《唔係啩！我間房幅牆有個窿》: Chapter 07
難道真的是隨機出現的?
星期六晚上十一時，跟朋友聚會完畢後，我撐著雨傘回家，一路上思考著這個問題。
打開家門時，一身制服的Carmen正好從升降機裏走出來。
「嗨，你咁夜先放工? 」我明知故問。
「嗯。」她還是一貫的冷漠。
「晚安。」說完我就走進家裏，並關上了門。
這幾天偶爾會碰到Carmen，但因為被牆壁的事困擾著，我只是禮貌的打招呼，再沒有甚麼進一步行動，而她也只是一直冷漠的回應我。
而且我也懷疑水靈的房間根本就不是在Carmen的家裏，所以水靈說不知道Carmen是誰，而Carmen也說她是獨居的。
在我弄清楚之前，還是跟Carmen維持普通鄰居的關係吧。
我洗完澡後，正想按照計劃睡覺，才走進房間，發現那個洞又再出現了！
我興奮莫名，馬上拿起電話錄影，又記錄現在的時間。
00:16
我洗澡前並沒有看到有洞，那大概是半小時前，那麼它是半夜十二時後才會出現嗎?
我馬上記下這個重要線索，然後馬上湊到洞口窺看。
水靈正背對著我在書桌上用功，大概是做功課吧?
「喂！水靈！」我對著洞口呼喊，又將眼睛重新蓋著洞口。
我看到她好像嚇了一跳，然後有點猶豫的轉身望向我。
我續道﹕「喂！係我呀！」
她退後了一步，背脊緊貼著身後的牆壁，表情帶點不安和驚恐﹕「你...你究竟係乜嘢? ......你係鬼? 定係外星人? ......」
嗯? 難道她跟我的情況一樣，也發現洞口消失了? 也難怪她這麼害怕，她也只是一個普通少女。若不是我喜歡這些古怪東西，大概我會嚇得搬走吧！
「你唔駛驚喎，我緊係人啦，你有見過鬼同外星人會同你吹水咩? 」我嘗試安撫著她。
她的樣子放鬆了一點，但還是緊貼著背後的牆壁，一聲不響的盯著我。
我馬上解釋我的情況跟她一樣﹕「你係咪都發現個窿唔見咗呀? 我都係呀。我呢幾日都諗緊點樣先可以令到個窿再出現。」
水靈的表情有點驚訝﹕「乜...乜你都係咁呀? 」
她好像已經放下戒心，坐到椅子上了。
「係呀，我都唔知點解個窿會突然出現同消失。同埋我諗緊我同你究竟係咪真係住喺隔離。」
她的樣子有些困惑﹕「我唔係好明你咩意思......」
我解釋道﹕「上個星期五晚...即係星期六凌晨，我同你第一次傾偈嗰陣，咪同你提過一個叫Carmen嘅女仔嘅。」
她點了點頭﹕「係吖，你仲話佢係我家姐添，之後又無嗱嗱問我阿媽姓咩，我以為你痴線咋。」她頓了頓又道﹕「喂等等先，嗰晚係星期日晚喎，咩星期六凌晨呀? 嗰陣夜晚九點幾咋嘛。」
甚麼? 難道除了空間錯亂，連時間也是這樣嗎?
想到這裏我不禁十分興奮，但還是逐個問題解決吧。
「唔好理星期幾住先。」我吞了一下口水，又道﹕「其實我隔離真係住咗一個叫Carmen嘅空姐，所以我先以為你同佢一齊住。仲有你嗰陣咪走嚟撳我門鐘但係我無應門嘅? 我第二朝試過撳，我個門鐘都無壞，所以我諗你撳嗰個根本就唔係我個門鐘......係呢，你第二朝有無去搵我呀? 」
她搖了搖頭﹕「我第二朝一早見到個窿無咗，以為之前嗰晚發夢咋......」她說完馬上捏了自己的手臂一下，然後道﹕「真係痛喎！咁我而家即係唔係發夢? 」
我笑道﹕「緊係唔係啦，我第一次見到個窿消失之後都好似你咁諗，咁上次見到個窿再出現就即刻拍低咗，咪即係上次比你睇嗰段片呀，咁第二朝我見到個窿唔見......」
我還沒有說完，她就驚呼了一聲﹕「啊！原來你先係第一個發現個窿，你仲屈我偷窺你先? 」
糟了！一不小心就說了出來。
我老臉一紅，還好她看不到我的表情。
我掩飾道﹕「我第一次見到個窿以為係裝修師傅整得唔好，所以都無理佢。我係第二次先裝過咋。」
她「哼」了一聲﹕「鬼先信你呀，我而家就報警。」
我倒也不會被她嚇唬到，懶洋洋道﹕「你咪報囉，而家都唔知個窿幾時又消失，到時差人嚟到但個窿又唔見咗我睇吓你點解釋。因住比人話你報假案拉返差館呀。」
