【猴年血腥】《拜完年，我畀狗咬死左》: 6. 完美的人生 (2)

「你唔係想做件咩大事啊？」恭子逞擔心起來，「年輕人，提醒你一句——」
 
「平凡是福啊。」
 
「你知唔知能夠簡單咁生活，已經係一件好幸福既事？」
 
「幾多人恨都恨唔到，可以中產家庭出生，幾多人恨都恨唔到可以去見識外國既校園生活。」
 
「身在福中不知福，你有冇聽過？」他苦口婆心地說。
 




「我明你既意思……」我垂頭喪氣。
 
「你唔明。你知唔知，要成為一個偉人，需要付出比常人多幾多倍既努力？需要捱多幾多倍既苦？」
 
我無言以對，又再捉緊生命靈體。
 
漣漪一波一波泛起……
 
畫面再次上映，我又看了一遍，接著又是一遍。
 




「白無常先生，哩啲畫面，係咪一定都會發生？」我問。
 
「9成機會，畢竟未來係存在變數。」
 
「咁冇播出黎既部分呢？」我問。
 
「嗰啲，人可以自由發揮，係比較彈性既位置。」恭子逞答。
 
「要知道，正因為唔係定死晒。人會有好多自主作決定既時候，所以死後先至會有審判。」
 




「善與惡，僅在一念之差。所以，就算抽到善良既命，例如你捉住哩條，都唔好亂黎啊。」
 
聽完他的話，我又在苦惱，又看了池水一遍。
 
「咁如果我加強佢某項能力呢？」我再問，「咁畫面呈現既事，仲會唔會發生？」
 
「你問得好，咁既話，變數就真係超大喇。以第二世既你為例，就已經由普通棋士，變成棋聖啦。」恭子逞答。
 
「但係，哩啲都係要付出沉重既功德作為代價，而且，當人有左自己無法駕馭既能力，好容易會行差踏錯，成為大惡人，結果得不嘗失。」
 
「計我話，你只係差一世，一世咋，就可以做神仙喇。」他亮眼堅持，手舞動起來，「有仙氣飄下飄下，行起路既時候，有啲氣揚下揚下，你知唔知幾型啊？超型囉。」
 
我望著他，又望向水面的20歲男生。
 
男生再一次挺身而出，然後中槍身亡。




 
「老老實實，你到底……諗緊咩？」他有點惆悵，右手手指在石桶邊點來點去。
 
「我好認真咁考慮緊哩條命。」我左手托頭，手肘放石桶邊，看著水中映像。
 
「當然，如果你嫌悶，可以揀左佢先，再用功德加強某項才華，令佢既遭遇出現變化。」他說，「不過，我既建議梗係唔好搞咁多野啦。」
 
「唔係嫌悶，我係覺得……好多位，佢唔夠Man啫，硬係差緊啲霸氣咁囉。例如，佢中槍，可唔可以中得型啲，撳住傷口慢慢咁跌低，而唔咪……你睇下佢，叫到劏豬咁！」
 
說完，我望向恭子逞。
 
只見他目瞪口呆地看著我，「唔通，你……」
 
「白無常？」我喚他。
 




「唔通你想加佢霸氣？」他驚問。