短篇散文集: 《好人難做》

唔知點解，今年個天特別多雨落，落到個人都特別燥，所以想係到分享件趣事。 

當你係條街到見到一個冇帶遮，又好似想過馬路嘅人你會點做？我唔知大家會選擇無視定遮埋佢過，但如果選擇後者嘅又俾人拒絕，你又會點呢？ 

話說有一日，小弟返返下工，係條街到見到個男人求其用隻手去檔住頭頂等過馬路，我呢個無聊人當然走上前話遮埋佢啦，點知佢一句彈埋黎：「唔洗，都唔知你想點」 嘩，真係容許我講聲，屌你咩，想遮下你過對面都咁陰謀論。當時嘅我真係唔知俾咩反應，好彩周圍冇人，如果唔係應該都會成為被恥笑嘅對象。 

香港由唔知幾時開始，做好心都會俾人當成有企圖，有陰謀。挑，我遮你過馬路想呃哂你成副身家呀。 又有次係地鐵見到個大肚婆上車，周圍嘅人唔係瞓緊覺就打緊機，睇都睇佢唔到，咁咪我讓囉，點知一叫佢坐，佢又一句：「你歧視肥人呀，信唔信我去平機會告你丫嗱」

大佬呀，啫係唔係話想歧視你，我都唔係瘦，但你係咪應該首先檢討下點解閣下嘅身型會令我誤會你係大肚婆先。定係你覺得我咁高深，想借讓位黎暗抽你肥到大左肚咁呢？ 





其實香港人好多都心地好好，最怕遇著呢啲陰謀論者，攪到做善事被覺得係有目的咁，乜都都要左度右度，最後為左唔會出醜，寧願變成一個旁觀者。 

呢兩件都算係小事，你有冇試過俾錢乞兒換黎嘅係俾龜逗？「先生，你知唔知你唔可以俾錢佢架喎，你助長緊佢行乞喎」。WTF？又係我錯，真係差人大哂咩？ 

就係經過無數次嘅好心著雷劈之後，再善良嘅心總會被動搖，開始懷疑到底我幫人岩唔岩？點解每次錯嘅都好似係我咁？久而久之，社會上嘅人都會變得自私，事不關己，己不勞心。如果有一日，當真正需要幫忙嘅人，又得唔到人施援手，佢地又可以點做呢？如果他日自己成為需要幫忙嘅一份子，你會唔會想所有人對你視而不見呢？ 

香港係有真正嘅好人的，向陰謀論說不，向援手說得。