【武館MK學生妹。死毒男。人格分裂Miss。】: 【一】

大家好，我叫阿Kay。係你地口中既MK妹，不過我係高一級既MK妹 - 讀緊武館中學既MK妹。

食煙飲酒講粗口是常識吧
如果係西洋菜南街上面影落去
我一定係擔住口煙，字幕出句「訓啦柒頭」個個MK妹。

原本我都以為自己會一世MK落去。

直到有一晚，尋常既旺角之夜
改變左我一生。





個日我好姐妹生日
我地食完放題慶祝之後
直落唱埋深宵K先至散水。


「喂，咁聽日返學再見啦，我地行呢邊走！」
「好，聽日見！」
我住係旺角附近，而朋友去搭小巴
所以我行另一個方向走。





其實幾點我已經唔記得
有冇小巴我都唔係幾清楚
總之就夜到條街鬼影都冇隻個種。

「喂！死八婆！你撞到我大佬喎！」突然間，前面有個呀嬸比成班金毛圍住。

「下？先生，我冇撞到你地喎。」

「大佬，佢有冇撞到你呀？」金毛甲輕輕一拳打落金毛乙既心口度。





「哇，好痛呀！有呀有呀！」

「阿婆，你見啦，我大佬話好痛呀。識做啦？」

呢個時候，呀婆亦好清楚發生緊咩事
於是打開手袋，想拎錢打發班金毛走。


「收返埋個銀包佢。」我走上前，捉住呀嬸隻手。

「關你撚事呀，八婆？做架兩呀？」

「我係後面一直望住，呢位太太冇撞到你地喎。」





「我大佬依家話有，個呀婆自己都話有。咁你搭乜撚野嗲呀？臭西！」

「你話我咩話？」

「我話你臭西呀！半夜三更仲著成咁樣擔住口煙出黎，扮咩正義朋友呀？正、臭、西！」金毛甲講完，後面班金毛兄弟即刻附和笑曬，然後拍曬手咁。

「算啦，多一事不如……」呀嬸係後面拍一拍我背脊。


「算？哈，」我冷笑，「原本單野呢唔關我事，我就真係諗住算既。不過依家佢得罪既係我。」

「嘩！芝娃娃發脾氣呀！」

「哈哈哈哈……」





唔知道係哪兒來的勇氣，我一惱之下，一拳揮過去金毛甲塊面度。

「屌你老味！省鳩我兄弟！」其他金毛即刻衝上前想打我。

前面提過，我武館中學出身
我既對手唔止係女人，仲有大把男人。
所以拳腳既野，我一早就習慣曬
男人通常點出拳，弱點係邊，我都略知一二。

男人做對手，最直截了當既方法
當然係搵盡辦法，一腳大大力咁踢佢春袋。


今時既MK仔唔同往日既古惑仔
把口就粗口橫飛，講到自己幾好打咁




一句著曬，又話吹雞圍揪
實際上就手軟腳軟，連馬都未?穩就學人揮拳。
對於我打慣交既人黎，即使佢地係男人
三兩下手勢就打到佢地訓係度。

「仲臭唔臭呀？」

「死八……」我即刻補多腳落金毛甲春袋度。

「唔臭……唔臭……我地走，條女喪架！」
班金毛即刻拐下拐下咁跑走左。


「唔該曬你呀，妹妹仔。」
其實我掛住打交，都唔記得左個呀婆係我後面。





「唔駛啦！我代自己出氣姐！頭先你唔驚架咩，做乜企定定唔走？」

「一個為我出頭既人都有勇氣企係度，我諗唔到我要逃走既理由。」

「啊……睇唔出呀嬸你都幾有骨氣架喎！」

「呢句說話應該我黎講至岩，依家既年輕人，甚至係中年人，都一早唔知道道義兩個字點寫。」

「哈！拿，你睇我咁既款呢，都唔係幾識寫字架姐！喂，咁你自己走O唔Okay先？Okay既我就撇人先啦！」我拍一拍呀嬸既膊頭，轉身而去。

「小姐！咪走住！」呀嬸一路叫，一路小跑追上黎，「呢個係我既咭片。」

「威廉書院校董會會長，王秀麗？嘩，咁咪即係排名數一數二，好鬼勁揪個間中學？哈哈，我讀個間就無謂問啦，武館中學黎講都算係數一數二好打既！」

「我見小姐你都係一個好人，今日對我有恩，有冇興趣入黎學下點寫字？」

「下？我？咪玩啦，我都寫到字架！自己個名呀嘛！」

「認真考慮下，你想插班入既話，打電話比我，我隨時都歡迎你轉校過黎。」秀麗嬸拍一拍我膊頭，然後就收好咭片盒，揚長而去。

【一 完】