某天我脫毒了，走上了情聖之路: 第四十三章 - 率直的女孩
「Hi。」我向小櫻打招呼。
「Hi。」
「等車?」
「係呀。你呢?」
「我都係呀。」
因為新同學既關係，完全唔知可以講咩。
成個氛圍好尷尬。
「你係咪叫小狼?」
「係呀。」
「咁你一定好中意CLAMP啦(百變小櫻/Tsubasa翼既作者)。」
「都無話特別中意。只係我個原名少朗同小狼既音相近，好多人都會懶音讀錯，所以啲人叫叫下就直接叫左做小狼，同套動畫無乜關係。」
「仲以為你都好中意。」
「雖然我咁講姐，但我都有睇曬兩套，而且覺得好好睇，雖然翼係尾段有啲復雜。翼既小狼繼承左佢爸爸(百變小櫻既小狼)既名字去搵番自己個小櫻。」
我同小櫻一路講”小狼同小櫻”既故仔講左好耐….
除左岩岩講果兩套之外，佢仲睇左好多漫畫。
日本女仔果然係唔同啲，完全無鄙視漫畫呢樣野。
「咁點解你識咁多中文既?」
「爸爸係日本人，媽媽係香港人，我頭頭係香港出世係呢到讀左一陣書就番左去日本，之後爸爸有需要番黎香港呢邊，所以我就轉番黎香港。」
唔怪得中文咁流利。
咁佢算唔算係識講中文既日本妹?
雖然唔係純種，但生物學角黎講越係混種就越靚。
「我要上車啦，多謝你同我傾計。」小櫻有禮貌咁同我道別。
「你想既話可以隨時搵我傾…。」死…衝口而出。
「6920 7413。」
佢講完個number就跑左上車。
我連問佢住邊都唔記得。
不過唔緊要，仲有幾年可以見佢。
6920……之後果四個號碼係咩?
頂，諗極都諗唔起…..
都係算啦…..
聽日問佢都未遲。
我係屋企打機到黃昏就落樓買M記。
回程果陣見到有個女仔坐左係大廈門。
套校服好熟口面，個情景都好熟，好似曾經遇過咁。
個女仔抬頭一望，我屌左一聲。
「洗唔洗一見到我就屌屌聲?」黎若嵐不爽咁望住我。
「嚇親姐，一個中一女仔成個怨婦咁坐到。」
「妖，見親你都無好野。」
「大家咁話啦，咁你做咩唔番屋企?」
「我…無帶…..關你乜事姐!!!」
「哦，咁你慢慢坐。」
「餵!陪我坐一陣。」黎若嵐扯住我衫尾。
「得啦，咪扯。」
傾計過程得知佢原來都係住呢棟大廈，同埋佢原來無帶鎖匙。
「坐係到都唔知等到幾時。你餓唔餓?」
「你想做咩?你唔好諗住拐我。」
「哦，咁你自己坐係到。」
我拎左個包出黎食，不出我所抖，佢果然係肚餓，係咁望住我個包。」
「你係咪想食?」
「唔係喎!!」
「唉，我請你，行啦。」
「嗯…咁好啦。」
最後我帶左佢去M記。
因為我手上果個M記只能拎番去M記食。
個餐一到佢就零儀態咁暴食。
「你食到成個嘴都係。」我提佢。
「嗯!餓呀嘛。」佢成個口都係野，完全聽唔到佢講乜。
「你慢慢食啦下。」
我望住佢，佢亦都掛住食，無理我既視線。
望真係啲，其實佢都幾靚女，佢個瓜子臉尖得黎唔會太奇怪。
臉珠既肉量唔會太多，輪廓好清，對眼唔係果啲大到冷係可愛咁果啲。
大細岩岩好，同佢既蘋果肌完全相襯。
佢唔講粗口，靜靜地其實都幾養眼。
但佢個樣真係好熟口面，個名都係好似係邊到聽過咁---嵐嵐。
「屌你望完未?」
OK….真係一開口夢碎。
「好心你女仔就咪咁多粗口啦。」
「只係對住你就唔知點解想爆粗。」
我好歹都請佢食野，竟然多謝都無句，仲要話見到我就想屌我。
「快啲多謝我。」
「下?」我下巴跌到差啲要搵閻王幫我接一接。
「下咩，多謝我比個機會你請我食野。」
「你係咪傻撚左。」我開始燥燥地。
「嘻，講笑咋，多謝你陪我仲請我食野。」若嵐向住我微笑。
佢既微笑確係幾迷人。
有一種治療力。
果然係同柔柔血脈相連，睇怕呢個係佢地既血繼限界。
「下次有機會請番我食啦。」
