短篇散文集: 《阿娘，生日快樂》

話說今日我娘親生日，做仔嘅梗要同佢興祝啦。點知阿穎一大早打咗個電話嚟，嚇到仍然沉醉係夢鄉嘅我差啲仆咗落床。

「我今日要親自下廚，煮飯俾未來奶奶食！」阿穎把聲聽落好興奮，仲要唔似講笑……

仆街啦，你煮？你上次係我屋企個餐一周年嘅飯都攪到廚房好似經歷過二戰時期咁，今日又嚟？

「唔係咧，我呀娘生日，係都我煮啦，邊洗勞煩你呢！」我唔想屋企發生家居火燭，第二日A1報出嚟係因為煮食而起火咧……

「唔得！你成日都煮架啦，你呀娘生日梗係要特別啲架啦！唔洗講咁多啦，我煮！」阿穎堅定嘅決心，令我預感到我廚房又大禍臨頭……





「其實呢……你上次都攪成個廚房好似俾恐怖份子襲擊過咁，今次唔好啦……」雖然明知講完我會俾「恐怖份子」襲擊，但總好過全家葬身火海先丫……

「哼，你仲好講，上次唔係你阻住，我點會開火唔落油嚟燒鑊！」嘩，小姐，你幾時改咗姓賴架？

「嘩，賴小姐你好呀，我姓屈架，係屈原後人嚟嘅，叫屈原再屈呀！呢啲明顯係個人疏忽啦，你唔好話我企咗係到令你垂涎我美色，係要強吻我攪到煮唔成！」

「總之係你錯，唔理今次我一定成功架，不過為咗俾你將功補過，本小姐就批准你做我助手啦。」嘩，咁皇恩浩蕩……直接啲，你淆，要幫拖咪得囉！

「我阿媽同你有咩深仇大恨你要煮飯俾佢食咁冇陰公呀……」我仍然垂死掙扎緊…希望可以改變阿穎嘅一時衝動……





「你講多次！」阿穎又用個把平和得帶點恐怖嘅聲線嚟恐嚇…啊，唔係，嚟問我……

「我意思係話，我阿媽真係有福，可以食到你煮嘅嘢……」如果食完都冇食物中毒，咁就真係福如東海啦……我又錯啦，佢煮唔煮得成都係問題啦……

「咁好啦，我十二點左右嚟到，你要起身落嚟陪我買餸呀！」唉，我屋企嘅廚房睇怕都避唔過今次嘅戰亂……

俾阿穎咁嚇兩嚇，我已經瞓唔返，唯有起身等候死亡嘅來臨……

話咁快到咗十二點，真係準時過鬧鐘，阿穎即刻打俾我：





「落嚟啦，我到啦。」

我九秒九跳咗落樓……講笑啫，我即刻出門口……

落到去，就俾阿穎捉咗去街市。

「我哋要買排骨、免治豬肉、蕃茄、茄子……啊，仲有冇呢？啊，可樂！係呢，你屋企有蛋架可？」阿穎好認真咁係到數應該要買咩，而我……就好認真咁係到諗…一間唔洗我食我理得你買雪梨嚟炒蟹都唔關我事…講笑咩，我似咁衰架咩！

陪阿穎買齊哂呢堆嘢之後，我哋就向屋企（死亡）出發……

我為咗俾機會阿穎失敗再整多次，所以我每樣材料都係買多倍，夠偉大啦掛？！

為咗俾阿穎實驗，我哋一返上去就開始係廚房到進行比研究化武更危險嘅食物研究……

「噗，滋~」當我打開支可樂諗住拎嚟飲嘅時候俾阿靜阻止咗……





「你！要飲就飲水，支可樂我拎嚟蒸可樂排骨架！」本來蒸排骨係一件最安全嘅嘢，點解你又要危險化咗佢呀……咪住……聽講可樂排骨係要嚟炒唔係要嚟蒸架喎……

「咁…請問大小姐，你有咩需要我幫忙呢……」

「未有住，你就咁企係到得啦！」

我望住阿穎開蒸爐，之前佢竟然……將啲可樂倒咗入啲乜味都冇調，洗都冇洗嘅排骨到……仲夠膽死真係拎去蒸……我發誓，我一定唔會食！

「你……會唔會錯咗少少步驟呢……」我有少少膽怯咁問阿穎……

「點會呢，我話啱就啱啦！」唉，呀媽……祝你好運……

跟住落嚟個兩樣餸我都冇氣去形容……





茄子同免治豬肉再加埋啲魚香醬，我諗唔會想整芥蘭炒牛肉丫，我可以見到有人將啲茄子氽水個陣落埋啲豬肉落去……蕃茄就原隻落落啲蛋到……

俾阿穎咁玩兩玩，唔覺唔覺已經入夜，家母亦都收工返咗屋企，見到呢啲咁不堪入目嘅餸……我呢個助手終於發揮功效……

「伯母呀，我都叫咗阿恆唔好亂咁煮架啦，佢係都唔聽！係咪好難食呢，不如我哋出去食算啦，阿恆請，將功補過丫麻！」嘩，仆你個街，原來我呢個助手係咁用……

最後我哋一家人走咗去食自助餐。入座之後，我向阿穎打一打眼色，示意佢送禮物俾佢未來奶奶。

「嗱，伯母，呢條頸巾係我同阿恆一齊送俾你架，睇下鍾唔鍾意！」明明就係我俾錢……

唔知情嘅阿娘仲好開心咁話：「隻色好靚呀，我好鍾意呀！」

阿穎仲即時以水代酒，舉杯向我呀娘講：「生日快樂呀伯母，祝你青春常駐，一年靚過一年！」女人真係最了解女人最鍾意聽乜……阿娘聽完四萬咁口……而我呀爸則望住我奸笑……

係阿穎講完，我同阿爸都一齊舉杯，異口同聲咁話：「生日快樂啦！伯母！」





阿娘，生日快樂呀！