她被我氣得七竅生煙，氣鼓鼓的脹紅了臉，模樣十分可愛。
她憤怒的走到洞邊來，對著我咆哮﹕「你個死人變態咸濕佬呀！信唔信我搵筷子篤盲你隻眼呀喇！」
我馬上將眼睛移離洞口，倚著牆壁道﹕「信呀，你千祈唔好咁做呀！」
「哼！」
還是不要跟她鬧著玩了，先弄清楚發生甚麼事吧。
「喂！其實你住邊度㗎? 」我想先弄清楚空間錯亂的事情。
「我住邊關你咩事呀！死人變態佬！」看來她還是很生氣。
憤怒中的少女真的不可理喻，我解釋道﹕「我都係想搞清楚個窿係咩事啫，你都想知㗎? 」
她的語氣平靜了一點﹕「咁同我住邊有咩關係啫? 」
「我想知道我同你係咪真係處於唔同嘅空間呀。而家我隔離屋好明顯就唔係你屋企，而你嘅情況都應該一樣。」
「我...我住九龍灣呀。」
果然如此！這個奇怪的洞將我和她的空間連接了！
水靈續問﹕「喂...咁你又住邊呀? 」
「我? 大角咀。」
她驚叫起來﹕「吓? ！咁呢個窿咪好似隨意門咁? 如果挖大啲我係咪可以一秒鐘由九龍灣去到大角咀呀? 」
小孩子即是小孩子，想出來的東西也是這麼孩子氣的。
「理論上就係，不過你唔好亂試呀，一陣你啱啱穿過個窿嗰刻個窿就消失咗都唔知會點。」
「唓！講吓咋嘛，個窿咁細手指都未必塞得入啦。」
「總之搞清楚個窿之前，你連手指都唔好塞入去啦。」
「係啦，煩！成個阿叔咁！」她又道﹕「不過睇你個樣都唔方後生得去邊啦，嗌你阿叔都無錯。」
我忍不住道﹕「我都係大你12 年啫，邊忽似阿叔呀? 」
她「咭」的一聲笑了出來﹕「大我12年仲唔係阿叔呀? 差唔多30囉喎。」
我沒好氣﹕「我都費事同啲小妹妹嗌交，一陣比人聽到以為我咁小氣。」
她的語氣激動起來﹕「你先係小妹妹呀！大叔！」
她的那個「大叔」真的很礙耳，我警告她﹕「唔好再叫我大叔啦，死妹釘！」
她不服氣﹕「你夠叫我小妹妹、死妹釘咯！大叔大叔大叔大叔......」
我不甘示弱﹕「死妹釘死妹釘死妹釘死妹釘......」
我們「死妹釘」「大叔」了好一會兒，忍不住一起笑了出來。
我喘了一口氣，笑道﹕「喂死妹釘！我叫你做水靈啦好唔好? 」
她也是喘著氣笑道﹕「咁我叫返你做Raymond啦，大叔。」
稍為喘息了片刻，我想繼續弄清楚這個洞出現的原因﹕「死......水靈，呢兩次個窿出現之前你做過啲咩? 」差點稱她作「死妹釘」了。
「做咩咁問呀大......Raymond? 」看來她跟我也差不多。
我笑了出來﹕「唉你想嗌大叔就嗌啦，費事你谷到生cancer。」
水靈笑道﹕「你話㗎，大叔！」
我搖搖頭苦笑﹕「係啦係啦，唔駛專登嗌得咁大聲㗎。」
水靈聞言格格嬌笑起來。
「喂唔好掛住笑，你答咗我個問題先啦。」
她沉默了一會兒，然後道﹕「嗯......第一次係上星期日晚，咁我食完飯沖完涼就返入房睇碟，睇睇吓想去張床攞個枕頭，然後就見到個窿喇。咁第二次就係頭先，我食完飯就返入房溫書，突然間就聽到你嗌我喇。」
做的事情沒有甚麼特別，跟我唯一的共通點就是晚上。但為何之後那幾晚這個洞沒有再出現呢?
我想了想，問道﹕「你星期日晚係幾點發現個窿㗎? 」
「嗯......我10點幾沖涼，嗰日沖完涼就睇碟，睇到套戲差唔多完......嗯...我諗差唔多12點啩。」
那天我是凌晨三時左右發現的，那麼除了日子外，連時間也跟她不同吧。
「而家幾點呀? 」
「吓? ......差唔多10點囉。」
我現在差不多凌晨一時，那麼我的時間比她快了三個小時吧。
她突然驚叫起來﹕「嘩你等等先，出面撇雨呀！我去閂窗先。」
對了！除了時間這個因素，可能天氣也有關係。
我馬上走到窗外觀察一下，外面正下著大雨。
我坐回床上，回想一下前兩次的天氣狀況，好像也是下雨天來的。
我感到水靈回來了，於是我問﹕「你記唔記得上一次係咪都係落雨呀? 」
「嗯......好似唔係喎......」
如果下雨是其中一個因素的話，是其中一方下雨就可以嗎?
