[有沙入眼]是咁的，我嘅職業係幫想自殺嘅人寫遺書: 219.白彩虹

miki尖叫完跳翻過黎摟住我，幾隻受驚嘅奇怪飛蟲四散飛走

「嚇撚死我喇！係咪你特登整古我架？」

「我邊有咁得閒呀，去抹啦，飛走哂喇。」

「我唔信！仲有點算？我差啲嚇到標尿呀！」

我無佢咁好氣，拉住佢行近翻個靈位





「拿，無蟲喇。」

「咁你抹啦，都行到過黎。」

我捉住佢隻拎住濕紙巾嘅手，直接喺靈位上面抹左一下

答，答答

捉住miki隻手嘅手背，一滴，兩滴，好似就黎落雨咁嘅水滴，但唔係雨





溫熱嘅淚珠，滴喺我手背上面

灰塵滿佈嘅靈位，經過我地一抹，出現左一道潔白嘅弧形

就好似陰暗嘅天空之中，一道純白嘅彩虹

彩虹嘅中央，係重見天日嘅一張黑白相

一個帶有成熟氣息，好似miki嘅女人，喺相入面微笑，角度正正望住我身邊嘅miki





「媽⋯⋯咪⋯⋯呢個係我媽咪⋯⋯」

拉miki黎，係啱嘅

無錯，係你親生媽媽