慾望島: 慾望島-Part4

"我參加"   

打好呢三個字後, 我就向 96637222 發出一個短訊。 

當我按下send後， 好奇怪，係大約兩秒後， 我已經收到一個回覆：
 
＂多謝參加慾望島求生計劃。 請問你方便係明日下午12點45分到銅鑼灣Crown Plaza酒店33樓30號房商討比賽細節？
  
                                                                                     Edith＂





我心諗: "嘩， 打字咁快嘅" 

因為我係銅鑼灣工作關係， 而且午飯時間係由十二點半開始， 所以十二點四十五分到Crown Plaza 係無問題嘅。 

我send 左個"ok" 過去。 同之前一樣， 不消兩秒， 我就收到一個"ok, 明天見"嘅短訊。    

2012年8月13日下午12點40分。  

我到達Crown Plaza 酒店大堂。 





大堂入面見到兩部電梯， 我走入左邊一部。 

係入面， 我發現到部電梯最多上到二十八樓。同時間， 同電梯嘅鬼婆準備㩒閂門制。。。 

就係門關上前， 我本能地快衝出，途中唔小心撞到個鬼婆。 

"What problem do you have, what the....." 

我無理到佢， 只係自顧自地等候下一部電梯。 





"叮" 右面部電梯， 我入到去， 一望。 

"咦！？" 

"都係得二十八樓嘅？" 

我走返出電梯， 係大堂睇下有無人可以問一下。 

我目光向Front Office 望去， 而係同一時間， 我見到佢地兩個Staff都望住我。 

應該係我進進出出電梯呢個舉動引起左佢地注意。 

我走向佢地， 想問下佢地點樣去到30樓。 

"先生午安， 請問有D咩野可以幫到你？" 其中一位Front Office 嘅小姐面帶微笑問我。





"你好， 我想請問下點樣去到30樓？ 我要去30樓30號房。" 

"明白， 請等等。" Front Office 小姐係回答我同時， 我見到佢雙手不停係鍵盤上遊走。 同時， 係佢領口度見到一個略大嘅"C"字扣針。我估果個"C" 字就係Crown Plaza 嘅簡寫。 

"你地公司個扣針都幾靚。" 

我想趁佢搵緊記錄時打開話題， 避免deadair。 

Sales 嘅職業病。 

"先生， 請跟我黎。"佢對我嘅提問並無回應， 只係繼續微笑咁示意我跟住佢行。 

佢引領我向Front Office 嘅側門走去, 入到去， 係一條灰白色嘅走廊， 去到盡頭左手面， 有一度粉藍色嘅門。 





"點解會係電梯入面搵唔到三十樓嘅？" 係途中， 我又嘗試再打開話題。 

"因為我地三十樓嘅客人需要高度嘅私穩" 小姐終於開口回應我嘅提問。 

但係語氣同表情上， 佢收起左之前係大堂嘅微笑同親切， 取而代之除了冷淡外， 還是冷淡。 

Front office 小姐用佢張員工證拍落牆上一個位置上， 一個隱藏係牆身嘅位置。 

"咔" 門應聲打開。 

入到裏面， 我見到嘅係 

另一度門。。。