[定時更新 - 記得追稿啊] 《弼街以南》: 死肥仔
「下一站，天后。Next station, Tin Hau…」
和阿敏相識了一星期，正希終於鼓起勇氣與她約會。雖然他一直對阿敏堅持要在「弼街以南」相約這要求摸不著頭腦，但也沒有打算探究為何。這夜，阿敏提議在天后和炮台山之間的一間甜品店見面。
「喂，早到啊你！」穿著短裙的阿敏雀躍地說道。
還帶著領帶的正希比預約時間早了五分鍾，想不到阿敏已經在甜品店門口等他。
「Sorry啊，公司應酬搞晏左。」
他們剛坐下，侍應就坐過來，問：「食咩？」
阿敏對這位「阿嬸」服務員的口吻不悅。
「啱啱坐底咋喎我地… 你D服務態度可唔可以好少少？」
阿希抬頭望見這位阿嬸眼神，好像想吃掉阿敏一樣，於是連聲道歉。
「唔好意思、唔好意思。我地好快揀好，或者你轉頭過來啊？好無？」
待「阿嬸」無聲仿有聲地華麗轉身之後，阿敏連忙怒視著正希。
「做咩啫你？而家你serve佢定佢serve你啊？」
「唔好咁啦，一人讓一步啫。」
「咁係啊嘛！而家我來食甜品架嘛，做咩要受D咁既氣先？！」
阿敏提高了聲線，務要遠方的「阿嬸」也感受到她的怨氣。坐在旁邊的客人也隨即把目光轉過來阿敏和正希這邊。
正希尷尬得臉到紅脹了，急道：「好啦好啦，唔好咁啦。今晚我請啦！」
「哈，你請就梗架啦！傻佬！」
阿敏笑了笑，輕輕地拍打了正希的頭一下。當正希以為雨過天晴的時候，阿敏剛好想到要點甚麼吃。
「喂！阿嬸！返來啊喂！諗到食咩啦！」
甜品店內一眾客人的目光再次落在正希和阿敏身上。無地自容的正希把頭埋在雙手上，完美地表現何謂「無面」見人。
說時遲那時快，剛剛才嚷著說甜品來得太慢的阿敏已經把面前的「海底撈野」吃了一半。正希也不甘落後，吃了大半碗茫果西米露。不過路遙知馬力，阿敏吃完一碗之後已經撐到不行，正希吃畢西米露後仍意猶未盡，再吃碗涼粉才罷休。
「喂，仲要唔要？」正希抹去嘴角的涼粉，緩緩的問道。
「唔係下化？你仲唔夠啊？我怕你再食既話我要抬你返屋企喎。」
「好啦好啦，唔叫啦。費事第一次約你出街就嚇親你。」
「係囉，你系其他女仔面前都係咁架？」
「唔係喎。不過可能上次飲茶見你好大胃口，所以諗你都唔會介意咁啦。」
「我同你係有分別架。我呢D人係食極都唔肥。你就…. 哈哈！」
「笑咩呢你？」
正希喝了口珍珠奶茶，語氣帶點不耐煩。其實，他只是微胖，臉上長多點兒肉而已。但也不太喜歡其他人取笑他的身形、沒有六塊腹肌之類的說話。尤其是女生。
「笑你肥囉。我怕你再食真係行唔出呢個門口啊。」
「咁…」正希吮著吸管，低頭看著杯內的珍珠，小聲說：「你mind唔mind？」
「mind咩啊？」
「我肥囉。」
「嘻嘻，同得你出來，你話呢？」阿敏皮膚微熱，令黝黑的臉蛋顯得架外可愛。
「不過真係唔好食咁多啦… 下次同我出來既時候。」
正希也笑了笑，領會到阿敏對他的確甚有興趣，而且對此非常坦白。說著，二人埋了單，在附近的街道散步。
正希點起了煙，深深地吸了一口，然後輕輕地呼出。煙在泛黃的街燈下彌漫。
「食煙唔係會瘦既咩？點解你唔瘦既？」
「點知啫。」
「哎，唔好講呢D。不如，講下你點解會約我出來先啦。」
阿敏笑得燦爛，挽著正希的手臂。
「點解啫？講啦，唔好怕醜啦。」
正希心裡驚喜，但仍故作鎮定的，語調帶點反諷。
「啊，你份人都真係幾直接架喎。」
「ok直接架。」
正希弄熄了煙頭，昂首望著夜空。香港高樓大廈林立，根本看不見天上的星星。
「喂，唔好系度發夢啦，死肥仔。」
「唉！」正希慨嘆一聲，低下頭來，哼著陳奕迅和苦榮合唱的那首《孤兒仔》：「誰人會愛我這種死肥仔，流落到谷底。」
「首歌唔係咁唱架，仆街！」
「啊，睇唔出你女仔人家都幾多粗口架喎。」
「關你撚事咩。」
正希和阿敏一邊談話一路走著，但二人各自有點心不在焉。正希一直因為自己「死肥仔」的稱號而鬱悶，而阿敏則因為正希「正肥仔」這個現實而懊惱。她不要求自己的伴侶身型魁梧，也知道以自己沒有條件渴望這樣的伴侶。不過，正希真的比她理想情人的身形胖一點點。雖說無傷大雅，但不知怎地這點胖就是那麼的礙眼。
「喂，我到屋企樓下啦。」
「吓？你住呢頭既咩？」
「係啊。唔記得話你知。Sor! Bye!」
阿敏想要賣個萌，繼而轉身離開。正希可沒有這樣容易讓她離去。
「喂、喂！」
正希捉住阿敏的手，把她拉到自己懷裡。
「姚生，估唔到你外表斯文，內裡都幾open架喎？」
「哦，你唔open？」
阿敏害羞地笑了一下，把被風吹歪的髮端撥到她小小的耳朵後面，順勢迴避了正希的眼神。
「咁，下次…即係幾時啫？」
「呢D野梗係你決定架啦。」
「呃，聽晚好唔好？」
「聽晚要食安娜餐生日飯啊！」
「邊個安娜啊？」
「上個禮拜飲茶呢，坐啊邊個隔離個個呢。」
當正希還一片莫名奇妙，阿敏突然靈機一觸。
「喂，一齊來啦！」
「但係我都唔識佢…」
「係咁話啦下！」
阿敏說著輕輕親了正希的面頰一下。正希被突如其來的親吻打亂了陣腳，尤如觸電一樣，一時三刻不懂反應。阿敏乘機掙脫了他的懷抱，往她住的大廈奔馳。
呆在原地的正希回過神來，不忘揶揄一下阿敏。
「喂！跑咁快因住仆街啊！」
「收皮啦，死肥仔！」
阿敏沒有回頭。她不想要被正希看到自己臉上的笑容，一個比剛剛那碗芒果西米露更甜的笑容。正希看著阿敏輕盈的步姿，既窩心也妒嫉。窩心，因為阿敏真的是個討人喜愛的女孩。妒嫉，因為正希好久都沒有感受到那種跑步的輕快。
正希記清楚了阿敏所住的地點，踱了一會步，自言自語。
「嗯，聽日減肥。就聽日開始，去gym。」
這句話，他說了至少八年。