女神從Online Game走出來了: 09 見家長
「主人做咩無晒心機呀．．．？」伊語吃著早餐說
「無．．．無嘢．．．」我看著月卡
「其實張卡．．．係咩嚟架？」伊語有點擔心地看著我
我沒有回答，但我看著伊語．．．我已經開始不捨得讓她離開了．．．難得身邊有一個對我這麼好的精靈．．．而且這樣漂亮可愛．．．
嗶～嗶～嗶～
手提電話響起，我拿出來看，原來是一個訊息。
「記得今晚來吃飯」
是父親傳過來的．．．對啊，我都忘了今晚是家庭聚會．．．雖然我不太想去．．．
「主人．．．」伊語擔心得耳朵都垂下來了．．．很可愛呢．．．
我問：「伊語，今晚．．．同我屋企人一齊食飯好無呀？」
「主人嘅屋企人？？好呀！！」伊語很期待說．．．情緒變得真快．．．
雖然單純的伊語好像回復生氣了，但月卡的事始終困擾著我．．．根本沒可能放下不去想．．．今晚又要回老家吃飯，又會吵起來吧。
．．．．．．．．．
看看時間，好不容易要放工了．．．每天都因為縮小了的伊語而提心吊膽．．．我有長白頭髮了吧？
Apple走過來我的坐位說：「流主，你今日心情好似麻麻地喎，定係成熟左啦？」
「唔．．．成熟左所以心情麻麻地掛．．．」我說
「學人苦中作樂呀？其實．．．有咩唔怕同我講喎。」Apple拍拍我的肩膀說
「無事呀．．．」就算有，也不會在伊語面前說
Apple關心問道：「咁啦，今晚我請食飯，慢慢傾，好無？」
「唔使啦，今晚返阿媽度食。」我說
「原來係咁，唔怪得之你無晒心機啦！流主，其實你應該體諒下你父母，佢地唔係唔想比你去外國讀書，係嗰陣佢地真係比唔到咁多錢出嚟．．．而且佢地宜家都話比錢你去架。」Apple說
「廿幾歲人仲出去讀呀？唔好玩啦．．．而且．．．佢地不嬲都睇唔起我架啦。」我有點晦氣
「佢地唔係睇唔起你，係講個事實比你知。你以為遊戲製作真係好好做咩？」Apple說
我有點激動起來：「都唔係錢嘅問題．．．而且，好多外國公司都請香港人架啦！」
「你係無錯，所以你父母咪搵左好多課程比你喺香港讀囉，但係你又唔肯。」Apple說
「香港讀嗰啲有鬼用咩．．．算啦，我一早已經放棄左夢想，遊戲製作？喺人地眼中咪又係掛住打機！」我說完便收拾文件離開了
Apple十分無奈：「流主．．．唉．．．」
我們離開公司，伊語在後樓梯變回原形。因為老家就在公司附近，所以我們不用迫港鐵，可以慢慢步行過去。
「主人．．．」伊語捉住我的衣袖說
「得啦．．．我心情唔好，妳就比我靜下啦。」家裡的事、月卡的事，使我的心情變得很差。
怎麼就是沒有人能夠明白我？我想從事遊戲製作，是因為我想創造很多很多完美快樂的幻想世界，讓大家可以放下現實的一切壓力，好好享受和體驗幻想生活。就是因為現實世界太過現實，有誰真的打從心底活得快樂？沒有了幻想的空間，生命就變得像機器般每天重複著相同的事，面對不會停止的壓力，這是人生嗎？
我母親開門迎接我們：「哎呀！阿主返嚟啦！入嚟啦入嚟啦．．．咦？依位係？」
「阿媽．．．佢係我朋友，叫伊語。」我說
「阿媽妳好。」天真的伊語竟然誤以為阿媽是我母親的名字．．．
我慌忙解釋：「喂喂喂．．．阿媽唔是名嚟架．．．妳要叫伯母．．．」
