某天我脫毒了，走上了情聖之路: 第五十四章 - 平安夜
「今晚係平安夜你唔出去?」小櫻問我。
「不嬲平安夜都係留係屋企打機。」
「Um...點解唔約人呀?」
「唔想出去同人逼，食野又貴。你入黎坐啦，企係門口做咩?」
「未問過你嘛，你又係到打機。」小櫻坐係我床邊。
「嗯.....係呀.....」
我已經打到分身不暇。
「你當我唔係到就得啦。」
「下?....哦。」
小櫻一路係到望住我，令我周身唔取財。
完左局之後我就稍稍退場。
「同學你做咩係到監視我呢?」
「好奇所以望下。」
「咁你有咩結論?」
「想試下。」
「真的要?」
「嗯!」
既然小櫻鬥志十足我都唔潑佢冷水。
直接開比佢玩。
.
.
.
.
.
.
.
.
「睇住佢放技!」
小櫻反應其快咁避開對手既攻擊。
「你真係新手嗎?」我問小櫻。
「係呀。」
「點解你好似好熟對方既攻擊咁?」
「岩岩睇你玩果陣都有呢個人物，所以就知道佢大概既路向。」
睇黎小櫻唔單只係天菜，仲係天才!!
真係好想毒佢打機。
有佢做隊友應該輕鬆唔少。
「小狼，你餓唔餓?」
「有少少。」
「咁我整埋你果份。」
「唔洗啦......不如落去食。」
「落去食?」
「係!快啲換衫。」
換完衫就帶左小櫻落去東大街果頭。
「你想食串燒定中式糖水?」我問小櫻。
「ummm......我兩樣都想食。」
「咁就食晒兩樣啦!!!」
「老闆! 沙嗲牛、雞、羊各一串!」
「阿朗咁夜既?」老闆問我。
「咁岩肚餓。」
「咦?女朋友仔?」
「唔係!!!」
「可惜可惜，不過今晚的確要食飽啲既。」
老闆滿滿含意既說話令我同小櫻好尷尬。
「趁熱食。」
「好好食呀!」小櫻幸福滿滿。
「你食到成嘴都係。」
因無紙巾既關係，
我情感就用手抹左小櫻嘴角邊既沙嗲汁。
「唔...唔該。」
「哈哈.....去埋糖水。」
「好呀。」小櫻心心眼。
其實係咪個個女仔都咁中意食野?
因為食野對我黎講只係為左生存而已。
「小狼你就好啦，屋企附近咁多野食。」
「都係，落街買野食點都唔會厭。」
「即係我而家到一樣，每日都可以食唔同既野。」
「到時娛左肥櫻唔好出聲。」
慘了.....咁我咪要成日陪佢落食?
「我好難肥，唔怕!!!」
「你確定? 比起我岩岩識你，你好似肥左幾磅咁。」
「下!? 真嫁?」
「嗯。」
「咁我唔食啦。」
小櫻將佢碗糖水推左比我。
「都食左咁多，唔差在啦。」
「又係丫可......=p」
「食完糖水不如行下，岩岩搬黎都未行過呢到。」小櫻請求我。
食完糖水我帶左小櫻去海旁。
果然平安夜有好多一對對既情侶係到。
「香港既夜景真係好靚。」小櫻望住維港既景色。
「嗯，其實日本應該都差唔多。」
「差啲啦，都係香港靚啲。」
「通常都係隔離飯香。」
「咁小狼會唔會都覺得隔離飯香?」
感覺小櫻既說話好似有含意咁，
但又get唔到係啲咩。
「應該都唔會既，我向來都好知足。」
其實只係我無慾無求。
「咁唔怪得小狼成日都咁開心啦。」
「哈哈，係我on居居姐。」
「真係好，可以咁平和望住個海。」
小櫻突然轉左話題。
「係，最近真係發生左好多事。」
「哈，淨係得你發生好多事咋。」
「我咩事都無，不過係估唔到你果頭要走，呢頭就住左係我屋企。」
「其實我住係你屋企係咪為你帶黎左好多麻煩?」
「當然唔係!!!」
「咁就好，其實我要走果陣你係點諗?」
小櫻要走果刻，
我既感覺係點?
只係唔想佢走，
點解?
因為我地係朋友，係好朋友。
「唔開心囉。」
「噢~估唔到小狼會因為我而唔開心喎。」小櫻輕佻咁講。
「咁朋友走緊係唔開心嫁啦。」
「小狼你面紅。」
「無！係啲街燈影響之嘛。」我慌忙口亂。
「嘻，小狼總係將啲說話放晒係個樣到。」
「邊係呀！？你夠總係中意整蠱我，平時又扮到斯斯文文咁。」
「你平時夠扮到嘻皮笑臉咁啦。」
「咩扮？我根本就係個咁的確既人！哼！」
「唔祗嘻皮笑臉，仲好孩子氣。」
「你夠啦......」
小櫻呢啲說話令我好尷尬......
「呢到得我同你，有啲事總要講出黎。」小櫻語氣不再輕佻，帶點溫柔同安慰。
「唔明你講咩。」
「你覺得我會信你真係因為上唔到PE堂而唔開心？」
好似又比小櫻睇穿咁。
「我因為無帶衫而要去罰企，途中我見到柔柔......」
又再諗起柔柔當天喊住同我講既說話。
我嘗試吞吞口水回過神再講。
「柔柔表現得平平無奇，本應我係開心，因為佢無再為我而傷心，但我頓時回想起佢話唔想再見到我既果句，心頭就好痛.....」
我又開始控制唔到自己既悲佳感。
小櫻輕輕篤我額前。
「係咪仲好中意佢？」小櫻直接咁問我。
我無答佢...
係答唔出.....
亦係唔敢答......
小櫻呢句說話擊中我最痛最傷之處。
“我仲中意柔柔？”
一個我唔敢問自己，亦唔敢直視既問題。
小櫻又突然輕輕係我臉上抹左一下。
我顎然望住佢。
佢只係溫柔咁回應我既眼神。
我摸摸自己塊臉，
好似有啲水係到。
「放心喊出黎，唔好再忍啦。」
喊？
係....
果啲應該係我既眼淚。
我迷網咁望住小櫻既瞳孔。
小櫻咩都無講，
只係向我點左一下頭。
然後我有左一個意識。
一個哭既意識。
小櫻攬住我個頭，再放係佢既肩上。
「對唔住呀，我真係忍唔到啦。」
其實我心知唔係我忍唔住，而係小櫻專登引爆我。
即使係咁，我都知佢只係想我舒服一點。
我係心裡有問過點解小櫻要咁做，
亦有諗過小櫻點解對我咁好？
點解小櫻好似一直注視我咁？
百問無一通。
呢刻我淨係知我需要一個知道我所須既人。