「唔那得呀，我屋企好嚴，除左交通費之外，唔會比零用我，如果想出街要入紙申請。」
「咁由佢，我都係講下。」
「咁啦，我比我電話你，就當係呢餐飯既回禮。」
「唔洗，我請你食野又唔係為啲咩既。」
「你要啦，我唔慣爭人野同受人恩惠。除非你嫌棄。」
呢番說話我都好似同卓芝講過。
估唔到我同佢都會有相似既地方。
「好啦好啦，怕左你。」
我遞我部電話比佢。
「嗱，你要同我wts app嫁。」
「好心你比啲矜持啦。」
「我先唔中意轉彎抹角。」
「咁即係你想同我wts app。」
「!!!!!!!我比得電話你就緊係想wts app啦!!」若嵐感覺有啲怕醜。
「save咩名好?」
「嵐嵐…..」佢講得好細聲。
「咩?」
「嵐嵐呀!!!」
「你係咪好熱?塊面焗到紅曬。」
「係呀係呀….夏天丫嘛，哈哈….。」
嵐嵐屋企人終於打比嵐嵐。
我同佢一齊番去，畢竟住埋同一棟。
真係無諗過竟然有同校既人住埋同一棟大廈。
嵐嵐︰「今日多謝你，聽日一齊番學。」
我︰「唔好。」
收到嵐嵐呢個wts app雖然有種莫名既開心。
但如果我同佢一齊番學既話，實會招人話柄。
嵐嵐︰「好失禮你?你小心，我知你住邊。」
嵐嵐既言行同佢既樣完全唔成正比。
相比起柔柔就唔同，知書識禮，花容月貌。
第二日我勢估唔到嵐嵐居然企係大廈門口等我。
仲要一見到就大字形攤開擋住我。
「哈!仲唔比我捉到你!唔好諗住走呀契弟!!」
「你阻住人呀。」
「點知你會唔會呃我走左去。」
其他人睥住我搞到我勁唔好意思。
佢地既眼神話比話緊比我聽「快啲搞掂你條女，唔係就我地搞掂你!!」
我行埋去捉住嵐嵐背嚢條帶「好啦，再唔行就遲到啦。」
「要記住邪不能勝正呀契弟!!!!」
「遲到就唔方唔契弟啦。」
「咁你行快啲。」
「得啦短人。」
好似唔記得交代嵐嵐身高。
大概只有147~150cm到，唔肥，肉脂分佈比例係A+級，S級為最高。
絕對係萌高度，但開聲果下唔方唔萌….
「你係咪中意我表姐?」嵐嵐突然係巴士問我。
「你講咩?」
「問你係咪中意我表姐呀耳殘!!!」
「當然唔係，我地只係朋友….。」
「妖!無膽，正契弟!」
「我都係講事實姐。」
「你同表姐既事我大概都知，所以我好討厭你。」
「其實我都好討厭我自己。如果唔係我亂下決定，柔柔就唔會受傷….」
「我知表姐仲好中意你，只要你開聲就可以….」
「你特登搵我就係講呢啲野。」
「唔係。純粹想搵你陪番學，順便講埋。」
「哈哈，你都幾奇怪，識我第二日就搵我一齊番學。」
「我唔係第二日識你。」
「我地之前有見過?」
「自己諗下!」
「你講啦，我老唔記得。」
「落車啦。」
嵐嵐一枝箭咁跑左落車。
感覺嵐嵐好似做緊以前同柔柔一樣既野。
只係性格完全相反。
「小狼?」
「柔柔~」
「你同嵐嵐一齊番?」
「係呀，咁岩住埋同一棟，佢約埋我番。」
「哦..哦。」
「我地無咩，係喎，點解之前無聽你提過你有表妹同我住埋同一棟既?」
「我同佢見面唔多，雖然有wts app傾電話但佢屋企好嚴，我好少同佢出街。佢都係最近先搬去你果到。咁我地暑假又無搵對方….」
「原來係咁，佢好似知道我地啲野咁。」
「我有同佢講過下…你唔中意?」
「唔係唔係，多口問下。」
「哎!要行快啲啦。」
總覺得我同柔柔好似多左層隔閡咁。
係因為我地意識到我地要遠離對方嗎?
「係!嵐嵐同我唔一樣，佢比我開朗好多，係個率直既女仔，同佢一齊會無乜煩惱。」
係叫我遠離你，搵第二個代替你既意思嗎?
「嗯，佢真係好率直。」
我地係咪唔應該再搵對方，唔應該再見面住?
我突然想番轉頭，但已經番唔到去………