【武館MK學生妹。死毒男。人格分裂Miss。】: 【二】

半夜三更先返屋企已成習慣，開閂鐵閘一早唔需要就住度力。

「阿女，你去左邊度玩呀？」我單親家庭出身，屋企得一個呀媽，幾十年前佢都係一個MK妹，老竇一早就走左佬。

「呀詩生日，去左唱K囉。」

「衰女，玩還玩，唔好?咁多錢呀。」呀媽飲完罐酒，輕輕搖兩搖，然後又係雪櫃拎罐新酒，好熟手咁就開黎飲。

「大家咁話啦，唔好飲咁多，傷肝。」





「飲左幾廿年啦，要傷既話乜肝都傷曬。」

我坐低，撳開部電視，一邊係個褲袋度摷堆野放上餐檯面。


「咩黎架？威……呢個字點讀？啊，威廉書院？好出名個間？你拎張野返黎做咩，轉死性呀？」

唔好睇我同我媽講野好似好冇禮貌咁，其實只係因為我地都唔係咩斯文人，關係又深厚先會互相窒黎窒去。

「哦冇咩，頭先散水個陣，有個呀嬸比人圍，咁我幫佢打走班人，之後佢咪塞張咭比我話想轉校就down聲喎。我都諗住一陣扔左佢架啦，唔駛理。」





「威廉呀……威廉好呀……」我媽拎住張咭，醉到面紅紅咁講。

「咪痴花膠啦，你以為係男人呀？名校黎架，好好好。」我一下搶返走張咭。

「唔羨慕咩？幾好啊，威廉幾好……」我媽開始醉，指住我問。

「佢好又點，我唔好呀嘛！傻啦！」我苦笑道。

「轉啦……轉左開心d……唔駛好似我咁……」呀媽又大大啖咁飲酒。





「咪痴線啦……喂，咪飲啦，醉啦，我扶你返房訓。」我拎走佢手上罐酒。

「冇痴線！我冇痴線！」我媽醉到愈來愈激動，好大力咁捉住我手臂。「唔好學我……冇鬼用，字都唔識多隻！又冇錢！又比佬昆！我最冇用！」

「醉啦，入房訓啦。」

「你估我好想醉架？如果我讀書好d，咪唔會去玩囉，唔去玩咪唔會識到你爸，唔會比佢搞大個肚……想讀都讀唔到……又搵唔到份好d既工……」

「唔好再講啦，講黎做咩呀……」

「唔好學我……唔好學我……威廉！好！非常好！」我媽一邊比我扶入房，一邊好大聲咁話好。


我望住張咭片，反正都唔可能發生，為免我媽又見到唔開心，我打算即刻扔落垃圾桶。





「唔羨慕……你唔即刻扔？你帶返黎？威廉……好啊……」我媽指住我，狂笑住咁樣講。


羨慕啊。羨慕咁又點。


「Yo！阿Kay！」第二日下午我先至返到學校，成班好姐妹一見到我就整個  既手勢。

可能你會問，點解我呢個mk妹冇男朋友。

雖然我係個mk，但我唔係靚女，平板身材
只能講係個正常樣既女仔
行為又男人咁粗魯，而且女仔之中拳腳最重既人可以話係我
有邊個男仔會想溝一個打交仲勁過佢地既女人先？





相反我老死呀詩就唔同
佢唔多識打交（有我係度佢駛鬼打咩）
生得樣靚身材正，長頭髮大眼睛。
咁當然，咁正既mk妹，自然係一個公廁。

不過咁
呀詩份人幾有義氣既
有人性亦有異性
從來唔會比仔勾左去就當我冇到。

「我同條仔散左啦又。」

「哦……係咩？」Sorry我咁冷淡係因為我完全唔知佢講緊邊條仔。





「唉，好sad呀。」

「唔好sad啦。」挑，第二日你又有新仔啦。

「好想死啊！生日先分手！」

「唔好咁啦，頂多今晚陪你再唱過K啦！」挑，上次新年倒數分手你都頂到啦。

「唔唱啊！一陣又喊又諗起佢……」

「……」你玩曬啦咁。


「咦，出面個幾條友咩人黎架？今朝已經企係度啦喎。」呀詩望出窗指住門口。





「咩呀？路過咋下話？」我望過去，先發現係尋晚個幾件金毛仔。


仆街，唔通真係班馬過黎尋仇既？

「咩事呀，面都青埋咁既？」阿詩見到我面色唔妥。

「尋晚，同你地bye左之後，打柒左呢班人……」

「下？佢地又知你係度讀？」

「咁我著住校服架嘛……」

「係喎……咁點呀？過去打多鑊囉！」

「但佢地咁齊人，肯定有準備先至過黎。」

「又係喎！咁點呀？」

「點啊？放學爬後面幅牆走囉！」

「啊～乜咁煩架！」