某天我脫毒了，走上了情聖之路: 第五十七章 - 我的足球
落到大度廈門仍然見到嵐嵐係到等我地。
「咩你兩個咁耐嫁。」嵐嵐抱怨。
「你咁唔耐煩咪鬼等。」
「超!你估我等咩?我等我既女神咋。」
「係就好。」
「嵐嵐你今日晏晝會唔會黎同小狼打氣?」小櫻問嵐嵐。
「我做咩要同呢條粉皮打氣?」
「佢今日踢社際乙組既比賽，咁你兩個同社，係咪理應為佢打氣先?」
「又好似有啲道理......」嵐嵐好忘真咁諗緊件事。
「我未至於要埋佢幫我打氣掛。」我細聲係小櫻耳邊講。
「我好失禮你咩?」
頂，咁都比佢聽到。
「好啦，你兩個唔好一見面就頂嘴。」
「咪係囉，中四恰個中一既。」黎若嵐指住我個鼻。
我同嵐嵐真係幾乎每日番學都鬧交，
我有一日真係有諗過掟佢落車。
番到學校，
肥森懷住極興奮既心情向我走埋黎。
「就係今日，我地終於重出江湖!!」
「你神早流流up乜?」
「自從你果日話你會踢社際，佢就開心到而家。」張天欣幫肥森解話。
「你地唔會明白可以再見小狼球場上既英姿係幾咁難我既事!!!特別係佢認真mode果陣!!」
「校內比賽姐，應該唔會認真啦。」
我突然feel到我背後有股寒氣。
「你確定你真係唔會認真?」小櫻臉色有啲沉重。
「我認真踢，只係唔會過份認真....」我急忙解釋。
「我諗你唔好太淡定，中三有一個男仔今年參加左足球，實力唔差，聽講佢為左入球隊而係暑假克意苦練。」
「咁佢都幾有心。」
「同埋我地級有幾個踢得唔差，但無入足球隊既人，聽講佢地今年都聽，所以我地今日既對手綠社可以話羸面最廣。」
「咁你又唔洗擔心，係計分賽先會強敵係好啲既。」
「唔好忘記紫社既阿豪、阿輝，佢地兩個進步左好多。」
「得啦，唔好杞人憂天啦。」
肥森搞到連我都緊張埋。
正當緊張之際，
豪言走左過黎。
「肥森哥睇我今日點樣射爆你個龍。」豪言竟然挑肥森機。
「豪言你係咪想"開心角落"?」
一聽到呢四個字就全班男仔企晒起身磨拳擦掌。
豪言都笑笑口番左埋位。
我唔太明豪言點解會咁做。
「睇你成個木咀咁，一定唔知本來豪言追緊張天欣，但可惜天下間既女子都為我癲倒。」
「定係張天欣可憐你成個木咀咁先愛上你。」
「得到佢個人我係咪都無所謂。」
佢那來的自信呀?
lunch time
我同肥森都換好衫準備出去向社長報到。
「陳浩森、黃少朗.....黃少朗?今日就拜託晒。」社長同我地講。
「我都係黎玩下。」我扮謙咁答佢。
我望望對方既陣容。
好似個個都係運動健將咁。
「果邊果個黑黑實實既就係我今朝同你講果個。」肥森指住一個高大黑實既男同學。
「佢個樣似打籃球。」
雖然佢低我一form，
但生得比我高。
「同學們黎拎龜背。」社長。
我揀左我最中意既12號。
突然有人拍拍我。
「你就係小狼?我叫林定熙，多多指教。」佢伸隻手出黎視意想握手。
同我打招呼既正係岩岩果個黑實男同學。
我亦微笑握手回禮。
雖然佢表面係黎示好，
但感覺上似係黎下戰書。
開波前小櫻黎左搵我。
「加油呀。」小櫻雙手拍拍我面。
「睇我表演。」
講完我就行左去右閘位準備開波。
我望望校園四周。
果然有好多人圍觀。
嵐嵐坐左係我(紅)社既後備席附近。
家樂同阿謙都落左黎睇。
就連柔柔都係到。
見到柔柔我就有種戚戚然既感覺。
「黃小狼，放鬆啲，當普通踢波就得。」肥森安撫我。
我緊張既唔係球賽，
而係柔柔眼目，我已經專心唔到。
雞聲響起，比賽正式開始。
一開波，我方中場已經好積極咁進行搶截。
成功搶截後，黎一個快速反擊，可惜係禁區頂比定熙截左傳球。
定熙扭過兩人放一個直線比自己前鋒，
個直線直接穿過我方中堅，
對方前鋒以速度壓勝並起腳射門，可惜過唔到肥森。
肥森將波傳比我，
對方前鋒各向我跑過黎，
我直接長傳比自己前鋒，但比對手中堅截住。
「小狼你帶多兩步，我信你。」肥森建議。
「嗯。」
總感覺想打得穩一啲。
定熙控制住整個中場線，
我方被壓住黎打。
對方更好幾次壓過中堅，射出幾球威脅性既射門。
好彩我地有肥森擺關。
半場已零比零結束。
「我地放棄中路既進攻，全改用邊路。中路已經被對方中場(定熙)控制晒。」肥森招聚大家。
「係，我一拎到波就比佢搶到。」我方中場歎息。
「對面前鋒跑得好快。」我方中堅抱怨。
「我地仲有機會，所以中場同中堅首要顧好防守先，我地盡量穩守突擊，多靠邊路。」肥森隊長繼續提出戰街。
準備開始下半場前，肥森單癌獨同我講左兩句。
