《唔係啩！我間房幅牆有個窿》: Chapter 20
星期六的早上九時五十分，我已經到達了調景嶺站。
剛才出門時按Carmen的門鈴但她卻不在，她還要先去甚麼地方嗎?
我致電給Carmen﹕「喂，Carmen? 我到咗啦，喺A出口等你。」
「我都到啦...咦，我見到你喇。」
我見身穿素白連身及膝裙的Carmen剛出閘，向著我連連揮手。
我連忙揮手回應，她也小步跑到我身邊。
她微笑道﹕「早晨呀，你等咗好耐喇? 」淡掃蛾眉的她，令人覺得耳目一新。
「唔係呀，我都係啱啱到咋嘛。係呢，你今朝咁早出門口嘅? 」
她稍稍拿起手上的紙袋道﹕「我去咗買嘢。」
「哦...咁我哋今日要去邊呀? 」
「你跟我嚟吖。」
她領著我走出地鐵站，沿著行人路一直走到海旁。
咦? 這條路...莫非是? ...
我問Carmen﹕「我哋......係咪去緊墳場呀? 」
Carmen有點不好意思﹕「Sorry呀...無一早講你知......其實今日係我家姐死忌，所以咪嚟探佢囉......咁我...又想你陪我喎，但又唔好意思講，所以......」
這種事情有甚麼不好意思的? 到墳場掃墓而已，又不是到墳墓過夜。
我開玩笑道﹕「咁好彩你係日頭叫我陪你啫，夜晚嘅話我就閃咗去啦。」
Carmen笑了笑，然後我們就繼續前行了。
這條行人徑沿途的風景還不錯，依山旁海的。我跟Carmen說說笑笑，大半個小時左右就到達了骨灰龕場。
到了Carmen姐姐的靈位，Carmen先用紙巾輕輕抹拭乾淨，又從紙袋裏拿出一束百合花，在龕位前放好。然後獃獃的看著姐姐的遺照，眼眶有點發紅。
我柔聲道﹕「其實你哋兩姊妹咁耐無見，你家姐應該都好想聽吓你嘅事，你有咩唔開心咪講比佢知囉。」我頓了一下，又道﹕「定係因為我喺度你唔好意思講? 咁我行開一陣先。」說罷就想暫離一下。
她拉著我的衣袖不讓我離開，低聲道﹕「唔...唔關你事......」接著又帶點哽咽﹕「係...係我唔知點講......」
說不出口嗎? 嗯......有了！
我從口袋裏拿出一張剛才在路上接過的宣傳單張，連同一枝筆遞給Carmen﹕「你有咩想講咪寫封信比你家姐囉。」
她好像還有點不知如何下筆，但我帶她到露台坐了一會兒後，她開始密密的寫起來。
我不好意思坐在她身旁看她寫些甚麼，於是走到露台邊看風景。
我看見Carmen密密的寫寫寫，不一會就快要填滿整張紙了。而且又不時抹著眼淚，看來她平時真的憋得很辛苦。
這個時候，我想到一個辦法可以令她從此變得開心點的，但不知道行不行。
我見她停了筆，呆呆的看著紙上的字，看來她已經寫好了，於是我走過去道﹕「嗯? 係咪寫好喇? 咁我哋可以去寄比你家姐喇。」
Carmen抹了一下眼淚，奇道﹕「寄? 」
「係呀，呢度嘅特別服務，可以寄信比先人，唔駛收郵費。」
我拉著她走到化寶爐前，然後笑道﹕「放入去啦，你家姐會收到㗎啦。」
她明白了我的意思，將信放進爐裏，一個閃爍，那封信就化為了灰燼。
我道﹕「唔知你家姐收到信之後會唔會回信比你呢? 」
Carmen笑了笑沒有回答我，她大概以為我在說笑吧。
我們回到靈位前，Carmen道﹕「家姐，下次我再嚟探你啦。」
我笑道﹕「你唔介紹我比你家姐識㗎? 」
Carmen抿嘴一笑﹕「係喎，我都唔記得咗添。」然後轉頭向她姐姐道﹕「家姐，呢個我朋友，叫做Raymond。今日係佢陪我嚟探你㗎。」
我向她姐姐打招呼﹕「Hi，我叫Raymond呀......芯姐。」我轉過頭問Carmen﹕「我咁樣叫佢ok嘛? 」
Carmen笑了出來﹕「我諗得啩，我家姐個樣睇落幾開心吖。」她指了指靈位上的照片。
我笑道﹕「咁好啦芯姐，我哋下次再見啦。下次我買隻燒鵝脾比你歎！」下次我會以Carmen男朋友的身份來探望你的。
Carmen「咭」的一聲笑了出來﹕「我家姐鍾意食朱古力㗎。」
我馬上改口﹕「咁我下次買朱古力上嚟啦。」
我們離開骨灰龕場，沿著來路下山。
「你兩姊妹咁得意嘅，一個鍾意食甜嘢，一個就唔鍾意。」
「其實我都鍾意食，不過家姐走咗之後，每次食甜品都會諗起佢，所以......」
噢，原來如此......
我見她的眼睛又開始泛紅，看來她的心結還未完全解除。
「Sorry呀...我又......」
她抹走眼淚，又笑靨如花道﹕「我無嘢呀！我哋去食嘢囉！」
看著她強顏歡笑的樣子，暗道一定要解開她心中的鬱結。
回家後，我在思考著今天想到的辦法。
這樣子的話，應該可以幫到Carmen吧......
「喂大叔！諗緊咩呀? 叫極你都唔應人嘅? 」
「無...我諗緊阿靜同佢家姐件事啫。」
「咁你諗到啲咩呀? 」
「係諗到啲，不過又要麻煩你幫幫手。」
「點呀? 咩事呀? 講嚟聽吓。」她的語氣倒沒有不耐煩。
我深呼吸一口氣，道﹕「係咁嘅，我想你幫我請阿靜家姐嚟你間房，我有啲嘢想拜託佢。」
死妹釘大吃一驚﹕「吓? 咁佢咪會知道個窿嘅存在囉！你想拜託佢做啲咩呀? 我做唔得㗎? 」
其實我也有考慮過會將洞孔曝光這個問題，不過只要向她提起Carmen的事，她大概沒有空理會其他事情吧。
「我諗...應該唔會有問題嘅......我係想佢幫我開解我呢邊嘅阿靜，所以一定要佢上嚟見到個窿，我再親口拜託佢。」
她的聲音有點猶豫﹕「咁你係咪會話佢知佢就快會死呀? 咁佢聽完......」
我連忙道﹕「其實我都想趁機講佢知呢件事。佢咁錫阿靜，我希望話咗比佢知之後佢會無事，咁小Carmen就唔會無咗個家姐啦。」
「我只係擔心佢知道自己就嚟死之後唔知會點咋。」
「其實我已經大概知道佢係點死，我到時會提一提佢，希望可以幫佢過到呢關啦。」
死妹釘喜道﹕「真嘅? 咁即係阿靜唔會無咗個家姐啦！」
「希望係咁啦。」我沒見過芯姐本人，也不知道她的性格如何。不過若果她真的很疼愛Carmen的話，經我提點之後應該不會再去輕生的了。
我之後提醒死妹釘要約在晚上八時快要到九時的時間，讓她可以看見洞出現的那一刻，那她就更容易相信我是未來的人了。當然我也準備了一些證據，雖然不多，但希望她會相信我吧。