自殺以後，進入了RPG的世界: 蜘蛛與蠍子

黑色既陰暗森林。
月黑風高。

「黑暗飛彈」
我向後一跳，避開左佢既攻擊。
睇唔到敵人，佢埋伏左唔知係邊。
正面對決黎講，佢係打唔贏我。
無論係STATUS定係技能既數量，佢都唔夠我多。
最決定性既一點係，蜘蛛係唔會打得贏蠍子。





「暗影長槍」
遠距離既狙擊。
大概已經知道左佢既方向，我即刻跑過去。

離開左聯盟，直接衝去魔界。
就好似迦具土衝過黎聯盟一樣，我單人匹馬闖入魔王城。
見到魔王城係唔遠既地方，只要穿過呢片森林，就去到魔王城。
而擋係我面前既，就係蜘蛛女王。

「蜘蛛結界」




我比佢束縛住左。
「蠍子之火」
我全身著火，將佢既蜘蛛絲燃燒殆盡。

我既技能，就彷彿係為左打低蜘蛛而設。
佢既技能我都有對應既方法。
對蜘蛛黎講，最重要既武器就係蜘蛛絲同埋蜘蛛毒。
但係我可以全身著火黎解除佢既束縛，而我本身亦都免疫毒攻擊。
佢唯一勁過我既地方，就係敏捷。





論速度佢遠遠拋離我。

不過，佢跑得再快，都無可能快過我既技能。
「蠍尾射擊」
我對住草叢一個地方射擊。
打中左。
係機會。
趁佢重整態勢，我即刻衝左上去。

如我所料，見到蜘蛛女王個樣。

「死亡之鉗」
鉗住左佢。
「蠍子毒尾」
雖然毒對佢無效，但係呢一擊就算唔計毒既傷害都非常之痛。




佢即刻重傷。
贏到。
「麻醉之針」
我開技能，佢即刻麻痺左，郁唔到。

近距離。
「究極光束」
我條尾發射左一條巨型既光束炮。
直接命中蜘蛛女王。

麻痺左既佢唔會郁得到。
咁就硬食左我呢一擊。

比想像中弱。
蜘蛛從來都唔會打得贏蠍子。




無論係現實世界定係呢一個世界。

「你係咪諗緊蜘蛛唔會打得贏蠍子？」
佢勉強企左起身係到問。

殘血啦。
你輸左啦。

最後一擊。
蠍子毒尾……

「你係咪唔記得左蜘蛛係一種點樣既生物？」

呢個時候，我先發覺到四圍都係蜘蛛絲。
燒……燒唔切。




完全阻礙住我既行動，然後佢好完美咁穿過哂D蜘蛛絲，走到黎面前，對住我個肚攻擊。
「暗影長槍」
硬食。

我彈開幾米之後，比佢D蜘蛛絲吊起左。
吊頸。
好彩有技能可以燒開D蜘蛛絲，先無比佢吊死。

但係佢衝過黎。
「暗影長槍」我即刻反擊。
「魔法反制」佢中和左我既魔法。
然之後，一腳踢向我。
「死亡踐踏」

再彈開幾米再比蜘蛛絲吊起。





喂喂……佢又回血？回左一半咁多？
「無錯啊。」佢笑笑口講。
被動技能：
[生命吸取:當你造成傷害時，為自己回復等量的HP]

「你唔好以為STATUS同技能就係一切啦，要好好咁睇清楚對面既特性先好行喎，蠍子女王。」
蜘蛛女王笑住講。