短篇散文集: 《順從只會一世淪為一隻兵》

今日難得同阿強兩個麻甩仔係到傾心事，阿強無啦啦同我講：

「多謝你，阿恆，如果唔係你，我都溝唔到mary返嚟。」

你唔好講到我好似做扯皮條咁，又唔係我介紹你識，又唔係我幫你，實情關我咩事？

「你噏乜春呀。」

「你記唔記得daisy呀？」





「哦，就係你話做佢隻兵做到灰嗰個？」

「係呀，記唔記得嗰時你同我講咩？」

我大約記得我係問阿強，你對住娘娘同對住普通異性fd最大嘅分別係咩。

或者細心啲留意下自己平時對fd同對女神嘅分別，就會知點解自己永遠只可以做一隻兵。好似我咁，係wtapp到，邊條仆街超過半粒鐘唔應我，我實會追加一句：「屌你唔應機。」唔好睇少呢句粗口係呢句句子結構上面嘅重要性呀，你敢唔敢對住女神講先？但對住女神呢，唔好話屌你，連話佢唔應機你都要考慮埋佢有冇嚟m身處何地得唔得閒有冇俾人激過。（而通常呢啲都仲要靠估。）

所有做兵嘅都有一個共通點，唔敢逆女神旨意。亦都係因為咁，連講句嘢都要小心，女神話一就一，話二就二，莫講話粗口，連串多句都怕女神發嬲唔理你最後連兵都冇得做。明明就係自己親手階級化自己同個女仔，但完全毫無自覺咁覺得人哋收兵。你咁聽話，唔收，對唔住你啦！





我都唔知做咗幾多年兵先悟出嘅道理，當然諗住試下改變個事實啦，所以有日，我wtapp阿穎：「喂，聽日得唔得閒？」

等咗幾粒鐘，望住不停更新嘅上線時間，我忍唔住追加咗句：「屌你咩，唔應機。」

十幾秒後我連上線時間同icon都已經睇唔到……更遑論發出去嘅新信息得返一個tick…

嗱嗱嗱，唔好屌我住，風水佬就話呃你十年八年，講故佬兼9upper嘅在下梗係呃你一世啦！

講笑啫，我從來都唔講大話嘅，我就同我哋偉大嘅689特首一樣咁誠實！





正當我中完自己招，灰到無倫嘅我遇著阿強同我講做緊daisy隻兵做得好苦，於是出於兄弟嘅關心，我教咗我領悟到嘅道理俾佢。點知佢溝掂咗mary，呢個簡直係我多年嚟嘅迷。

於是我問佢：「其實你嗰陣明明鍾意daisy架，點會無啦啦溝咗mary嘅？」

「咪因為你囉阿恆大師。」

「又關我事？」

「就係因為用你個方法，用咗落mary到，咁佢就俾我溝掂咗啦。」

「但你唔係鍾意daisy架咩？」

「屌，我做佢隻兵做咗咁耐，未試過話佢，突然咁話佢咪盞俾佢發難封咗我，對住佢，九死一生嘅，梗係搵個新人嚟試啦！」

屌，失覺哂，原來你先係大師……





其實兵溝唔到女神，從來都係缺乏嗰種獅子撲兔嘅氣勢，下下俾人食住咁，乜女都覺得你悶啦。試下當佢普通fd咁，唔應機就屌，可能有意外收獲添！（本文章唔代表本人立場，如果發生啲咩無可補救嘅情況，本人絕不負責！）