短篇散文集: 《與厄運的交叉點》

當你遇到人生低潮嘅時候你會點做？

樂觀積極咁撐落去？用眼淚嚟逃避？一蹶不振？定係停係原地休息下？

今日同一個已經耳順之年嘅男人傾計，佢最令我好奇嘅，係佢冇咗隻右手。

我問佢：「你隻手幾時攪成咁架？」

男人：「有次收咗工，遇到交通意外，就變成咁啦。」





我：「吓，咁化學？咁呢件事算唔算人生低潮呀？」

男人：「未算，呢件事次後，我老婆因為我冇咗隻手離開咗我，公司又成日俾說話我聽，捱咗兩年，冇癮咪唔做囉。」

個陣心諗，你睇得太多cctvb啲劇咋下話？有冇咁悲劇主角feel呀？

我：「咁你之後捱過嚟架？」

男人…：「個陣冇咗老婆，工又冇埋，其實真係有諗過死咗佢架，但諗深一層，當時冇咗隻手，冇埋個老婆我都唔去死，而家冇咗份工先嚟死，計落好唔抵啫。」





痴線，呢條咩數嚟……

男人：「咁之後見冇咗份工，之前儲落嘅錢唔洗養家，慳慳地都夠我讀個博士嘅。之後咪係某大學到做咗教授囉。」（註：此人真為某大學退休教授）

呢番對話你哋睇到啲咩？

人生數十年，總會遇上好多低潮，最好玩嘅係你以為好低？仲有得再跌多兩跌。跟住有一日，你一起身以為會係美好嘅一日個陣，唔好意思，你最愛嘅人話你知佢拍拖，你屋企人入院，你老闆話要炒咗你。低潮呢家嘢仲有趣過高潮，高潮你幾秒過咗，好攰，抖完可以繼續。低潮？你以為過咗？點知再嚟。你以為有得抖？唔好意思，加操。咦，好似冇事啦喎！即刻俾你超級地獄你醒下神。而最緊要嘅係，你冇得唔繼續。抖夠啦下話？咁繼續啦。

低潮就好似電視台咁，你冇得揀。咁冇得揀受唔受咁點呀？咁咪唯有揀下自己點面對囉……





今日仲係到睇緊我9up嘅人，你試下停一停，抖一抖，回望返過去嘅你，有幾多次你認為好難捱嘅，好辛苦，頂唔順到想死嘅，今日望返，原來已經係小事一椿。

過去發生嘅每一件事，其實都係為咗成就今日嘅自己。同樣地，今日自己嘅自己都係為咗未來嘅自己而活，所以遇到逆境，遇到困難，撐住，將來你會感激你遇到嘅所有不幸。唔覺唔覺行到嚟呢一步，唔係偶然，而係因為你辛苦咁捱過嚟，所以真係俾啲掌聲，俾過去嘅自己，亦都為未來嘅自己努力。（唔排除有人係退化，啫係經一事，反一智個啲啦。）

其實呢篇都係飛機文嚟，純粹嚟安慰個個每日都係不幸中渡過嘅自己，祝願睇到呢篇文嘅人，唔會好似我咁，日日係厄運中渡過。