【猴年血腥】《拜完年，我畀狗咬死左》: 6. 完美的人生

06. 完美的人生
 
 
我拉起手袖，把右手浸入水中，去捉拿生命靈體。       
 
沒想到，水是暖洋洋的。
 
 
「前世因，今世果。」恭子逞說，「系統匹配比你既命，係同你依加哩世有關。」
 




「六道輪迴，分為天道、阿修羅道、人間道、畜生道、餓鬼道、地獄道。」
 
「只要你哩世唔係大惡人，系統基本上都係會匹配返人間道比你，等你再次做人。」
 
「如果我係小惡人呢？」我問。
 
手抓不到生命靈體，牠不斷逃走。
 
「咁就可能會比畜生道你，罰你做一世畜生；或者做一世餓鬼，係人間流連幾十年，藉受苦以彌補罪過。」
 




「地獄道，就係落地獄。」我還未問，他已經答。
 
「所以，我依加要捉既，係人道既命？」我確認一下。
 
「係。」他答。
 
生命靈體在游逃，但還是被我抓住！
 
——手感軟滑，很容易就會滑走。
 




「跟住點？」我抓緊問。
 
「耐心等候。」恭子逞說。
 
慢慢地，生命靈體中的命根，與我的魂魄產生某種共嗚。
 
以致命根在生命靈體體內發光，並把映像擴散到水面。
 
漣漪一波一波……
 
浮現了一張小男孩的臉。
 
 
在這一條命裡，你將生於小康之家，屬中產家庭的獨生子。小時候受到父母栽培，入讀名校小學。
 




中學時，轉入就近的Band 2學校。由於學習基礎良好，在Band 2學校裡可以輕鬆學習。
 
也有很多自由參與活動的時間，閒時參加多項善舉活動，熱心助人。
 
另外，你將擁有不錯的交際能力，能夠得到身邊朋友的信任。
 
一生中，多次勸導朋友少吸煙，多次阻止朋友誤入歧途，多次安慰需要心靈慰藉的人，是人人公認的、有義氣的良朋益友。
 
中學畢業後，到美國升讀大學。
 
20歲，在校園槍擊事件中，因挺身保護同學而遭槍殺。
 
 
漣漪在死亡的畫面播放後，漸漸回復平靜，池水回復淡藍。
 




我鬆開了生命靈體，還牠自由。
 
「就咁？」我問。
 
「一條非常之好既命！」恭子逞雀躍起來，「你聽我講。」
 
「一，出身。係中產家庭，唔洗為金錢擔憂，免除好多煩惱。」
 
「二，性格。善良，鍾意幫助人，可以累積好多功德分，確保達到十萬分。」
 
「三，遭遇。先係小學打好基礎，之後去中學Band 2中學輕鬆讀，其餘時間可以玩盡佢。」
 
「仲可以去美國讀書，幾多香港人想去外國生活，但都冇咁既機會。依加有鬼妹做你同學，應該開心啦。」
 
 




但是，我看著這個安排好的道路，沒有很大的好感。
 
「又係美國……」我輕聲說。
 
「方大琪就係去左美國，先至……」
 
 
「點同呢，佢家庭環境複雜，但你唔係啊，哩條命好過佢好多架。」恭子逞強調。
 
「喂你要記住，最後一世要安安穩穩啊。二十歲死係好年輕，但年輕既優勢係，可以犯錯。」
 
「年輕因為唔成熟，所以就算真係做錯咩事，都只會扣好少功德分。」
 
「而且，人生最開心係頭二十年是常識吧。」
 




「二十歲後要面對工作、面對社會壓力、家庭壓力，生活會慢慢變得枯燥乏味。」他說，又問，「廿六歲既你，應該已經體會緊啦。」
 
「三十之後，情況仲會惡化。」
 
「總之，哩條其實已經係一條好好既命，你如果想慳返啲功德、踏踏實實完成十世修為計劃既話，揀佢就實冇錯架喇。」
 
「年輕人，唔好諗咁多喇。」恭子逞再勸說。
 
 
我一直聽著，一直在思考。
 
安安穩穩、踏踏實實……
 
就這樣，順從一條已經安排好的路，真的就是……最好嗎？
 
「我一生入面，係唔同既時段，都比人問過一個問題。」我開始說話。
 
「如果你既生命，只係得返一日，你會做啲咩？」
 
「每次我聽到，都覺得好憂傷，因為想做既事，實在太多。愈諗，就愈覺得自己浪費左好多時間，唔知自己人生有咩意義，然後就好想捉緊之後既每一日，把握好每一口既呼吸。」
 
「而依加，如果我係千年輪迴入面，只係得返最後一世，只係得返最後二十年命既話……」
 
「我做一個咁既人，真係好咩？」我望向他。