我要寫出一個好好好好甜既好故事: 第十四章 塗鴉

  我拭去嘴角既血跡,

返到班房,

除左嘈到拆天之外,

其他事情都冇乜變化,

我拎住兩包維他奶,





行返埋位,陳瑤仲係低住頭,

好專心咁畫畫,

由於佢用手遮住,

我只係隱約見到佢畫緊頭髮,

「hey,今日維他奶買一送一,比你。」





我將維他奶放喺陳瑤枱面,

只見佢停頓了手中的畫筆,

半信半疑咁望住我,

「真係?」

雖然唔知點解佢唔信,





但係比著我有免費午餐既話一定會食,

「都話係囉......」

我攤開雙手以示無奈,

只見佢溫柔地將飲管拿出,

再細心將維他奶上面塊錫紙戳穿,

女仔做事真係特別溫柔,

比著係我,

一野戳穿直接飲啦,





理得入面啲野會唔會濺出黎?

我企喺原地,

思索呢個情況既發生原因,

「呀,係喎!淨係顧住飲唔記得讓比你添......」

陳瑤一臉尷尬的同時,

讓出位置俾我返埋去座位,

我坐低,靜靜地望住陳瑤細細啖咁吮,





一臉滿足的樣子,

「咩事咁開心啊,都講左飲料係送,係送架炸!」

我扮不耐煩咁攤開雙手,

「無野,估唔到你知道我鐘意飲甜野姐~」

陳瑤面泛桃花,

我一望,

咦,

點解佢塊臉會咁紅既?





「你無事呀,塊面咁紅既?」

我望實佢塊面,

真係好紅,

只見佢揮一揮手,

搖搖頭,

「無事!我只係血壓有少少低姐^_^」

陳瑤對住我微笑,





原來臉色紅潤的陳瑤笑起來十分之好睇,

但當中好像包含著一絲痛苦,

可能只係我既幻覺姐,

我繼續望住佢,

確保佢真係無事,

「真係無啊,我今朝趕唔切吃早餐姐,無下次嘻嘻~」

只見佢吐出舌頭,

以表示無問題,

於是小息就喺一凍一熱既維他奶既陪伴下渡過。



  「各位同學,由於我地今堂要分組討論,咁自己坐埋一齊啦~」

Miss Ng 係我地既通識老師,

雖然身形嬌小,

卻不戰而屈人之兵,

每次都以溫柔既態度對待我地,

就好似朋友咁,

所以我地成堂人都好尊重佢,

就連阿楠都唔敢調戲Miss Ng,

就可見其地位超然。

我被迫遠離自己的座位,

坐到一開學既位置,

而我,

就同winkie,

阿楠同埋阿儀一組,

我一望過去,

就見到阿楠同埋阿儀喺到打情罵俏,

真係望到都心酸,

「咪理佢地兩個啦,我地兩個自己做完張工作紙啦。」

winkie似乎已經習慣了閃光彈,

又係既,

始終佢都係有男朋友既人,

而我男朋友都冇......

「阿朗,你近排點啊?」

winkie扮埋頭苦幹,靜靜地咁問我,

「下,我可以點姐?」

我估到佢想問乜,

但係我唔想再去面對,

「咪阿瑩囉,你放棄咗佢啦?」

winkie將眼光望向坐在我上堂坐的位置,

現在正坐著那位令我心碎的女孩,

同緊陳瑤傾得好開心,

雖然唔知點解佢地又會識,

「哦,冇野啦,我都放低咗咯。」

我繼續填寫工作紙內的空格,

避免目光與winkie接觸,

「妖,仲以為你係真心既,好失望囉。」

winkie用手推咗我一下,

你可以話我冇用,

但係唔可以話我唔係真心!

我狠狠地望著winkie,

「你咩都唔明......」

只見winkie不以為意,

並無被我既舉動嚇親,

「唔知邊個先唔明呢?」

winkie戲弄的語氣令我哭笑不得,

但諗深一層,

我又知道啲乜野呢?



  話咁快又落堂了,

正當我打算回到座位時,

卻撞上了迎面而來的汪瑩

「啊!」

阿瑩用手遮住個頭,

表示頭部受到重擊,

「對唔住......」

我目無表情地道歉,

唔見阿瑩滿面笑容,

「唔緊要,嘻嘻!」

之後便走出了班房,

搞乜野咁開心既?

可能係戀愛既力量掛,

我搖搖頭之後坐低,

之後發現成張枱,

比人畫花哂!

我望住陳瑤,

只見佢喺到忍笑,

「喂,究竟發生咩事?」

我輕輕用手敲一下陳瑤的頭,

只見陳瑤露出誇張的痛苦表情,

「估唔到你份人咁低能,哈哈!」

轉即面露喜悅,

「首先,我低能關張枱比人畫花咩事?然後,邊個畫花架?」

我滿腦子都係問題,

只希望得到答案,

「你睇下啲畫寫乜你咪知囉,無講錯,真係好蠢。」

陳瑤的說話令人費解,

於是我只好自己尋求真相,

只見到一句又一句既說話,

「低能仔」

「傻仔」

「爛gag王」......

佈滿了整張枱,

我諗我明白了,

因為從開學至今,

我只有對一個人講過笑話,

喺呢一個人面前扮傻仔,

氹佢開心......



  「阿哥!」

阿妹驚慌地望住我,

原來門外又傳來一陣陣的拍門聲,

「阿妹你入房先。」

我示意阿妹入房,

等到佢好唔意願咁入房,

鎖埋房門之後,

我就行去廚房,

拎起菜刀,

打開木門,

「始終肯出黎啦,死令仔?」

一個其貌不揚的彪形大漢站在門前,

手中拎住一張令我即刻想燒咗佢既紙,

我並無回應佢,

只是冷冷地望著佢,

佢一下拍落鐵閘到,

「唔好以為唔出聲就無事,你都知架啦!你老豆話抵押個女......」

「唔駛再講廢話,我地同你口中所講既人並無任何關係,

你再黎煩住哂,我唔知會做出咩事。」

我舉起菜刀,

直指大漢的眼睛,

只見佢不閃不避,死死盯著菜刀的刀鋒,

「令仔刀都未拎穩就學人揸刀?不過幾有勇氣既,上次件事,考慮成點?」

大漢的氣勢嚇得我雙手抖震,

「我需要時間考慮。」

我故作鎖定

「一個禮拜。」

大漢說罷就遠離大門,

向著走廊出口走去,

腳步聲越來越少,

直至聽到電梯提示聲消失,

我先至鬆一口氣

「阿妹,可以出黎啦。」

只見房門緩緩打開,

阿妹半信半疑地伸出頭來,

確認情況安全先至敢出黎,

「走...走左啦?」

阿妹顫抖的聲音令我感到內疚,

身為阿哥竟然唔可以好好保護阿妹,

仲令佢成日擔驚受怕,

我見到阿妹眼泛淚光

「無事啦,無事啦......」

我輕輕撫摸阿妹的頭髮,

希望可以令佢可以冇咁驚,

「阿哥好快會解決呢一切......」

我怔怔地望著門口那一片紅色的油漆。