自殺以後，進入了RPG的世界: 名字

【毀滅之地】惡魔-亞巴頓 神官 LV99
 
HP:12930/12903
MP:10318/10471
 
力量:819  敏捷:910
防禦:999  魔力:1020
 
眼前呢一個男人比人一種好強既壓迫感。
佢絕非等閒之輩。




惡魔小妹妹既然比佢救返，咁樣我就只可以正面同佢戰鬥。
 
一打一黎講，我有壓倒性既優勢。
雖然一路以黎我都比對手屌打。
但係爛船都有三根釘，依家既我係不死族魔王！
身為神話級魔物蠍子女王既我係無可能輸比呢一個惡魔！
 
講係咁講姐。
戰鬥好明顯唔係一打一。
亞巴頓其下十幾位鷹犬同時圍住我。




 
「報上名來，無名既人類！」亞巴頓指住我講。
 
名？
無錯，我係無名。
連STATUS上面，我個名果欄都係空左。
名⋯⋯都叫有既，天照會叫我小kidkid，不過點都無可能用呢個黎做名啦。
名既話，三師姐好似都有個名。
雖然其他人一直都係叫佢做蜘蛛。
不過佢既真名係叫阿撒托斯。




克蘇魯神話入面最古老且強大既魔神。
 
我又望向天照。
天照個名係用日本神話入面最重要既存在。
既然係咁，我係咪都應該去改返個名呢？
都係用D神袛做自己個名好似跟隊形D。
話唔定改完個靚名我就會成為神呢！
咁樣改咩名好⋯⋯
 
依定唔係諗呢D野既時候！
睇黎我思考得太耐，佢地以為我無視佢地，所以發動左攻擊。
 
有幾位戰士衝左埋黎。
係佯攻！
佢地身後既法師發動攻擊。




 
「火球術」
幾位法師同時用火球術攻擊。
數個火球同時打落在我既身上。
將我轟出門外。
 
咳咳！
係認真架？
天照呢？睇黎天照淨係企係到食花生。
姐係要我SOLO啦！
  
再有幾個戰士衝左埋黎。
今次唔係佯攻，真係用劍攻擊。
我反應唔切，係咁硬食佢地既攻擊。
 




邪教組織邊可能有咁樣既戰鬥能力？
根本就已經係軍隊黎啦。
如果我唔係魔物，我神早比佢地秒左。

「你究竟係咩人？」一個戰士用劍指住我。

答佢唔到。

「我係魔王特種部隊『黑騎士』既前任成員，名叫海克托！」

係黑騎士？
前任黑騎士？
唔係，似乎上任既黑騎士係一個部隊黎，而呢位叫做海克托既男人係其中之一。
毫無疑問，叫得做黑騎士，必定係精銳黎。
咁樣既男人，居然都係邪教既一份子？




究竟呢個邪教會係咩來頭？

點算好？
變做魔物既形態，以蠍子女王既力量直接開無雙殺哂佢地？
老實講我想留一手準備。
唔想咁快比佢地知我既身份。
貿然揭露底牌，又斬草唔除根既話只會令我形勢不利。

咁樣既話，要撤退？

突然之間，天空上面出現左幾個大火球。
彷如殞石一樣擊中大樓梯之上。
巨大既威力，爆炸令到煙塵四起。

「係咩人？」海克托大叫。





一把銀色既幼劍差D就係海克托既頸上畫下血痕。
「不愧係前任『黑騎士』成員。」
一個身穿黑破斗篷既骷嘍族男人輕聲說道。

「要走啦。」
然後一個火色長髮、紅色連帽外套既女人帶住我飛左上天。

「你究竟係咩人？」海克托問我。

我笑一笑，然後開口：
「飛天意粉神。」

「有人啦用過啦，傻仔。」天照插嘴道。