慾望島: 慾望島-Part7

"喂， 做乜！？" 我嘗試大力拉扯扣係我雙手上嘅金屬鎖。 當然， 我只係喺度浪費氣力。

"唔駛緊張， 我地只係想你乖乖地聽完我講個遊戲規則， 然後就會放你， 再講， 宜家鎖住你果個扣經過測試， 連美國大灰熊都扯唔斷。"

我並沒有深究Edith說話嘅可信性， 因為我出盡全力都扯唔開個鎖。 現階段只有兩個可能性:

1. 等個鎖奇蹟地自動打開2. 聽完Edith 講野後佢幫我打開個鎖

如無意外， 我只有乖乖聽完Edith 講解呢條路。。。





"唔該你快D講完， 快D解開我。 你知唔知而家係非法禁錮！" 我並無講出"報警" 呢個字， 只因肉隨砧板上， 而且我唔知道佢地有無預備D更可怕嘅野"招呼"我。 反正， 我出到去一定報硬警， 所以我無必要令自己處於更嚴峻嘅處境。

Edith 係枱個櫃桶攞左個Folder 出黎， 對住我一笑。

唔知點解， 我對佢之前嘅印象蕩然無存。 而家嘅我對佢只有一個感覺:

依條女係咪線架！？

Edith 開始發表佢嘅[講解]"亞Dick， 全名念寶的, 出生於1982年9月14日。 現職於。。。"





我一路聽住佢嘅"演說"， 一路無出聲。 我唔出聲嘅原因並不是因為我專心， 而係兩個字:

"恐懼"

Edith一路對住我微笑， 一路將我幼稚園•小學•中學•大學， 甚至我小時候參加過嘅童軍•長跑隊• 暑期游泳班所有資料都一一準確讀出。

當然， 工作經驗呢類咁基本野又點會漏左。

"有無搞錯！ 你地搵人查我！！" 我向住Edith大叫。





"唔好勞氣住， 我未講完。 你爸爸叫念森， 媽媽叫鐘愛琪。 佢地工作嘅地方係。。。"

當我一聽到佢地原來都查過我雙親後， 一直按壓住嘅怒氣終於爆發。

"我屌你老尾， 你地唔好搞佢地呀！ 仆街， 我同你死過！！！" 我失控大叫嘅同時， 亦死命地搖動我雙手， 希望可以扯開手上個鎖， 當然個鎖由此至終都無任何鬆開嘅跡象。

而我雙手亦都因此而瘀紅左一大片。

"如果我係你， 我就會冷靜D聽理落去, 免得我地嘅"危機處理小組"出手去令你安靜落黎" Edith 對於我表現失控作出左非常冷靜嘅回應。

"危機處理小組！？又咩料吖！？ 究竟呢間酒店係度做咩架？" 我心入面盤算著， 同時亦冷靜落黎---只因我現階段做乜野都毫無意義。

"我諗你對我地公司於掌握你資料方面無咩問題啦？ 我應該唔需要再講你同亞Cat拍施果時D野， right?" Edith 對我可愛地單起一隻眼。

都係果句， 如果Edith 心腸唔係咁惡毒的話， 佢真係靚得令人神暈兼癲倒。





"唔駛講啦， 你究竟想我做乜？" 我想知佢地嘅目的。




"我地只係想你參加"慾望島"。"