「你放心攻上去，我地唔死守得幾耐，你唔參與進攻既話，我地無得羸。」
「得啦，因間打邊進攻我識做。」
「唔洗驚，你放心攻，你後面仲有我。」
下半場，由我地開波。
我地繼續3-1-2既陣式。
中場傳左個波比我，
我向前推左幾步就傳番個波比中場。
中場傳比右前鋒就向前跑，佢地做左個one two。
但第三腳就比定熙截到。
個波出左左邊界。
「右閘你壓前啦。」中場指住我。
我做左個OK手勢。
但我真係好怕回唔切防。
我地幾次進攻都失敗，仲差啲被人反擊成功。
個中場終於忍唔住走埋黎鬧我。
「你成日龜係呢到做乜?走位啦唔該。」
我係右閘，當然以打好防守為先。
進攻係其次。
我地繼續嘗試邊路橫傳既攻擊。
仍然無功而回。
定熙截到我地既直線傳球，
扭過左我地既中場同中堅，然後橫傳比佢既前鋒。
我緊緊截到傳球，將個波清左出界。
對方開出一個好靚既角球，比高大既定熙頂入左。
0 - 1
「換走個右閘啦，都唔知係到做乜。」我方中場指住我黎鬧。
「比佢踢多陣，佢OK嫁。」肥森幫我求情。
呢個時候，定熙走左過黎。
「你真係黃少朗?」
「要唔要比學生證你睇?」
「你仲夠膽認呀?咁又係，得個夠名，唔認盲乜都無嫁啦。」
定熙揶揄完我盲行番去自己半場。
「你唔洗理佢講咩，你踢番自己就得。」肥森繼續鼓勵我。
「不如真係換走我啦。」
「你講咩?你望下四周，我以為你已經重新振作，你望下小櫻，睇下佢幾擔心你。」
的確小櫻全程都注視我。
我不禁又望下柔柔。
我地好似對視緊對方。
柔柔向我點點頭，樹起拇指向我加油。
我唔明點解佢要咁做。
但覺得好開心。
一年前柔柔都係咁樣睇住我踢波。
我以前踢波係點?
好似忘記左踢波既感覺。
係我太耐無踢?
唔係.....係一種陰影。
我好驚失敗，
害怕認真全力之後仍然敗北既失敗感，
害怕因我而令到其他人都失敗。
比賽再度繼續。
隊友再無繼續右路既進攻。
可惜左路既攻門亦被封絕。
我奔向中路阻止對方既反擊。
再單鎗進行反擊，推到禁區頂趁對方中堅來截前起腳揪射。
但中眉彈出。
對方龍門球。
我地亦重整陣容。
「小狼咁就岩啦。」肥森大叫。
「嗯。」我向肥森點點頭。
心裡有一種喜悅，
一種被別人接受既喜悅。
多麼懷念呢種感覺，
其實我點解會放棄足球？
我好似因失敗而忘記我喜歡足球既感覺。
我想再一次享受踢足球既感覺，
果份出盡全力揪爆龍門既感覺。
「射呀黃小狼！！！！」肥森大叫。
1－1
肥森係龍門衝出黎慶祝呢個入球。
但我無在岩岩既記憶，
淨係記得我係到諗緊想再享受足球。
啊！我醒起我有一個中二病狀態，
請容我說一句...
「Serious Mode, on!!!」
「痴你孖筋等到我頸都長埋，將個波交比小狼！！」肥森號令我方中場球員。
我接過傳球後就大推一下，
再用“牛尾”推過防守我既球員。
定熙向我跑過黎，
我大推一下再直接加速，
同定熙進行一次身位速度戰。
我地互不相讓，定熙係身形上確實稍佔優勢。
「我身位勁過你，你放棄啦，你已經過時。」
「你羸到黑豹先再講。」
我速度全開，快過定熙拎到個波，
我再做左一下“Spain Left”扭過埋定熙。
對方中堅走埋黎閂閘，
我做左一下Fake射令佢地疾步，
推過佢地後就剩下我同守門員，我毫不留情向死角怒射。
呢場比賽唔單係一場勝利，
我終於找回“我既足球”。
找回屬於我既歡呼聲。
不過呢一切唔只屬於我。
「羸左啦！」肥森向我衝埋黎。
「贏左啦小狼！！」
小櫻衝埋黎攬左我一下。
「好多人望住。」
「唔緊要啦，開心丫嘛。」
「呀欣我又要。」肥森向天欣提出要求。
「你唔洗諗，成身汗。」
雖然張天欣口裡說不，身體卻很成實。
正當我地慶祝之際，
定熙行左過黎，
「下次我一定會羸你。」
「我隨時都奉陪。」
突然有人係咁拍我背脊。
「原來你咁勁嫁！？」
原來係嵐嵐。
「你就黎連我個肺都拍埋出黎。」
「你咁勁拍多幾下都無野啦。」
「嵐嵐你真係會拍親佢。」小櫻阻止嵐嵐。
「車，比你嫁。」
嵐嵐拎左枝寶礦力出黎。
「咁客氣呀。」
「咁岩有人請我飲，但我唔中意所以先比你。」
「知啦傲嬌既小朋友。」我摸摸嵐嵐個頭。
「妖你咪摸啦。」嵐嵐撥開我隻手。
同時我望望四周，
已經搵唔到柔柔既身影。
其實我都想將呢份喜悅同佢分享。
其實我仲未習慣無左你係我身邊。
接下來又要準考試。
而剩低既比賽都會係試後繼續。