《唔係啩！我間房幅牆有個窿》: Chapter 22
「嗯，聽你咁講，睇嚟你都就成功囉喎。咁你諗住幾時表白呀? 」
「我想再醞釀一下先，我都等緊一個好啲嘅時機。」
「等咩呀? 你而家即刻過隔離撳門鐘大大聲話我好鍾意你咪得囉，駛鬼搞咁多嘢咩? 」
「呀你女仔之家一點都唔浪漫嘅? 喂唔好講我啲嘢啦，你同個男仔又點呀? 」
「呵呵！幾好啦，過兩日我同佢都考完試，佢話想約我去玩喎。」
「你應承咗佢喇? 」
「緊係無啦，我依足你指示啦。我話諗吓先，等考哂試再算。我諗佢之後一定會再搵我。」
看來死妹釘已經收伏了那邊的Ron了，希望他不會怪我教死妹釘做了娘娘吧。
「咁做就啱喇，記住呢個曖昧時期比多啲屎佢，比兩啖屎先好比一啖糖呀！」
「係喇係喇......咦? 佢打嚟喎！」
「係? 唔好聽住，由佢等吓先，由得佢響到收線。過一陣佢一定會再打嚟，到時你等佢響兩三吓先聽，聽嗰陣把聲冷淡啲，佢講三句你先應一句。跟住聽日你打返一個電話比佢，但要熱情啲喎。咁就實食無黐牙喇！」
「咦佢收咗線啦，咁我唔同你傾住啦，我要等佢電話呀，下次再講啦。」
正當我想道別之際，我發覺洞孔好像有點異樣，於是我馬上道﹕「喂死妹釘，咪住先。你有無覺得個窿好似細咗咁呀? 」
「嗯......睇吓睇吓又好似係喎，係咪啲雨細咗呀? 」
我看了看窗外，雨點還是嘩啦嘩啦的不斷打在玻璃窗上，一點也沒有變小的跡象。
「唔...唔係呀......但係個窿嘅size同啲雨大細有關係咩? 我記得落毛毛雨同落狗屎都好似一樣咁大咋喎。」
「哈！又好似係喎......喂喂喂！真係唔同你講啦，佢又打嚟啦，我要調整吓個心情先。」
「好啦好啦，拜拜。」
放下紙杯後，我看著洞口，又輕輕的撫著它，也沒有甚麼奇怪的事情發生，於是我放棄研究，躺在床上睡覺了。
一星期過後，死妹釘告訴我Ron約了她週末去海洋公園，而且只是兩個人單獨約會，看來這一次她會成功了。而我也不甘示弱，我當天也約了Carmen到郊外遠足。
「咁我哋聽日一齊加油啦！」死妹釘士氣旺盛。
「好！加油！」
我在港外線碼頭迎著海風，等著Carmen的到來。
為甚麼不和她一起從家裏出門? 沒辦法，她說早上有點事情要辦，唯有約她在碼頭等候了。
「Hey，Raymond，嚟咗好耐啦? 」一身便服的Carmen拍了拍我的肩膊。
「一陣啫。係呢，你食咗嘢未呀? 我買咗麥記喎。」我搖了搖手上的外賣袋。
我們邊吃邊上船，路上盡是聊一些身邊發生的無聊趣事，很快我們就到了南丫島。
我們先到了一間cafe休息了一會，再起程步行南丫島唯一的行山徑。
「係呢，你之前有無嚟過呢度呀? 」Carmen的樣子很快樂似的，看來看過芯姐給她的信後令她變得很開朗了。
「有呀，之前同女朋友嚟過。」我馬上又補充一句﹕「不過我單身咗好耐㗎啦。」
Carmen笑了笑，好像沒有留意我說甚麼，但又問道﹕「你同你個ex拍咗幾耐拖呀? 」
我有點愕然她問我前度的事情，不過我還是回答了﹕「吓? ...呃......3年。」
她突然跑到前方蹲下﹕「嘩！有貓呀！」然後用手輕輕逗弄著貓兒的下巴。
貓兒露出很享受的樣子，我走上前問道﹕「你鍾意貓? 」
她點點頭道﹕「係吖！我都好想養一隻。」
「你可以養㗎，我哋嗰度又唔係唔比養貓。」
她隨即搖搖頭，嘆了一口氣﹕「你知我份工唔定時㗎啦，有時幾日都唔喺屋企，邊養到喎。」
「咁又係......」
逗弄夠了，她又輕快的繼續前進，我連忙追了上去。
「咁你之前做咩事同你女朋友分手嘅? 」沒想到她又回到剛才的話題了。
我聳聳肩道﹕「佢話我嗰陣掛住做嘢唔理佢，因為呢件事鬧咗幾次交，最後就分手喇。」
「咁你呢? 你做咩唔拍拖嘅? 你咁靚女無理由無人追㗎。」我趁機打探她的感情生活。
