《唔係啩！我間房幅牆有個窿》: Chapter 14

「下個星期見啦，拜拜。」

「下次見，拜拜。」我跟敏儀揮手道別後，走過去Carmen那邊。

Carmen正叮囑楊伯母要怎樣怎樣，令楊伯母露出不耐煩的樣子。

楊伯母看見了我，馬上嚷道﹕「靚仔你快啲過嚟拉走佢啦，佢真係煩到老人院都唔收佢喇。」

「媽！」



我笑道﹕「係囉，伯母咁醒你唔駛咁擔心喎。」

Carmen依依不捨的﹕「......咁...我下個禮拜再嚟探你啦......拜拜......」

楊伯母推著我倆向門口﹕「走！走！走！咪阻住我睇電視，我要去追電視劇呀！」

我們帶點無奈的離開後，我趁機道﹕「你一陣有無嘢做呀? 不如一齊食飯吖。」

Carmen微笑點點頭﹕「嗯。」
 




當我們離開安老院時，正好碰到水靈在門外。她剛談完電話，看見了我們就迎了上來。

「阿靜，我同男朋友去食飯呀，你都一齊吖。」

「吓? ......咁會唔會阻住你哋撐枱腳呀? ...而且......」Carmen有點為難的看了我一眼。

她的表情是因為剛才答應了我所以不好意思現在又丟下我嗎? 雖然覺得很可惜，不過我也不想她難做。



於是我向Carmen道﹕「其實唔緊要，你......」我還沒有說完，水靈就拍一下手道﹕「你哋約咗去食飯? 咁不如都一齊啦！多啲人食開心啲嘛！」

雖然我不太想看到她和未婚夫甜甜蜜蜜的樣子，不過我也想多了解她和Carmen的關係，而且這次有Carmen作伴，我倒是沒所謂的。

於是我聳聳肩道﹕「好呀，我無所謂呀。」然後望向Carmen。

她「嗯」一聲然後略點一下頭。

水靈挽著Carmen的手臂，喜道﹕「咁行喇，餐廳喺前面過兩個街口就到啦。」

沿途我跟水靈聊著在安老院做義工的趣事，Carmen則只是靜靜聽著我倆的對話。

不記得說起甚麼，我惹得水靈格格嬌笑﹕「Raymond你都幾搞笑個喎！」這個水靈的性格跟我認識的還真是一模一樣。

一路說說笑笑，很快就到了水靈說的餐廳。



才剛走進去，就看到水靈的未婚夫跟我們揚手示意，水靈馬上笑意盈盈的迎上去。

我和Carmen坐在他們的對面，水靈向她未婚夫介紹﹕「Carmen你識啦，呢位係佢朋友Raymond，咁啱佢都喺老人院做義工。」然後轉個頭向我道﹕「我男朋友Ron。」

Ron微笑的向我伸出手﹕「Hello，我叫Ron呀。」

我連忙跟他握了一下手並寒暄一下，然後Ron就向水靈笑道﹕「乜我剩係男朋友咋咩? 明明我就係未婚夫。」

不用那麼肉麻吧? 這裏還有兩個外人在呢！

心裏雖然感到有些不自在，但我還是不動聲色的恭喜他們﹕「原來你哋就結婚喇? 恭喜哂！恭喜哂！」

水靈滿臉通紅，拍了Ron一下﹕「有人喺度㗎！」



我口不對心的搖手道﹕「唔緊要唔緊要，我同Carmen咩都睇唔到，咩都聽唔到，呵~」然後用手肘輕輕撞了Carmen手臂一下。

Carmen輕笑了一下並微微點一下頭。

水靈見狀嗔道﹕「連阿靜你都笑我！」然後鼓起腮不理我們逕自看餐牌。

食物來了後，水靈秉承相機先吃的傳統，拍了好幾張照片，然後又要求我幫她和Ron拍照。我亦趁機要她幫我和Carmen拍照，而我亦藉著傳送照片成功拿到Carmen的電話號碼。

整頓晚飯都在愉快歡笑聲中渡過。雖然我還是很看不慣水靈和Ron很恩愛的樣子，不過我見水靈很幸福的模樣，倒也替她感到高興。

晚飯過後，Ron送水靈回家，而我和Carmen則一同離去。
 


在回家的路上，我問Carmen有關她和水靈的事。



「係呢，你識咗水靈好耐喇? 」

「嗯......如果剩係計識嘅話就真係好耐，不過我同佢係呢幾年先開始熟。」

「點解咁講嘅? 」

「佢咪係我中學嘅師姐嘅，咁我識佢嗰陣係中一。嗰陣學校有個前輩後輩計劃，係比啲高年級教低年級溫書做功課。咁靈姐姐就係教我嗰個師姐囉。」她頓了頓﹕「咁其實中學嗰陣我同佢都唔係好熟，只係撞到會打個招呼咁。咁之後到佢畢業就無再見過佢，直到幾年前我去探媽媽時先撞返佢，原來佢喺嗰度做義工，咁咪聯絡返囉。」

「哦，原來係咁，過咗咁多年佢都認得你嘅? 」

「佢話我個樣無乜點變喎......」

我笑道﹕「哈！乜原來你細個嗰陣都同而家一樣咁靚㗎? 」



Carmen俏臉一紅，低下頭沒有作聲，氣氛開始變得有點尷尬。

還好我們已經回到家門口，Carmen掏出鑰匙並打開了門，轉頭跟我道﹕「...晚安......」

「晚安......」我有點不捨得，但她最後還是關上了門。