某天我脫毒了，走上了情聖之路: 第十六章 - 病 與 夢
我頂，點解今日咁難起身，好似比鬼壓咁。
我摸一摸自己額頭，咁興既? 發燒!?
「黃少朗! 起身啦! 」我家姐係我床邊咆哮。
「我…..好似發燒。」我用盡全身既力同家姐講。我家姐就跑出去話比呀媽知。
呀媽入到黎又係講果幾句
「洗唔洗陪你睇醫生? 記得睇完醫生要食藥。」
我諗大家應該都好明白。最後爸媽都番晒工，家姐都番埋學。
我就緊係訓夠先爬起身睇醫生。
我發左個好奇怪既夢。
「柔柔，我要走啦。」一個陌生既少女攬住柔柔講。
點解柔柔高左仲靚左咁多既?
「一有wifi就要wts app我。」柔柔強忍淚水咁講。
果個女仔轉身過黎我到仲撲向我。
「小狼!! 走之前可以同我自拍嗎?」果個女仔同我講。
「好呀。」我溫柔咁答。
「用你手機影，之後send番比我。」佢望住我笑左一笑。
個女仔再同其他人拜別後，就轉身走往離境閘口。
「嵐嵐! 」呢個時候我突然叫停左佢。
佢雙眼通紅咁望過黎。
「記得報平安。」個心好嗱，好痛。
佢點下頭，揮下手就一步一步咁行去離境閘口。
「再見啦，嵐嵐。」我輕輕咁講左句。
「叮!!!!!!」呢下手機聲將我從夢境帶番黎現實。
醒番之後我已經唔太記得個夢講咩，只係依稀記得一個叫嵐嵐既女仔，不過連個樣都唔太記得。
我捽一捽自己雙眼，發覺自己滿載住淚痕。個心仍然嗱住嗱住。
用力呼吸左兩下，心情先慢慢平伏番。平伏左之後就望望個鐘，原來已經十點幾。
然後拎起部電話睇下邊個咁唔生鏽嘈住我。
我呀媽、肥森、長毛、卓芝、柔柔、樂瑤都搵過我。
呀媽果啲wts app真係唔洗睇都估到講咩。
我無睇到其他就直接打開左樂瑤既wts app。
「病左?」「係呀，普通發燒姐。」我回覆樂瑤。
之後我再睇其他人既wts app。
「今日做咩唔番學!?」肥森。
「肥森話你無番，無事嗎?」長毛。
「你唔番學搞到我好悶。」卓芝既wts app令我心情有所好轉。
「對唔住呀，因為我搞到你病左。」柔柔既wts app充滿住歉意。
我只係奇怪我同柔柔又唔同班又唔同級，又同我啲FD唔熟，點解會知我病呢?
唔諗咁多住，直接覆wts app。
「病左。」覆肥森同長毛。
「而家就係比你恰到病左。」覆卓芝。
「唔關你事，你點解會知我病左既?」覆柔柔。覆完晒之後，我再次虛脫咁攤左係到。
無諗過覆wts app都可以咁攰。
攤多左陣決定起身刷牙食野。
刷緊牙既時候，見到肥森覆左我。
「感冒? 今日阮芯柔上黎搵過你。」
「佢仲拎住你件褸，你地咩關係? 」肥森連續兩個wts app。
「係呀，佢琴日凍我借左件褸比佢之嘛。」我覆肥森。
「你因為佢搞到自己病= =?」
「你都可以咁理解既- -“」
我刷完牙就一路食早餐一路同佢wts app傾柔柔既野。
佢覺得柔柔其實係中意我。但我當佢只係妹妹，同埋邊得黎咁多女仔中意我。
因為病既關係成個人無咩力，於是開左部腦煲下動漫。
睇到一點，即係學校既lunch time，我收到柔柔既wts app。
「我諗住去你班房還番件褸比你既時候，你個肥仔FD話你無番，我就估你病左。」
「哈哈，咁你keep住著多日聽日先比番我啦XD。」
「好啦，咁你睇左醫生未?」
「未有動力落街住。」
「洗唔洗我黎陪你睇? 」
「唔洗啦，廢事傳染你。」其實我好想佢陪我，但佢又唔係邊個，廢事佢誤會。
「哦….」佢顯然係好失望。
隔左半個鐘到，竟然收到樂瑤wts app。
「好啲未? 有無睇醫生呀? 」
「好啲啦，但未去睇。」
「放左學陪你去睇? 」
「好呀。」開頭我以為佢問候我兩句就算，無諗過佢會黎搵我。
除左落街買野食之外，我都係攤左係電腦前面睇動畫。
一路一路等樂瑤放黎搵我。等等下都不知覺訓著左。
直至樂瑤打比我。
「我到左筲箕灣啦，你係邊啦?」
「sorry呀，我岩岩唔小心訓著左，你而家係邊個位置? 」
「我都話放學黎，仲訓! 我係天悅呀! 」佢勁燥底。
「而家落黎。」我無力同佢嘈，落左去先算。見到佢果陣，佢個樣仲黑到我以為佢變左種做黑人。
我地乜都無講就去左睇醫生果到。
「你普通感冒，食完藥就無事。」個醫生講野勁黃綠。
不過感冒係呢啲嫁啦，唔通佢解釋一次啲孽點會幫你醫感冒咩。
食得好咪得囉香港人。
「不如去你屋企。」出左診所之後樂瑤講。
「好呀。」因為家姐要考準備DSE所以佢每晚都會溫到好夜先番屋企，
而家老豆呀媽放工番黎都已經好夜，所以唔怕帶樂瑤番屋企。
「你間屋好靚呀! 」佢一入到屋就大叫。我帶佢周圍參觀。
「你間房真係有好多高達係到! 但點解隻隻都一樣既? 」
「佢地全部都唔同嫁囉。」女人果然睇高達只係睇到紅白藍黃同全部都有角。
我帶佢參觀完之後，佢就坐左係梳化到。
「你快啲食藥啦。」佢吩咐我。
我拎個包出黎送藥，空肚食藥會好傷胃，呢個係常識嘛。
食完藥之後就坐左係佢隔離，我地少有咁傾左好多野。
「我地好耐無好似而家咁好傾。」我同樂瑤講。
「我地真係少見左好多。」
「你覺唔覺我地好似冷淡左好多? 」
「嗯。」樂瑤開始沉默
「咁不如……」
佢無比我講完句野就錫左落我到，仲坐左上我大脾攬住我。
呢一刻，我真係猜唔透女人既思維。
「再見啦，嵐嵐。」