短篇散文集: 《一張枱，見證嘅唔止係一餐飯……》

係成個新年假入面，其實我都好想去拜訪下阿穎嘅父母，雖然唔係話拍咗好耐拖，但真係柒極都終須蒲頭架。之但係以我呢啲住公屋，又雙失嘅身世去到人哋啲高尚住宅到，莫講話要伯母夾隻雞髀過我，連佢門口都唔知入唔入到啦。

就算俾我入到門口呀，一間阿世伯問起：「阿恆下話，你做盛行呀？」

「哦，我呢基本上係個自由工作者嚟嘅，自由度大啲吖麻！」

跟住再望住世伯好唔耐煩嘅樣問：「咁即係做咩架？」

然後伯母再係後面加句：「咪即係失業囉！」





如果事情發展到咁真係叫我情何以堪呢……咁當然，聰如我咁為咗避免發生呢啲事，所以已經一早放棄咗去拜會兩老嘅諗法。

反之阿穎，因為佢咁高質素嘅關係，我又唔怕帶佢見盡一班麻煩親戚呀，反正佢把口咁叻，有咩難到佢啫！所以阿穎其實幾乎已經連我隔離屋阿陳師奶養個隻旺財個肚入面未出世嘅bb都見埋添啦。

不過三姑六婆呢啲親戚就唔係我主要想帶阿穎見嘅人，我最想帶阿穎見嘅反而係一班自我有記憶以嚟，每年都會聚一次食開年飯嘅，我呀爸相識多年嘅老朋友。

每年初四，佢哋都會約出嚟去尖沙咀一間素食店到食開年飯，又咁啱年年都係坐同一張枱。以前細個，佢哋都只係問下學業上嘅問題。但近呢幾年，我開始大嘅時候，佢哋就開始問我幾時拍拖，嗰陣我只係一笑置之。

終於有一年，我俾人問起嘅時候，我反問返句：「咁你有冇人介紹嚟識下呀，有嘅可能下年我會答你拍緊拖呢！」





其實對住佢哋，唔同對住啲親戚長輩，講嘢唔太需要避忌，感覺舒服好多。

到今年，我阿爸照舊象徵式咁問我去唔去嘅時候，我話叫佢預多個位，唔洗講個位梗係阿穎架啦。

今年去到，同一張枱，多咗啲人，亦都少咗啲人……

望住光伯啲頭髮比上年嘅白咗好多；興叔興嬸今年帶埋個讀緊中學嘅仔嚟；當年同我一齊俾人講笑咁問幾時拍拖嘅阿源今年都帶咗女朋友嚟；而阿源嘅呀爸華叔今年就得返自己一個……

雖然成餐飯嘅氣氛依舊無改，但可能因為每年都俾華嬸係食緊飯嗰陣問起我幾時拍拖，今年再聽唔到佢把聲，總係有種好唔慣嘅感覺……





雖然我嘅人生唔多唔少都經歷過幾個親人離開，但真係係我習慣中消失嘅，應該暫時只有華嬸……明明一年前仲好開心咁同我哋一齊食飯，談笑風生緊嘅人，一年之後已經再見唔到佢……

我望住成圍枱嘅人，大家仍然會坐係到係因為老一輩嘅友誼，但係若干年後，當佢哋都百年歸老嗰陣，可能我哋呢輩連見都唔會再見……人在人情在，人去情不再……

咁多年嚟，呢張枱都可算見證住幾位長輩嘅友情，亦都見證住我哋成長，今年多咗啲人，少咗個人……唔知到幾時，張枱甚至唔會再出現我哋嘅身影呢……

華嬸，佢叫阿穎呀，你見唔見到呀……？