靈魂根本唔存在！你就係你。」

正當我準備開口、先發覺自己比作地傳送走左。
不死族領地魔王大宅。
無任何指示。
無任何引導。
無任何援助。
無任何安排。
無神明派黎既人。
天照同蜘蛛，亦都唔係到。
自⋯⋯由？