某天我脫毒了，走上了情聖之路: 第十章 - 表白

講起上黎，我今次應該係第一次同女仔單獨出街。
真係有啲緊張，”拿拿林” 食啲野去jel頭換衫先。
刷牙既時候，拎左部電話check下有無人搵我。
見到卓芝有wts app我。
「琴晚唔該晒你。」

「客咩氣呀XD」
咁普通既交流應該無問題掛。
不過又令我諗起肥琴晚講既野



「第一: 佢有男朋友仲對你咁暖已經係一個問題。
第二: 佢似想食兩家茶飯，畢竟你同家楓係一凹一凸既人，
同時擁有你兩個基本上可以填平一切突缺。
第三: 你日再咁踩落去終有一日你真係會中意佢。
第四: 我唔可以比我兄弟受呢種委屈。」

「點解考慮樂瑤? 可能你指拍左拖就唔會諗咁多。」

唉，一朝早要諗咁多野，好麻煩。
塞耳機聽歌算。岩岩一點抵達旺角，無遲無早，神一般的時間觀念。


Wts app下樂瑤問下佢邊個出口等先

「邊個出口等?」

「E出口:)」

我係E出口等左15分鐘都未見佢身影。
唔知係咪佢太矮睇佢唔到呢?
我又唔好意思wts app問佢係邊。
結果我等左一個鐘佢終於笑笑口咁現身。


我無問佢點解咁遲，反正笑笑口遲到又無講原因多數都係拖下拖下搞到遲出門。

「我好肚餓。」佢扁住嘴同我講。

「好呀，我都餓餓地。」

等你咁耐我唔餓都難啦。
我地無搵間餐廳坐低食，兩個人一齊掃街，見到有咩想食就買黎食。

食飽左之後佢就帶我周圍行，啲咩鬼野旺中呀、潮特呀，所有地方都行晒咁制。
我無問佢想搵咩，反正我都無野做。
佢周不時都會問我悶悶。老老豆豆，我有得答悶咩?

佢行路既時候掛住同我講野又唔睇路，搞到係咁撞到人。
又要帶頭，又要唔帶眼。



「睇車呀!」我大叫一聲。

樂瑤掛住同我講野無睇馬路，差啲比車撞到。
我反應得切，一手將佢拉番埋黎。
回過神黎既時候，已經發覺佢攬住左我。
呢次係我第一次比女仔攬住，但我一啲感覺都無。

「有無整親呀?」我問佢。

「無事。」佢答完我之後並無放開手，反而攬得更緊。

我摸摸佢個頭。「你再唔放手我就告你非禮。」

我講下笑拼甩身。過左一陣佢終於放手。


之後都無再講野
呢份沉默一直保持住。
直到食晚飯點餐既時候，佢先肯開聲講野。

「好臭呀! 係咪你太耐無講野所以有口臭?」我扮晒野咁講。

「下? 真係嫁?」佢好緊張咁問我。
終於肯同我講野啦咩?

「講你就信?」我奸笑。

「你講咩我咪信咩囉。」佢眼神充滿住三字經。

「唔好嬲，比埋我杯野你飲。」飲完我杯野之後佢都無左嬲。



食完野行多陣就番屋企，一路上都有講有笑，無再發生同岩岩相似既事件。

「夜啦，不如我送你番去。」就到西灣河站既時候我同佢講。
佢答應左之後就陪佢行番屋企。

「其實你有無中意既人?」佢突然問我。

我腦海第一個出現既影像唔係卓芝，亦唔係學校既一啲好靚既女同學。
而係柔柔，畢竟我對柔柔既印象好深刻，什至第一眼見到佢既時候，已經吸引住我。

「無。」雖然我對柔柔既印象好深，企應該未去到中意，只係想留意下佢。

我feel到佢聽完之後有啲沾沾自喜。

「咁你呢?」我問番佢。



「Ummm.....有呀。」當我想問佢係邊個既時候，佢突然轉過黎攬住我。

毒撚第一次比人攬實，即時中央短路。

「我中意你。」

突如其來既示愛，令我陷入大腦癱瘓既狀態。

「我中意左你好耐，你成日都面帶笑容黎搵阿明(長毛)果陣已經好留意你。
因為你既笑容好似冬天既太陽，為寒骨既大地添上溫暖既毛衣。
係落大雨果日我終於鼓起勇氣接近你。」佢十級激動咁同我講。

我呆木若雞咁望住佢，佢啲對白究竟度左幾耐?

「嗯，我明啦。」佢見我呆左就前設自己已經衰左。

「喂! 」我叫停佢

「可能係太突然我唔識反應，不如等我諗清楚再答你，好嗎?」我行埋去摸摸佢個頭講。

「咁你會幾時答我?」

「明天吧。」

「咁我等你答覆! 」

「快啲番上去休息，聽日仲要番學。」

「我想見多你一陣。」佢開始扭計。

「乖啦。」佢終於肯番上去休息，
我終於都可以番屋企打機。

沖完涼我就打比肥森要求救援。
我係電話到將整個過程講晒佢知。
「點解唔接受? 」佢問我。

「我又唔確定自己係咪真係中意佢。我唔想再傷到其他人? 」

「中二三既puppy love好快就過，可能好快你地唔中意大家呢。」
「咁你想唔想拍拖? 」佢繼續講。

比佢一語道破，我呢個年紀既人多數都憧憬愛情，
好想淺嘗初戀既滋味。
「想既，但係………」

「想就去啦，你覺得自己係男神級好多人中意?
如果你怕辜負人就比心機對人好啲，更何況佢唔差，你仲想點?」
佢打斷我既說話，自己係到長篇大論。

佢講完一大論就收左線，叫我自己諗下。
其實我明白佢既苦心，佢擔心我同卓芝越行越埋搞出事，先想有個人分散我注意力。

我決定wts app樂瑤同佢講聽朝係佢巴士站等佢，同佢一齊番學然後比個答案佢。

「早晨。」我向佢打招呼。

「早…早晨呀。」佢面紅紅咁講。

架巴士比預中快要黎，我見佢呆左無意識上車。
我就一手拖住佢「傻豬，上車啦。」我哄埋佢耳邊講。
畢業知道對方中意自己，主導權又落係自己手上，仲有乜好驚?

「啪卡呀女朋友。」佢唔記得嘟八達通。

佢無出聲，淨係緊緊拖住我隻手。
原來佢隻手好細，細到做唔到十指緊扣。
我拖住佢送佢番班房，途中惹黎唔少羡慕既眼光。
一來好多中二女仔都未搵到對象，
二來我拖住呀GEM咁既樣既女朋友，其他男同學點會唔提子我呢?
當我地行到班房既時候，更傳黎一陣超強既歡呼聲。

「我地lunch再見啦。」我同樂瑤講。

「你陪多我一陣呀。」樂瑤捉住我隻手扭計。

「乖啦，我要番上去啦，lunch同你食啦。」
佢終於肯放人。雖然有啲煩，但係幾sweet。

番到自己班房班友係到狂呼，唯獨卓芝無同佢地一齊癲。

「有人要破處啦。」肥森cool住我條頸講。

呢一個早上我成為左佢地既焦點，來來去去都係問我點樣一齊，邊個追邊個。
直到課堂鐘聲響起，我先可以番埋位。

「恭喜你喎。」卓芝不屑咁同我講。

「係，終於有人要。」我回敬佢。

佢「嘖」左我一下之後就無出過聲。
而我既初戀之旅亦正式啟航。





傻豬，上車啦。