她臉一紅﹕「邊係喎............你知我之前因為家姐件事，唔係咁鍾意同男仔接觸啦......」
「咁再之前呢? 」
她遲疑了一下，但還是答道﹕「讀書嗰陣拍過一次囉，不過幾個月就散咗lu......」突然她指著前面興奮道﹕「嘩前面有得食山水豆腐花喎，我哋去食囉。」說罷拉著我的手臂跑過去。
被她拉著手臂的我不禁心跳加速，也忘記繼續追問她過去的感情事了。
吃過豆腐花後，我們繼續慢慢的沿著山徑步行。到了洪聖爺海灘，剛好看到黃昏的夕陽。
今天還算天清氣朗，所以夕陽也顯得特別漂亮。
Carmen提議道﹕「我哋去嗰邊睇日落囉。」她指著不遠處的石灘。
我和她走到石灘上，正想找一塊較平整的石頭坐下，她卻腳下一滑就要跌倒。
「小心！」在她背後的我連忙抓住她的雙臂，她正好靠在我的懷裏。
我讓她重新站好，問道﹕「無事呀嘛? 」
她臉泛紅暈，有點不好意思道﹕「無...無事呀......唔該你......」
看見她羞澀的模樣，我知道機會來了，於是右手順勢抓緊她的左手，道﹕「啲石頭好滑，小心啲，我哋去前面舊石坐啦。」
Carmen只是略點一下頭，就讓我牽著手坐到那塊石上。
YES！她沒有甩開我的手！我成功了！
我感到心臟噗嗵噗嗵的亂跳，緊緊抓著她的小手不放。
坐了一會，Carmen打破了沉默，她柔聲道﹕「Raymond，你捉到我隻手好實呀。」
她想我放開她的手嗎? ......不！她的語氣這麼溫柔，不會是這個意思的。而且她要放開手的話，甩開我就可以了，何必說出口呢！
於是我厚顏無恥道﹕「我驚你又跣親嘛，咪捉實啲囉。」
她聞言「咭」一聲笑了出來，道﹕「要咁樣先捉得實㗎。」言畢輕輕掰開我們牽著的手，再用十指緊扣的方式重新牽著我的右手。
我有點驚訝的看著Carmen，她正帶點羞澀微笑的回望我，嚇得我將頭重新轉向下降中的夕陽。
媽的！都已經快三十歲了，牽個手緊張個甚麼屁? 你道你還是十多歲的青頭仔嗎?
想是這麼想，但心臟就是停不了的一直亂跳，腦海也一片混亂的想不出甚麼來。
這個時候Carmen將頭挨在我的肩膊上，問道﹕「點解家姐寫比我封信會寄咗比你嘅? 」
我忍住了笑，淡淡然道﹕「唔知呀，可能佢喺天堂搞錯咗啩。」
她「嗯」了一聲，又道﹕「你知唔知家姐封信最後一句寫咗啲咩呀? 」
我當然不知道了，於是我搖了搖頭。
她柔聲道﹕「佢話，有個叫Raymond嘅男仔，佢都覺得幾好，要我珍惜眼前人喎。」
噢！沒想到芯姐替我說好說話了，我應該怎樣感謝她?
我笑道﹕「原來我係好男人呢件事連天堂都有人知，哈！」
Carmen輕輕捏了我的手臂一下，笑道﹕「唔知醜！」
我們坐至日落西山才離開南丫島。直至回到市區，我們還是一直緊緊的牽著手，到晚飯時才有點不捨的分開。
吃飯時我們談起了水靈與Ron的婚事。
「你知道靈姐姐佢哋幾時結婚嗎? 」
「知呀，佢同我講過，下年年中嘛，佢仲叫我記得比大封啲人情添！」
Carmen奇道﹕「你同靈姐姐好似識咗無幾耐咋喎，你哋好似咁熟咁嘅? 」
我並沒有打算將死妹釘的事告訴Carmen，於是道﹕「可能真係人夾人啩，佢都講過覺得好似同我識咗好耐咁。」我突然想起了甚麼，馬上道﹕「你唔好誤會啲咩呀！我同佢無嘢㗎！」
她格格嬌笑起來﹕「就算你有嘢呀，靈姐姐都唔會吼你啦，阿Ron好過你咁多！」
「唓！係咩? 有幾好呀? 」
「真係好好㗎！靈姐姐成日都話阿Ron對佢好好又專一，又不時有啲小驚喜比佢，對佢屋企人又好，連靈姐姐嘅爸爸媽媽都好鍾意阿Ron，我諗佢哋屋企人都等咗佢哋結婚好耐。」
是嗎? 那太好了，水靈已經得到幸福了，你也會一樣吧，死妹釘。
我托著下巴定睛看著Carmen微笑道﹕「第一日就比說話我聽喇? 」
Carmen鼓起腮，忿忿不平的看著我﹕「哼！你咪唔好聽囉！」