某天我脫毒了，走上了情聖之路: 第六十六章 - 道歉

無論我用咩方法都再聯唔到晴晴，
不論facebook，wts app都搵唔到佢既蹤影。
晴晴好似人間蒸發左咁。

我心情頹左好幾日。

晴晴既信都讀左好幾次。

最後我決定鼓起勇氣向小櫻道歉。





我係小櫻房前徘徊。

直至小櫻打開門，
愕然咁望住我。

「搵我？」小櫻問。

「係....係呀......」

「入黎傾啦咁。」





明明前排仲係家姐間房，
而家入到竟然有完全唔同既感覺。

「小狼？」

「係！」

「放鬆啲啦，你係咪有野想同我講？」





「.......我想講....講......對...對對對....」

「傻啦，我無嬲你好耐。」

我鬆一囗氣。

「不過你咁耐唔同我講野真係有啲嬲。」小櫻扮嬲。

「對唔住！我只係......」

「嘻，唔緊要啦，而家無野咪得囉。」小櫻微笑。

女神呀！！！！！

「小狼你做咩笑到咁咸濕？」





「=_="」
「我哪有咸濕？」

「我唔識講，總之咸咸地。」

「得，我地唔好再討論呢個話題......」

「嘻，好啦。」

話說，好耐無見過小櫻笑。

我同小櫻講左晴晴既事。

「佢咁做都係想有一個空間忘記一個唔會中意佢男仔。」





確實無人想自己中意既人唔中意自己。

「無人想愛上一個唔會愛上自己既人。」小櫻講。

「但人總係對那個佢念念不忘。」我講。

「但可以有能力愛上一個人都算係一種幸福。」

突然覺得小櫻好正面。

「吖！我差唔多夠鐘出去！」

「約左人？」我問。





「係。」

我心有好奇。

「約左......？」

「上次同你講果個男仔。」

聽到男仔我個心戚左戚。

「個名好奇怪果個？」

「係特別！！」

有幾特別？




怪雞就雞啦，
好人好姐叫Lancelot，
九成係勾二嫂果啲反骨仔黎。

但又會突然約出街？
我心頭一閃！
不如跟埋出去？

但小櫻都應該有佢既私人空間。

最後我都無跟埋小櫻一齊。

我大部份時間都留左係房打機。

好耐都無試過毒毒樂，
腦海轉過了她們。

而家又回到最初既起點。
其實毒毒樂都唔錯.......

果晚小櫻好夜先番到屋企。
而且好開心，
佢果種笑臉上既甜度，
猶如放滿彩虹碎朱既朱古力冬甩。

果刻我知道小櫻已經搵到佢既幸福。

後來先知道如果呢一晚我有阻止小櫻既話，
可能一切事都唔會發生。