【武館MK學生妹。死毒男。人格分裂Miss。】: 【六】

【六】

「喂，你今日又呢埋係屋企啊？」第二日朝早，我媽拍我膊頭問。

「冇辦法啦，我點知班人會係舅父個報紙檔個頭蒲頭先得架。我比人打唔緊要呀，舅父都係搵兩餐架咋，廢事佢比人打啦。」

「呀女，咁落去唔係辦法架喎。正正經經返學又好，去搵份工又好，都好過咁樣呀！」

「咪玩啦，唔返學啦。我返黎都冇用啦，我都讀唔到書既。」





「咁返工呢？」

「你有所不知啦，」我係張床度坐起身，「依家度度都要識英文，連做報紙檔、7仔都要英文，我點返工呀？咪玩啦。」


「咁你想點呀？你講啦！」呀媽突然發惡，「咁唔識英文咪正正經經返學，學好佢囉！你依家先17歲，你點捱到70歲呀？依家返工唔好話英文，d人開始學埋普通話、日文、韓文，你冇可能一直唔搵工落去架喎！」

「我都唔知呀……我好亂呀！」講到躁底，我就即刻訓返落床蓋被。






「呀媽就係太清楚你會咁，」呀媽突然坐低係床上面，「所以我已經偷偷地幫你搵左王秀麗，佢話冇問題，叫我地聽日去見一見佢。」


「WHAT THE FUCK？」我嚇到成個人彈起身大叫（英文粗口我識既）

「學費個度佢話可以再商量收平我地，因為係私立學校所以收你冇咁嚴，應該可以過到骨……」

「但係我邊讀得上呀？人地名校……」

「入左至算啦好嗎？讀唔上先至再好似今日咁樣死蛇爛鱔啦！」





第二日，我就跟住呀媽行返去威廉書院。
由於我冇著校服，著住小背心、超短牛仔褲
加上染左個銀白色既頭，所有學生都以奇怪目光望住我。


「早晨，王校董！」前面一行女仔向住我地微微咁45度彎腰，我拎轉身先見到當日個呀嬸。

「啊！你係上次個個呀嬸！」我見到佢出現，不禁驚訝大叫。

「個女仔講咩話？呀嬸？」個一排女仔即刻好譁然，「咩人黎架？咁無禮既……」


「Hello，你就係當日個個女仔？請入黎坐低先再講！」於是我地就走左入佢間房坐低。





「早晨呀，王校董！」我媽微微咁鞠躬，「叫人啦！」然後好大力咁撞我一下。

「早晨……」

「唔好意思，年輕人係生寶d既……不過唔好誤會呀，我個女雖然睇落係野性豪邁d，不過佢好乖女架！」

「明白既，明白既。之前發生既事，我同你媽咪係電話度都略有聽聞過。真係唔好意思，竟然因為我而連累到你比人退學。」

「邊關你事呀，咁當日的確係我郁手打柒班人先既！」

「喂，唔好講粗口！」呀媽即刻大大力咁批我一下，提我唔好講粗口。

「啊……Sorry……」

「唔緊要、唔緊要！既然係咁，我都要為呢件事負責既。咁啦，我都知道一時間要你轉校過黎威廉書院，係比較難適應既。」王校董拎起手上面既月曆牌，揭左幾頁。





「嗯……聖誕假前啦！如果你覺得okay既話，聖誕假後就繼續留低，唔okay既，到時我幫你再轉介去其他學校，好唔好？」

「下？但我……」

「好、好！就咁話啦！呀女，仲唔快d多謝人！」呀媽一邊講，一邊大大力咁撳我頭鞠躬。


「咯咯……」突然有叩門聲，然後一個著住黑色西裝，成個管家咁既呀伯走入黎。
「我地書院既校服拎到黎啦，請問有咩需要？」

「哦，你放低得啦。」然後管家就出返去。

「之前同你媽媽傾電話略有聽聞你屋企狀況，我地套校服確實係比較昂貴既，如果你最後決定離開，咁豈不是浪費左一筆金錢？咁所以我特意叫管家將舊時校友所贈既校服帶過黎，你度下岩唔岩身。」





「都okay既，剛好遮到屎忽，掂！」我拎住條半截裙度一度上身。

「岩！岩！岩！一定岩呀！」呀媽即刻好大力咁扯長條裙，扮到去到大脾咁樣。

「咁就好啦！另外，呢本係我地學校既校規，希望你今晚可以睇曬佢。」

「下，咁厚……仲要係今晚內？嘩，雞腸黎架喎，點睇呀……」

「我地學校課程進度係比較趕既，咁所以我希望係聽日就開始上課。」



聽日？我冇聽錯下話……






「夏子琪同學，咁你記得染返黑把頭髮佢啦！」