《十年又過去，我對你仍耿耿於懷》: 14

「咁你呢，你想要咩類型嘅女仔呀？」 
「關你咩事呀？」 
「唓！幫你問下，留意下啫⋯⋯」 
「咁好死？」 
「驚你一直無拖拍會一直煩住我咋傻仔！」 
「咁唔講喇我。」我有一點賭氣說。 
「做乜呀⋯⋯」 
「無呀⋯⋯」 

大家突然又默不作聲。 





從來亦無自信　人云亦云 
庸庸碌碌半生　連自己的戀愛運 
也欠一點決心 
為何望來望去　仍無下文 
明明彼此有同感　難道等一天變做熟人 
發現原來相襯 
電台剛好播著《刻不容緩》，我現在回想，原來二〇〇五年的樂壇，原來真的出現了很多回憶。又者說，每一個人都有屬於自己的時代，而我的，剛好就是這一年。 

大家靜不了很久，突然，我跟她說：「林安琪，佢哋仲有無笑你呀？」 




「笑咩呀？」 
「我同你一齊嗰啲嘢囉⋯⋯」 
「吓？點解你會覺得係一種恥笑嚟㗎？」 




「嗯⋯⋯唔知呀。」 








「仲有講呀傻仔！」 
「咁你咪否認囉！」 
「唔喇⋯⋯唔否認喇！」 
「點解呀？」 
「因為，唔傳你，遲早會傳第二個。」她淡淡然說。 



「你咁講係咩意思呀？」