短篇散文集: 《珍惜嗰個仍然會鬧你嘅人》

話說今日我俾人鬧，狠狠咁鬧咗三粒鐘（係文字上）。而我係竟然會因為俾人鬧而開心。

當然我係唔會因為俾啲十八字真言嘅粗口鬧而開心嘅。我開心嘅係，今時今日仲有人會為咗我好而鬧我。

大家都知架啦，而家嘅香港咩心態呀？而家嘅香港人係最鍾意睇人仆街架麻。嘩，地鐵有人食嘢，梗係唔好提佢有職員嚟緊啦，梗係走埋個職員到：「喂，第二節車廂有人開緊大食會呀。」跟手拍片再call上生果架麻。

就算係啲死港女口中嘅好姐妹呀，最多都係提你兩句，唔聽就由你自生自滅架啦。最經典人前好姐妹，人後插你背呢啲大家都見唔少啦。

人前：





「哎喲，bb好掛住你呀！」

「哎喲，我都係呀！」

人後：

「屌，佢又肥又樣衰，塊面仲咁撚多油，成日痴實哂嚟自拍，返去要消毒塊面先得。」

「屌，又高又瘦咁又點啫，係人都知佢係隻cheap雞嚟架啦，啊sorry呀，唔係雞呀，雞都有錢收丫，佢雞都不如嘅公廁咋。」





好熟口面咧，所以話丫，今時今日要搵到一個真正推心置腹嘅人，真係仲難過689落台。

其實又唔係灰到咁嘅，做人做咗咁多年梗有一兩個嘅。

（曬命mode）而我就負負碌碌咁都有十幾廿個唔止，三十幾四十個到啦。講笑啫，不過七至八個都走唔甩架啦。

而我嘅負碌又真係可以無論係咩情況，總有一個係我身邊鬧醒我架喎。

識得我早嘅個幾個朋友，早幾年都仲會有心有力有氣去鬧下呢個條頸硬過海綿體嘅人，但經過時間嘅洗禮，或者係佢哋嘅耐性都俾我磨盡嘅關係，而家對住我都只係擺出一副「冇我咁好氣」嘅表情。Fine，我都知我嘅固執係有啲超出常人，所以都唔可以怪佢哋廢時哂氣鬧我。





好啦，到我以為身邊應該唔會再有人挑戰我嘅硬頸程度嘅同時，又有人意圖去將我根深蒂固嘅價值觀改變，雖然成唔成功就見人見智啦，但對於佢哂咗三個鐘嘅光陰落我身上，我除咗佩服佢嘅毅力，都唔知可以講咩。

其實呢啲毅力，父母應該係有過之而無不及，但或者人總係將個注意力投放哂落朋友身上，俾佢哋在意係遠俾父母在意好，呢啲各人有各人睇法，我又唔係要寫啲咩愛鍚父母嘅大道理，暫且不作評論。

講返我個朋友，佢呢三個鐘所講嘅，其實我調返轉都識背。不過始終有種好窩心嘅感覺。

由我哋真正長大嘅一刻，有幾耐冇試過俾一個為你好嘅人鬧你？

返工俾老闆鬧可能只係姨媽嚟探佢所以要出火，係網上俾人鬧，多數都係個啲一味係到葡萄嘅鍵盤戰士。

細個做錯事嘅時間，我哋會俾老師鬧俾長輩打，為嘅都只係唔想我哋犯同樣嘅錯。但當時，我哋只係想可以快啲長大，唔洗再俾人鬧。

終於我哋而家長大咗，但原來並唔係想像中咁美好，我哋一樣會俾人鬧，但多數已經唔係想你好，而係想你死。

所以，好好咁珍惜身邊個嗰，仍然會為你好而鬧你嘅人。