某天我脫毒了，走上了情聖之路: 第十四章 - 猜疑
動人既一吻，是吻合? 還是吻別?
我見時間都差唔多就送佢番屋企。
「我聽日約左人出去。」樂瑤同我講。
「Ok，我聽日都想係屋企休息下。」我打左個ok手勢。
星期六、日都係同平時一樣唔會同樂瑤見面。
星期一我仍然同樂瑤一齊番學。
「其實都唔一定每一日一齊番學，你又要特登走過黎。」樂瑤突然同我講。
「無所謂啦，我都唔攰。」
「咁是但你。」之後我同佢都無咩交流過就番到學校。
明明前兩晚仲好地地，點解突然間會咁冷淡?
唔通係女性週期?呆呆下咁行入班房。
「球王!! 」肥森又係到大叫。
我見到黑板寫住”球王大破黑豹!!!! ”
「實係肥森你寫嫁啦。」
「好事緊係要大肆宣揚。」
「咁你仲唔進貢啲功課比球王抄?」我同肥森講。
講完就番埋位抄功課。
我感覺到隔離卓芝係咁望住我。
「呢條錯左，你抄我果個。」卓芝遞左佢本作業比我。
「你又肯定呢題錯? 」
「因為我抄家楓嫁囉。」佢講左呢句我地就對望大笑。
女神不會痾屎，男神不會錯。就是這個道理吧。
「笑番咪好囉，成朝嗱埋晒塊面。」卓芝望住我抄功課。
「你唔好望我得唔得? 」
「好難得可以見到你咁專心做一件事。」
「抄功課本來係唔見得光既事，而家比人望都實，好那怪呀。」我開始炆炆地。
佢無出聲之後，我就繼續抄我既功課。
佢偶爾都會偷望下我，但又騷擾到我，所以都係由佢。
其實卓芝有份溫柔，無論我咩事都會幫我，
我比人恰，佢一定會為我抱打不平。
我唔識做功課，佢一定會教我。
有時我會諗，其實係咪上天派佢黎守護我。
小息既時候，我原本諗住同肥森去買野食。
「小狼，我有啲野要同你講。」卓芝拉左我去無咩人既地方。
「做咩呀你? 我叫”破喉嚨” 嫁! 」
「唔好玩住，我有啲緊要野同你講。」佢神色非常凝重。
「做………做咩? 」我開始有啲驚，因為卓芝呢個末日樣意味住有可怕既事發生左。
「我……星期六…見到樂瑤同個男仔撓住手行街。」佢捉住我隻手吞吞吐吐咁講。
「可能你認錯呢，佢個樣咁大眾化。」
「我講就講左你知，唔信就算! 」
我同佢都雙雙番入班房。
我地好似兩公婆咁坐番埋自己個位。
再次提提大家，我係坐佢隔離之如，張枱仲要痴埋。
所以親密度係十分高。
「Sorry，搞到你唔開心。」佢見我嗱埋晒口面就安慰我。
「仲好講! 你搞到我落唔切去小食部買野食，我而家好肚餓呀磨碌!! 」
「食住先啦。」佢係個袋到摷左筒黑加倫子糖出黎。
「多謝。」我諗到無諗就拎左黎食。個樣仲歡容番。
「嘿，你仲易氹過啲小朋友。」佢摸下我個頭用迷人既眼神望住我講。
「妖! 咪摸啦。」我撥開佢隻手。
佢無嬲到，仲係到笑我似細路仔。
佢既舉動總係令我忘記佢已經有男朋友。
「小狼!!!!!!!!!!!!!!!!!!!!!!!!!」肥森大叫，然後放低左隻糯米雞。
「幫你買嫁，估到你落唔切去食野。」佢睥睥卓芝就繼續講。
「人生有個真正朋友真係好極! 飲勝。」我扮家有喜事既星爺。
「食啦! 仆街。」肥森係我個頭打左下敲擊樂。
因為太餓既關係，我好快就焯左隻雞。
我留意到卓芝又係到望住我。
我覺得好不安，所以我扮唔知就算。
今日lunch我同肥森、阿謙同家樂食。
肥森佢地都有問我今日卓芝拉左我去邊。
都無咩好隱瞞，我就如實稟報比佢地聽。
「其實我不嬲都覺得呀嫂怪怪地。」家樂又啟動馬後砲模式。
「佢似想用你黎威多啲。」少出聲多做事既阿謙終於開聲。
我地三個望晒過去示意佢繼續講。阿謙係我地四個入面分析力最好既一個。
「你唔覺佢每次係學校搵你既時候，佢都call齊馬嫁咩? 當然唔計你搵佢既時候，好似你選拔既時候、岩岩開始拍拖既時候，佢永遠都好似做場show比人睇咁。」
「我係比賽都察覺到，當你比黑豹係咁侵犯既時候，樂瑤係無動於中。相反卓芝同果個咩阮芯柔(柔柔全名)就好大反應。」肥森講。
「個阮芯柔仲衝埋落場tim，我差啲以為你多左個女朋友。」家樂插嘴。
「如果你有留意既話，樂瑤由頭到尾都係同佢隔離啲朋友傾計，無睇到比賽。直到啲人開始因你哄動，佢先望下你。」阿謙繼續分析。
你睇下我地個前鋒得閒既程度，就知我地既進攻次數有幾多。我地無傾到任何結論就番左學校。
我上堂果陣都係到諗點解突然咁冷淡?
