短篇散文集: 《錯過了？不，可再重來》

今日琳琳問我：「其實你個page係咪唔止得你一個寫嘢架？」

「明顯得我一個啦，做咩咁問？」我百思不得其解，點會可以令佢有咁嘅錯覺。

「寫嘢個啲風格好唔同，最緊要嘅係，一時寫得幾好，一時不堪入目，其實不堪入目個啲係咪先係你寫架？」

係俾佢問完之後，我好認真咁睇哂我自己寫嘅所有嘢，發現一個最大嘅問題……

「又真係有啲幾唔掂架喎，但真係全部自己寫架…而令到啲文出現咁大落差嘅主因…係有幾篇係阿穎唔理我個陣寫出嚟，所以質素係參疵啲架啦……」





「又關阿穎事？佢唔係689喎，唔好乜都賴落佢到啦你。」

「屌，唔係呀，你聽埋先啦，其實阿穎佢係我嘅靈感來源，只要有佢，我先有靈感，所以佢真係我嘅靈感女神嚟……」諗起我同阿穎，我一邊講，一邊不自覺地嘆息……

「其實見到你咁，我諗起曾經都有個人對我咁好……」我識佢咁耐，都係第一次見佢閃過一絲失落嘅表情……

「咦，睇嚟有故仔聽喎，買定包萬理望先！」見到佢咁嘅樣，忍唔住要笑下佢。

「再笑唔講！」





「好好好，唔笑！」

琳琳：「兩年前，係u到有個男仔，本身唔係咁熟，但因為group project冇人同佢一組，我哋先迫住同佢一組，咁個陣同佢冇乜兩句嘅。之後我班fd又話要上我屋企傾project，但我又唔想俾個唔識嘅人上嚟，點知佢哋諗都唔諗下我感受，個日放學就拉大隊上嚟。佢哋上到嚟，我班fd就當咗自己屋企咁，而個男仔就自己坐埋一邊篤手機，幾乎係冇人問佢嘢佢就唔出聲咁滯。咁你諗都諗到，佢哋上嚟都唔係為咗傾嘢架啦，之後個男仔就走咗啦……」

由於我真係頂唔順佢講咗咁耐都入唔到戲肉，忍唔住打斷咗佢：「停一停先，講重點唔該。」

「重點係，佢鍾意我，但我有男朋友。」

「唔撚係掛，你都有人鍾意？佢做咩咁睇唔開放棄治療呀？定係佢癌症末期，諗住反正冇得醫，做下善事鍾意你咋。」望住眼前呢件港女，我真係諗唔到有咩可欣賞價值……





「車，本少姐我散發嘅魅力唔係你啲凡人可以咁易感受到，我唔怪你一般見識。」難得佢講呢句個陣竟然可以做到眼都唔貶，笑都唔笑……

「好啦，自戀完就返去你啲重點到啦，你個聽眾我唔想聽人自high。」

「個次present之後，因為大家傾傾下計熟咗，都有一齊出嚟唱下k，食下飯。點知佢無啦啦同我講佢鍾意我。咁我有男朋友架麻，梗係拒絕咗佢啦，之後仲特登對佢惡啲衰啲，點知佢好似有被虐狂咁，我愈衰佢仲愈鍾意。」

「點衰先，可能你話衰嘅嘢佢覺得好呢。」

「半夜想食糖水叫佢送嚟，跟住佢上到嚟我叫我男友開門拎完之後再叫佢走；跟住再當住佢面同我條仔特別sweet呀；又成日小小事都爆哂粗鬧佢，咁夠唔夠衰？」

我聽完個心不禁佩服呢條on9嘅毅力，呢啲已經唔係可以用衰嚟形容嘅行動嚟……

「唔衰呀，呢啲邊係衰啫，呢啲已經係賤啦，賤人。」

「仆街啦你，鬼叫佢做啲嘢咁黑我憎咩！一班人行完街，各有各散個陣成日用啲懶係依依不捨嘅眼神望我，想點啫，小學生寫遊記咩，例牌用依依不捨嚟埋尾呀？最憎成日咁嚟博我同情！」





「有冇興趣聽下我點諗丫？」

「我話冇你係咪唔講丫？講你就講啦。」

我好認真咁同琳琳講：「首先，個種依依不捨嘅眼神，我相信係真心，唔係扮。其實每次諗到或者目送自己鍾意嘅人愈行愈遠，個心沉真係會不停咁沉…第二，唔係你愈衰佢愈鍾意，只係因為佢鍾意你，所以你對佢幾衰佢都唔介意…」

「其實我都幾掛住佢對我嘅好，不過佢都過咗去外國讀master啦，而家仲生活得幾好丫。」雖然琳琳帶住微笑，但總係令我覺得佢有好大嘅遺憾咁。

「算鳩數把啦你，你貪人哋好洗好用咋麻，你冇咗隻兵唔慣咋掛丫。你哋啲女人永遠係咁，好嘅唔揀，偏偏要同啲衰人一齊，結果傷到自己又傷到在意你嘅人！」聽到佢講掛住個男仔嘅好，真係有啲無名火起。

「其實點解乜都要同兵同娘娘掛勾先，唔好當正個個女人都收兵收上癮先得架。其實每個女人都鍾意俾人在意，更何況，一世人，唔會有邊幾個會咁全心全意為自己付出嘅人…或者你講得啱嘅，女人就係咁架啦…個天…好靚，唔知佢有冇望到呢……」

「咁既然咁掛住，咪搵返人囉。」





「吓？！」琳琳變得一臉驚訝。

「搵返佢，話俾佢知你掛住佢，話俾佢知你嘅感受，至少一定要俾佢知你點諗！」

「但我自己之前拒絕人先架喎…就咁搵返佢咪好冇面…」

「屌你面子重要定幸福重要呀？你再俾佢走甩，我怕你一世都唔會再遇到個比佢更好嘅人！」

「知啦，我今次會捉住幸福，唔會再俾佢走架啦。咁你呢？你都搵阿穎啦，既然你成日話只有你可以令佢幸福，咁你要行動先得架，話俾佢知，你嘅心意，至少試咗，就算佢唔受，你都叫試過，都無憾先啦！」

「我？哈哈……」我唔知點同佢解釋，唯有一笑置之……

但你呢？唔試過你就一定係0，試咗，就算低至小數點後數十億個位都起碼大過0，講出口啦！