短篇散文集: 《生存，有咩意義？》

其實咩叫存在？咩叫朋友？有條問題係係腦海中盤旋咗好耐，你又會唔會試過有咁嘅經歷？

如果有一日，我死咗，除咗父母親人，又有幾多人知？

Mary，一個普通嘅OL，每日朝9晚6，同其他女人一樣，身邊總有幾個好姐妹嘅物體，得閒約埋班姐妹落老蘭獵食，係一個平凡不過嘅女人。如果有一日佢突然死咗，除咗親人之外，又有幾多人會知？同事？「吓，um佢唔係冇做咩？去咗邊？唔清楚喎。」；好姐妹？「um...我哋係幾fd嘅，不過真係唔知佢去咗邊喎，打俾佢又冇人聽。」老闆？「再唔返工就炒咗佢添呀。」究竟Mary又有冇存在過係呢個世界上呢？佢嘅存在價值又係啲咩呢？

Chris，一個大專生，係學校有幾個死黨，其他時間都係便利店做兼職，生活尚算規律，如果佢死咗呢？死黨A：「咦，佢今日又唔返呀？」死黨B：「唔知呀，你打去問下佢囉。」最後對呢件事甚至呢個人不了了之。老闆？「佢唔返工又唔請假，基本上佢已經唔係呢到員工。」Chris又係唔係真係存在架呢？佢又有啲咩存在價值？

至於我，雖然都可講得上有幾個紅顏知己，但其實都係毒撚一名，每日屈係間房到，就算唔出房父母都唔會過問半句。終日沉迷網上世界嘅我，有一日同個網友傾起死亡，佢話好怕有人死。我問佢，如果我死咗呢？佢話唔想我死。好啦，問題嚟啦，其實我同你只係一個係網上世界認識，你對我素未謀面，唔知我咩名，住邊，遑論係係邊到死同點死。然後我又諗，係喎，咁現實嘅人呢？如果我係房死咗，要幾多日先會俾父母發現呢？要發出屍臭大概要4至5日吧。咁我幾位紅顏知己呢？佢哋又會唔會知？我諗應該都冇可能。即使佢哋打俾我冇人聽，應該都只當成係我又玩自閉而已。咁我又係咪存在呢？我嘅存在價值又係咩？





今日一早由屋企諗到搭車返學、上堂、落堂……我意圖去幻想街上每一個人如果突然死咗，佢身邊嘅人會有咩變化。不過街上人來人往，要仔細觀察一個人唔易，於是我去咗搭地鐵。但地鐵上唔知點解好多呀叔師奶，完全唔係我想觀察嘅對象，我想觀察一個後生，又靚嘅女性，咳嗯，我純粹觀察同研究，並冇其他意圖。去到青衣，終於見到個身穿OL套裝，黑絲矮踭鞋嘅妙齡少女上車，咁啱企正係我對面。自從佢上車開始我不停打量佢，最後視點落咗去佢腳邊嘅地下。下晝3點半，坐地鐵嘅OL應該唔會係急住送件，但應該冇可能咁早放工，見客？唔似。冇公事包，手冇拎文件，咁佢要去邊同做咩呢？如果可以同佢攪嘢……啊唔係，我意思係如果佢突然死咗又會點呢？

正當我諗得入神之際，佢突然向我方向行嚟，跟住用一把幾乎全卡都聽到嘅聲量係到話：

「你望撚夠未呀死咸濕仔。」

仆你個街，唔想俾人望返屋企搵張被包住自己咪撚行出街啦，又要出街又唔俾人望，你企係啲燈位到咪攪到交通癱瘓？當然，我呢啲斯文人講道理嘅，呢番說話梗係唔會講出口。

「小姐，我諗你誤會啦，我……」





「誤咩會呀，我上車咁耐你我對腳足咁耐。」

冷靜，深呼吸，好男不與微生物鬥。

呢個時間，到咗欣澳，我為免繼續同佢糾纏，我決定落車，唉，真係睇唔出而家啲女外表咁斯文，實質句句迫你食糞。

既然係欣澳落咗車，咁唔差在去埋迪士尼啦，可能有助思考呢。

好可惜，去到迪士尼嘅我，彷彿過咗羅湖橋咁，一班蝗蟲當正自己屋企咁鳩叫，完全阻礙我思考宇宙最終極嘅問題。既然要思考呢啲關乎到宇宙嘅嘢，咁我唯有去真正嘅宇宙思考下啦。由於閒日嘅關係，都唔洗點排隊就上到space mountain，不過頭幾轉都因為掛住欣賞人哋啲慘叫聲而忽略咗登車嘅主要目的。終於到咗第四次，我同自己講，一定要習中去思考，好啦，就係架車直奔向呢個宇宙大爆炸去觸發我思維嘅一刻……





「喂？咩話？咩保險單多咗個名？哦，補簽返個名呀？得啦得啦，我呢幾日唔係香港呀，過幾日返嚟先簽啦。」我隔離條友就係咁講電話講到架車停佢都未停。

屌你咩，我坐過山車想思考下人生意義，你同我係到講電話嘈住哂，你冇嘢呀？好，唔緊要，我坐多轉。

今次冇事啦掛？！

「係呢，今晚食咩呀？食完上你到定我到？」「唔好啦，今日唔方便呀。」身後對情侶閒話家常到完全當咗我真係帶緊助聽器架喎！

見乜答案都得唔到，我唯有死死哋氣咁再次坐上地鐵返屋企，途中已經放棄思考緊嘅問題。

乜撚嘢生存乜撚嘢意義我唔知，我諗唔通，但我知，我又浪費咗一日嘅生存意義……