同佢上次問我柔柔既問題有關?
定其實我地已經走左熱戀期?大家應該好明白多數諗黎都係無答案。
今日番我都係同肥森佢地走，因為樂瑤話佢約左人行街。
但實邊到有咁多街行?
「呀嫂又dum低左你?」家樂問我。
「係呀，佢又話約左人。」我答佢。
「陳浩森! 今晚係咪要呀婆到食飯? 」突然有把女仔聲叫住肥森。
除左老師之外，夠膽大叫肥森全夠佢既人，只有佢呀妹一個。
「係呀，不過我同小狼佢地hea下先。」肥森答佢呀妹。
「咁我番屋企訓陣先。」佢知會肥森。
「你地去邊hea?」長毛問我地。
於是我地四個連埋長毛就去左M記吹水食野。
我又將成件事講一次比長毛聽。
「咁其實佢唔算係中意你，只係想試下拍拖係咩一回事咋喎。」長毛認真mode。
「但佢又話中意左我好耐。」我講。
「我好耐以前係聽講過佢對你有好感，不過你果陣仲未整容，我以為係真愛。」長毛好似諷刺緊我。
老實講，我都無想像過我換髮型前會有人中意自己。
「不如你同佢傾清楚仲實際，好過係到估估下。」阿謙幫我地作出結論。
「阿謙都講得岩，我搵日同佢傾傾啦。」我講。因為傾極都無咩答案加上肥森又夠鐘走所以我地就散band。
我地執野離開既時候我先發現我電話唔見左。
之後我托長毛打比我，睇下有無好心人執左。
「喂? 」對面係一把女人聲。
「蘭姐? 」長毛問番佢。長毛咁都認得出人地把聲
蘭姐係我地學校校工，佢星期一至五都會係學校訓。
原來係佢執左我部電話但啲校務處職員又走晒，所以keep住聽日交比啲職員。
「唔該蘭姐。」我一個番左去學校搵蘭姐。
「小心啲啦後生仔，一個就唔記得帶鎖匙，一個就漏電話。」
「漏鎖匙?」我好奇咁問蘭姐。
「有個女同學漏左鎖匙無得番屋企，而家坐左係音樂室等人黎接。」
而家差唔多成六點都未走，等咁耐真係陰公。
好奇之下我就上左音樂室睇下會唔會好似啲高登故咁樣與女神相遇。
當我行近音樂室既時候，聽到一陣陣悅耳既琴聲。
當我再行近啲既時候，仲聽到有人唱歌tim。
把聲好甜，正中既高音甜，中音準，低音勁。
真係好聽到好似播出黎咁。
透過門口既玻璃見到呢個女仔既背影。
從背影一看，應該係中一二既小師妹。
再望真啲，個背影都幾面善。
我細細力開(破)門而入，個女仔仲係好陶醉咁自彈自唱緊，完全無發現我。
我越行越近，個心就跳得越快。有一種想從後攬住佢條腰既感覺。
個背影真係好熟! 無錯! 一定係佢!
「阮芯柔同學! 你係到做咩!? 」我扮惡咁嚇佢。
“登……..”佢嚇到彈左起身，起身既時候仲用力禁落左去個琴到。
佢令轉身眼大大咁望住我。(作者: 話說我琴日都突然出現係柔柔隔離，佢比我嚇到瓊瓊。)
「小….小狼? 」柔柔驚訝咁問我。
個阮芯柔仲衝埋落場tim，我差啲以為你多左個女朋友。