[有沙入眼]是咁的，我嘅職業係幫想自殺嘅人寫遺書: 308.憑咩自殺

我拎出有寫字嘅遺書，喺阿dick面前搖一搖：「呢封先係真嘅。自首啦。」

「我唔知你講咩喎。」

「你強姦嗰個社工，係我朋友。」

阿dick皺一皺眉：「咁點呀？」

我捽一捽因為怪味而唔舒服嘅鼻：「所以你已經無資格自殺。」





「你又話想了解我，了解左啦，咁你都唔明白咩？」我嘅說話好似激起阿dick把火：「一直以黎我都只係想要人理解同關心，我搵倒喇，嗰個係阿文呀！所以我先想得倒佢炸！」

阿文嘅聲音喺我耳邊徘徊

我會做得更加好

就算我改變唔倒咩野，我都希望比倒我嘅關懷佢地

就算解決唔倒問題，就算全世界都離佢地而去，我都要陪住佢地





「我想以後都淨係同阿文搞野！我愛佢呀！佢係第一個話想了解我嘅女人呀！點解你要話我強姦？我同我愛嘅女人搞野關你撚事呀？」

起身，慢慢行近

砰！

阿dick翻身跌落地，我即刻騎上佢個身，膝頭壓住佢兩隻手

阿文只係個用錯輔導方法嘅社工，咁多年嘅輔導或者真係令佢迷失左初心





但係經過希仔件事之後，阿文終於開始有自覺

「偏偏佢終於唔再麻木嘅時候，就遇上你依種人！」

右拳直擊左面，臼齒連血飛出黎

「你無資格死！憑咩自殺！」

左拳打落右面，拳頭傳黎骨頭撞擊嘅觸感

咚

背脊傳出悶響，阿dick起腳用膝頭踢落我度

「嗰隻狗公屌阿糖就得，我屌阿文就唔得？！點解每次錯嗰個都係我！點解我每一次都要自己承受痛苦呀！」





咚咚咚

我騎住佢嘅力度減弱，阿dick收翻比我用膝頭壓住嘅手，推開我