某天我脫毒了，走上了情聖之路: 第三十章 - 再見
最後我地班敵唔過家楓佢地。
阿文都無怪責我。
怪責我既人只有我自己。
我心情好差，所以自己一個人離開學校。
一個人靜靜咁番屋企，自從我決定脫毒之後，經常身邊都有一大班人。
好耐無試過好似而家咁，自己一個靜靜地。
其實我都幾中意一個人行下諗下野，好過成日有人係到嘈嘈貢。
諗番起岩岩場波，同卓芝對家楓既無微不至。
心頭就開始酸上黎。覺得自己好廢，乜都做唔到。要夜晚先可以搵到卓芝係一件理所當然既事。
因為佢要侍候佢既主子到訓教為止。
「小狼你隻腳仲痛唔痛?」卓芝係電話問。
唉，你終於記得有我啦咩?
「隔左咁耐無事啦。」我抱怨。
「無事就好。」卓芝扮意會唔到我講咩。
「你放學去左邊?」
「同家楓一齊。」
「噢。」
「你呢?」
「一走就番左屋企。你最近同家楓好似好番好多。」
「都唔係呀，只係表面姐。」
「我見到你係球場咁緊張佢我個心好唔安落。」
「我做比佢睇，對唔住我又令你唔開心。」
「你唔係扮出黎，你每個眼神、動作、第一個反應，都係好緊張佢，你唔好再呃自己。」
「對唔住呀。」
對唔住。對唔住。對唔住。對唔住。對唔住。
永遠只係對唔住。我已經聽到好厭。
「唔緊要啦，夜啦訓啦。」我同卓芝講。
「早抖。」
「嗯。」我連早抖都唔想講。
我知道我同佢既關係已經走到盡頭。
原來有啲事唔係話你認真盡全力去做就可以完成。
往往有好多事我地無法掌握。訓唔著無野做睇番啲wts app內容，見到原來柔柔wts app過我好多次。
內容主關心我有無事同讚我打得好好。
我都知自己打得唔差，只係唔開心羸唔到姐。
「放心啦，我無事呀。」我覆柔柔wts app。
星期一番到學校真係預我所料，我成為左眾人佳話。
就連羽毛球隊既部長都一朝就黎拜訪我。
我拒絕左佢既入隊邀請。
因為我都唔中意打羽毛球，只係細個果陣要陪家姐打先知咩叫羽毛球。
諗番起比家姐單方虐殺，突然覺得家楓都唔係好勁姐。
平淡咁過左一星期。
因為足球隊要備戰十六強既淘汰賽所以練到好夜。
行出校門既時候竟然比我見到家楓企左係到。
「小狼。」家楓叫停我。
「做咩? 搵林卓芝?」
「我係黎搵你。」
「做咩事?」
「我想同你講之前比賽既事好耐。」
「哈，仲有咩好講?」我不爽。
「你果日打得好好，簡直令我嘆為觀止，估唔到你認真起上黎可以咁犀利。」
「哈，係咩?」
「我岩岩特登留係到睇你練波。我果然無睇錯人，你果然係一個可塑性好高既人，只要你少啲吊兒郎當多啲認真mode，應該可以超越好多人，什至係我。」
「對唔住，我無興趣超越任何人，我只中意做番自己。」
「你唔覺得好可惜嫁咩?」
「我既事關係乜撚野事呀?」
我好快就跑左出去，無再理家楓講啲咩。
佢根本係一個自以為是既人，唔係所有人都要好似佢咁生活。
上到既巴士果陣，收到卓芝既wts app。
「家楓去左搵你?」我一睇到呢個wts app就無名火起。
「係又點?」
「佢而家係你隔離?」
「唔係呀!!你問夠未?」好撚嬲!!開口埋口都係佢。
「佢突然話要去搵你，我驚佢發現左我地之間既事。」
「放心，佢無發現。」我覆完之後就一下將個電話放番落袋。
直到食完晚飯先拎番個電話出黎。
見到卓芝wts app猛問我去左邊。
見到佢咁緊張都係算。
「我已經係屋企啦。」我wts app覆番佢。
「做咩咁耐都唔應人?」
「sor放低左部電話聽唔到。」
「我以為你想唔要我。」唉，都唔知邊個唔要邊個。
「唔會啦，可能係你唔要我呢。」我比說話卓芝聽。
「你係我好重要既人，我唔可以無左你。」
「但我地三個人一直咁樣行落去嗎?」卓芝收到我呢個wts app之後就無左應我。
我好失望咁坐左係張床到玩手機。
「你聽日有無時間?」卓芝突然wts app我。
「有呀，做咩?」
「我想同你出去行下。」
「好呀。」
我好驚訝佢突然叫我出去，但我無多問佢點解。
因為成日咩都點解既人其實好那煩。
今日係星期六，我同卓芝去左九龍灣行街。
難得有得同佢拍拖，我當然咩都無諗，專心同佢行街。
雖然我表現得好開心。
但佢顯然有啲悶悶不樂，好似想避開同我有身體接觸咁。
我feel到有啲唔好既事要發生。我無再強逼要掂佢要同佢講好多野。
我地兩個只係默默咁係條街到行。
偶然會因為眼見既野而談話。
「送到呢到就可以啦。」卓芝係柴灣出閘口講。
「我想送埋你番去。」
卓芝考慮左一陣，最後都比我送佢番去。
我好想佢親口同我講佢想繼續同我一齊。
好想佢同我講佢會揀我。
「卓芝，你今日好似怪怪咁。」
「噢，係咩?」
「你係咪有野想同我講?」我已經唔想拖拖拉拉啦。
「小狼你唔好逼我啦。」
「你係咪已經決定左啦?」
「對唔住呀小狼。」卓芝雙眼開始通紅。
「你唔話過會同佢講嫁咩?」
「對唔住呀，我真係講唔出口，我發覺我仲好愛佢，佢就好似我家人咁，我發覺我需要佢。」卓芝開始流下一滴一滴既眼淚。
「咁我係咩?係你邊個?」我忍唔住我既怒火同失望。
「你係我一個好重要既人。」
「一個好重要既咩人?」我已經失去左理智。
「對唔住呀小狼。」卓芝係到係咁喊。
我亦都唔知可以再講咩。
我只係企左係到睇住佢喊。
我開始恢復常性既時候就遞左張紙巾比佢。
「算啦。」我用冷淡既語氣講。
「對唔住呀。」
「我已經聽厭左呢句說話啦，你番去啦。」我已經唔想見到佢。
「對唔住呀。」佢捉住我隻手。
林卓芝其實你想點?
既然有左選擇就放手啦。
「夜啦，番去啦。」我鬆開佢隻手。
糾纏多左陣，卓芝都慢慢番左上去。
而我一個人走在靜默既街道上。曾經你我互不相識。
曾經你我狗咬狗骨。
曾經你我錯過對方。
曾經你我相依相靠。
曾經你我跨越城牆。
曾經你我許下承諾。現在你我各走各路了嗎?