「我而家估計個窿嘅出現時間應該係夜晚，至於幾點先至出現就仲未知。而且可能會有其他因素，包括我哋之前做過啲咩，又或者係天氣，所以你要留意下個窿出現同消失嗰陣個天氣係點。」
天氣的因素要待孔洞出現或消失才能再作證實，這個唯有先擱在一旁吧。
「哦......知道啦...」她頓了頓，突然道﹕「你嗰次又話借你個電話比我睇嘅? 快啲攞嚟啦！」
我沒好氣﹕「而家點攞比你呀? 個窿咁細，你要我鑽牆咩? 」
「我哋聽日約個時間出嚟咪得囉！」
看來她還不知道我們處於不同的時間線上，於是我道﹕「睇嚟你唔知我同你唔喺同一個時區喎。」
她奇道﹕「咩呀? 九龍灣同大角咀都分時區? 」
我解釋道﹕「我唔係呢個意思......你而家差唔多10點嘛，其實我呢邊差唔多凌晨一點啦。」
她愕然道﹕「吓? 連時間都唔一樣? 」
「其實唔止時間，連日子都唔一樣。我而家係星期五嘅凌晨一點，你係咪星期六晚? 」
「係呀係呀！咁點算呀? 你點借部電話比我呀? 」
這個水靈，就只顧著玩電話，真服了她......
咦? 等一下，難道......
我的語氣變得很急促﹕「今日係幾年幾月幾日呀? 」
「吓? 2003年3月1日囉，做咩咁問? 」
我的天！她比我慢了足足十二年！難怪她還在用Nokia啦！
我的聲音有點顫抖﹕「你...你知唔知我嘅『今日』係2015年3月1日呀? 」
「吓? 你講笑咋? 」
「你覺得我手上部電話真係你個年代會有咩? 定係你覺得我係James Bond所以有啲咁嘅高科技喺手? 」
「嗯......雖然你係咁講啫，但成件事太科幻啦，好難令人信囉。」
「妖！我呃你有獎咩? 而且個窿時有時無都夠哂科幻啦！」
她靜默起來沒有說話。
大概她還在思考這件事的可信程度吧。的確，除了手上的生果電話和時有時無的孔洞外，我也拿不出甚麼證據證明我說的話。
啊！對了！她身處2003年3月，那時候的香港......
「喂水靈，你嗰邊新聞開始報導沙士未? 」我邊跟她說話邊在維基查看SARS的資料。
她不解﹕「咩沙士呀? 」
大概三月初還未有「沙士」這個稱呼吧?
我換了一種說法﹕「一種傳染病，叫非典型肺炎，英文係S．A．R．S，SARS。」
「唔知係咪你講呢個，不過新聞好似有講過吓喺大陸有傳染病，仲話啲人係咁搶醋同板藍根，好鬼搞笑，做咩呀? 」
「呢個病喺2003年搞到香港變咗疫埠，死咗幾百人又衰足幾年。你咪話你住九龍灣嘅，你呢幾個月千祈唔好去淘大，嗰度3月尾會爆發疫症，成棟E座嘅人都要被隔離。」
「唔係啩? 真係㗎? 咁大鑊? 我...我有同學住淘大E座喎......」她的聲音變得很擔憂。
「都係嗰句﹕我呃你有獎咩? 3月10日電視會報導沙田威爾斯親王醫院10幾個醫護人員感染症狀，跟住3月15日世衞就會將呢個傳染病命名做SARS。」
她有點不知所措﹕「咁...咁點算呀? 」
我嘆了口氣﹕「無得點算啦，呢個病暫時無得醫，好返都會有後遺症，你出街記住戴口罩啦......」
「咁...咁我點同我住淘大個同學講呀? 唔通話我識預知未來咩? 」
「嗯......你咪話有個表哥做醫生，話你知呢個傳染病好勁，應該好快會傳到落香港，叫佢哋盡量小心啲衞生呀，出街記得戴口罩呀咁囉。同埋你話埋淘大係高危區，可以嘅話就搬去第二度先啦。」
我等了好一會兒也聽不到她的回覆，以為她聽不到我的說話，於是想轉個身對著洞口說話。
Shit！不見了！那個洞消失了！
我嘗試作垂死掙扎，拍著牆身並大聲呼喊﹕「水靈！水靈！聽唔聽到呀? 」
「樓下痴線㗎！三更半夜嗌乜春呀！」
糟了！我忘了現在已經差不多凌晨二時。
我立時禁聲。
希望Carmen沒有聽到我的呼喊吧......
我走到窗前，外面的雨停了。看來真的跟下雨有關。下一次一定要問一下水靈她的情況。
我回到床上，等了好一會兒也沒等到洞再次出現，等著等著我就睡著了......