浮生若夢 · 改寫夢境的事: 6

慘白嘅世界降臨，一片虛無，環視四周都無人，只有我。

我控制唔到呢場夢，焦慮嘅我抬頭望向上方，竟然有一個黑影注視住我，純黑嘅身軀同慘白嘅空間做出極大嘅對比。

究竟佢係呢場夢嘅主角，定還是我先係？

如果場夢係我嘅，咁呢場將會係我人生中第一場屬於自己嘅夢

如果場夢係佢嘅，咁就代表我失去左改寫夢嘅能力，或者佢擁有其他奇怪嘅能力。





「我姑且叫你做先」沉默左幾分鐘，佢首次開腔

「我諗你入錯夢啦，而且我諗你，仲未識得完全運用曬你嘅技能。」

「睇你個樣就知，你完全無諗過有其他作者嘅存在，所以你毫不掩飾地暴露左你嘅尊容，如果我想嘅話，我聽朝就可以憑住你嘅樣貌殺左你。」佢繼續講

「下？你係度講乜」對於佢所講嘅野，我完全覺得無解，我開始覺得呢場可能真係一場屬於我自己嘅夢

「我估你黎都係無惡意，忠告你一句，唔好比人知道你嘅能力，無論係現實，定夢裏面」佢無視我嘅疑問繼續自說自話





「等我送你走啦」講完，佢右手憑空出現左一把劍，直接沖左去我面前劈落黎

我嚇到當場醒左，帶住急速嘅呼吸聲擦一擦我額頭上嘅冷汗，

我唔敢再訓，我怕我又夢到。

夢，肯定係夢，肯定係我人生中第一場噩夢。

淩晨五點，拿起部手機覆阿晴嘅whatsapp，自從上次聚會之後，我同佢一直都有whatsapp嘅習慣。





作者...我始終對呢個字無法釋懷，萬一佢講嘅都係真嘅，咁我應該點。

估唔到夢...都唔係屬於我嘅世界。

我頹廢地換左套便服，諗極，都諗唔明。

朝早七點，晨光熹微，我返工了。