自殺以後，進入了RPG的世界: 請將冰山避開

坐食花生。
左邊係黑騎士對地龍王。
右邊係堅系令囡對條火龍？
唔幫拖，對下局勢先。

堅系令囡壓制住條龍。
雖然睇起上黎，堅系令囡成個人咁，好似唔多勁。
但係，實際上status比起條龍仲高。
堅系令囡係一隻人形怪物，成身黑色外骨骼，然後手上面拎住枝好似脊骨既長槍。
火龍係咁開技能，咩烈焰吐息、火球術完全打唔中堅系令囡。




堅系令囡敏捷好高。
避開哂攻擊之餘，亦都用長槍攻擊。

「死亡刺擊」
堅系令囡一槍吉穿左條龍既皮膚。
爆哂血。
條龍退後。
然後，張開口。

「烈焰吐息」




理所當然地，堅系令囡避開左。

「火流星雨」
然後，天空出現左流星雨。
無數既火球同時炸落塊地到。

完全避開哂。
堅系令囡真係好強。
呢條叫尼德霍格既龍，最少都有火龍妹以上既實力。
但係，堅系令囡完全壓制住佢。




睇怕，堅系令囡可以同龍王一戰。

講開龍王，另一邊既戰鬥完全脫離左我想像。
本來我以為戰況會一面倒，地龍王會撳住黑騎士黎打。
但係，黑騎士比我想像中強好多。
甚至強到唔合理。
龍王，應該係呢個世界最強既存在。
呢個世界既神，天照、奧丁、宙斯，應該比哂權限佢地，比四大龍王幫手管理呢個世界。
既然係咁，龍王應該無理由輸。

我實在諗唔到有咩人可以夠龍王打。
就算去到堅系令囡呢種級數既魔物，最多只可以死得無咁慘。
始終，龍王有管理四大元素既權限，自己元素既技能可以任意操縱。
問題就係，黑騎士居然可以同地龍王打成平手。
唔係，黑騎士佔優。




勢均力敵，但係可以睇到黑騎士佔優。

黑騎士究竟係邊個？係咩人？
只知道佢同白雪一樣樣。
究竟佢係邊個？

白雪係二千年後，比我親手殺死。
無可能係白雪。
咁，你究竟係邊個？

我無權限查閱黑騎士既資料。
黑騎士盔甲既資料好明顯好其他既神鎖住左。
係邊個鎖？
天照？奧丁？宙斯？定係佢地三個之外既神？
呢個世界仲有其他既神？





地龍王鳩叫，然後撲左上去。
地龍王身形非常之巨大，起碼有架波音747咁大。
而黑騎士，就只係一個普通女仔既身形。

但係，呢個普通女仔一D都唔普通。

黑騎士用把劍擋住左地龍王。
成架波音747衝埋黎，但係黑騎士只係用劍輕鬆擋住。

「大地吐息」
地龍王開技。
開口，發炮。

黑騎士跳開，然後開技:




「寒冰障壁」

冰造既牆壁擋住左龍王既攻擊。

「冰山」
黑騎士舉手，然後天空上面出現左個巨型冰山，撞落去地龍王到。
呢招技能名夠哂HEA，我鐘意。

「大地斬擊」
地龍王舉起爪，好似破冰船咁將冰山避開。

黑騎士跳落地。

地龍王唔敢亂郁。
好明顯，黑騎士唔係等閒之輩。




冰山呢種技能，一睇就知係一招好高級既技能。
如果唔係龍王，係其他對手，根本無人可以無傷擋住佢。
地龍王大概都明白，自己既實力不及黑騎士。

「你究竟係咩人？」

「哼。」

黑騎士速度實在太快。
敏捷可能係9999。
唔係，可能全status都係9999。

「寒冰斬擊」

全場可能只係得我呢一個神睇得清發生咩事。
其他人睇起上黎，地龍王無啦啦吐血。
但係我睇到，黑騎士埋到身，然後一劍斬開佢喉嚨。

比地龍王仲勁。
而且勁幾個級數。
之前唔知聽邊個講過，海龍王係最勁，之後係火龍王，跟住就到地龍王。
呢個世界第三強既怪物居然比黑騎士秒殺左。
黑騎士幾乎係無傷。
唔單係無傷，而且係無雙！！！
WAKAKAKAKA！

唔好笑咩？
算，都係唔破壞氣氛。

講番正題，黑騎士實在太強。
唔？
不概係地龍王。
好似死唔去。
關鍵時候避開左？
條頸出現左個好深既血痕。
但應該無傷及要害。
死唔去。