《青春怎會零創傷》: 第五章

「呀！！！」我地對望左足足五秒，我先比到反應，用手遮住上下身大嗌左一聲。
「對唔住呀，我冇心架。我唔知你換緊衫架，我見你唔喺廳，諗住搵下你咋。Sorry呀！！」Edward聽到我大叫之後先意識到自己做錯野，九秒九關返埋道門。我聽得出佢好誠懇，唔係故意。

我着返件背心同條短褲就行返出廳，見到Edward雙手合十放喺塊面到，猛咁講sorry。見到佢呢個動作，我真係忍唔住笑左出黎。
「唔緊要啦，你都冇心嘅。況且我又冇咩野比你睇。」我扮冇野咁講。「好彩平時有做開運動，冇乜肥肉仲有條人魚線坐陣，如果唔係就真係冇野睇。」我心諗。

「叮！」呢個時候Edward嘅whatsapp響起。
「阿仔，今晚我同你老竇去飲，順便打通宵麻雀，今晚嗰餐你自己搞掂佢喇」內容大概係咁。
「仆街我冇帶鎖鑰喎！」佢睇完個whatsapp講完句野之後就同我對望左一眼。





「你平平安安送我返屋企，我冇理由又掉低你咁衰女姐。反正我屋企又冇人，聽日又星期六，不如今晚我陪你食飯之後你喺到瞓一晚啦。」
「咁樣好似唔係幾好咁喎，孤男寡女，我就話冇所謂姐，但係你咁靚女，我怕我把持唔住喎。」
「你敢？一於咁話啦。」我舉起個拳頭扮惡。

由於我地兩個都唔想出街，所以晚餐就求求其其嗌左個kfc就算。食飽之後我去左沖涼，佢就坐喺梳化㩒電話。沖完涼之後我濕住個頭着住件one piece行出廳。
「喂到你沖喇，我攞左阿爸啲睡衣同埋新毛巾比你。」我一路抹頭一路同Edward講。
「嘩，你想色誘我？」佢由頭望到我落腳。
「你就想呀，沖涼啦！」我一邊講一邊行去梳化方向諗住坐低睇電視，冇留意到頭先啲頭髮滴左啲水落地，一個唔小心一跣就撲左去坐係梳化上面嘅Edward面前。呢一刻我地塊面之間只有兩厘米嘅距離、仲要我件衫係大領加少少跌膊，只要佢一低頭，我對36C喺佢面對已經一覽無遺。正當我諗住起翻身嘅時候，佢捉住我手臂。

「你好靚。」佢伸手摸住我塊面講，然後就慢慢哄埋黎。我避開左，可能一切都黎得太突然，雖然佢好吸引，但係我唔想搞到自己咁隨便。我只係覺得佢靚仔，又唔知自己係唔係鐘意佢，我唔知呀，我好亂。




「我都話我會把持唔住架啦。」佢怕怕醜醜咁講。
「好難怪你嘅，哈哈。沖涼啦你！」我苦笑，繼而坐返落梳化扮睇電視唔望佢。
「嗯。」佢慢慢行入廁所。
等佢入左廁所之後，我即刻狂打自己塊面。諗返岩岩嘅情境，又忍唔住面紅。腦海入面浮現一個又一個嘅問題。讚我靚，又想錫我，鐘意我？定係貪我樣靚身材正咋？冇理由嘅，學校咁多女仔唔揀，淨係揀我？
雖然諗左好多好多問題，但係其實心入面係幾high。

「叮！」Edward嘅whatsapp再次響起，我行去佢電話旁邊。
「Vicky Lui ：得米啦你，登堂入室。」iphone螢幕鎖屏上顯示。

「Vicky Lui？呂詠曦？」