「吓．．．啊．．．我唔知要叫伯母所以先跟住叫．．．」伊語尷尬說
「呵呵呵．．．叫阿媽都無所謂啦！有個咁靚女嘅女仔做心抱不知幾好！入嚟入嚟！」母親強行拖著伊語進屋子
我脫下鞋子，步進客廳，母親已經向父親和家姐介紹著伊語了．．．害伊語都害羞得滿臉通紅．．．
「好啦，阿媽妳咁樣嚇親人呀！難得細佬奇蹟破蛋。」家姐笑說
「阿爸．．．家姐．．．」我打招呼
父親看著報紙說：「返嚟啦？．．．坐下先啦，做嘢做成點呀？」
「都係咁啦。」我說
家姐走過來說：「喂阿主，你邊度搵個咁靚嘅女朋友返嚟架？」
「朋友咋．．．上網打機識嘅．．．」我沒有說謊吧
父親插話：「你仲係掛住打機呀？」
我莫名火起：「我有工返又無洗你錢，打機又有咩問題呀？」
「呃．．．開飯開飯！過去飯枱啦！」家姐慌忙說
「．．．好好好．．．過去啦。」父親說著便先走過去
「主人．．．唔好嬲爆爆啦．．．」伊語繞著我的手說
可能因為我和父親都板著面口，大家吃飯都尷尷尬尬的．．．
「嚟嚟嚟，伊語食雞脾！」母親夾了一隻雞腿給伊語，續說：「伊語妳係邊度人嚟架？中文講得咁好但係又唔識用筷子．．．」
家姐接著問：「妳啲頭髮唔似染喎，天生金髮架？對眼又咁大仲要藍色，用邊隻大眼con架？點解耳仔咁尖嘅？」
「呃．．．我．．．天生係咁．．．」伊語不懂如何回答
我不耐煩說：「妳地比伊語食嘢啦．．．」
父親這時問：「阿主，你嚟緊有咩打算？」
「無咩打算，咪返工囉．．．」我說
「你諗住做文員做一世？」父親問
我放下筷子說：「唔係你又想點呀？我初頭有目標有夢想有打算，你又話唔啱，宜家又唔啱呀？」
父親一手拍在枱上說：「又講依樣，你估出去讀書好平呀？嗰陣屋企真係無錢，點供你呀？宜家有啦，叫你去你又唔肯！」
我站起來大聲說：「喂大佬，我出左嚟做嘢幾多年啦？宜家去做留學生？你無嘢下話？」
父親也站起來指罵著我：「你咩態度呀！？唔係你阿媽拜託佢朋友，你不學無術，連工都無得做呀！！」
此時，母親突然大喝：「全部收聲！！坐低！食飯！」
我和父親都立即坐下來．．．伊語卻被嚇得有點不知所措．．．
母親續說：「好好地一家人食飯你兩仔爺就餐餐都要嗌交！平時我都唔出聲架啦，你地睇下宜家搞到人地伊語幾唔好意思？」
「阿媽．．．我．．．我無嘢呀．．．」伊語十分慌張
家姐對伊語說：「得架啦伊語，阿媽出得聲即係無事架啦。」
「阿主，我地一向都支持你，但係你都要明白我地做父母唔係你諗得咁容易！阿明你都係呀，阿仔有比心機好好地返工搵錢，佢宜家自己照顧到自己，你咪比啲空間佢囉！」母親對我和父親說教
「得啦得啦．．．唔問啦，食飯啦。」父親說
「阿仔你都唔好再嬲啦！」母親說
伊語擔憂說：「係囉，主人．．．唔好嬲阿爸啦．．．」
「好啦好啦．．．唔嬲啦，食飯啦。」我說
我們都坐下來繼續吃飯，這時家姐一臉奇怪對伊語說：「伊語．．．」
「係？」伊語回應
「流主係你主人？」家姐問
我們都頓時被嚇得嗆住．．．家姐問起了，我才意識到伊語剛才一直都叫我做主人．．．我何時開始已經習慣了她這樣叫我的．．．
天真的伊語笑著說：「係呀！」
「仔．．．我睇少左你．．．」父親萬分驚訝
結果，這一晚的氣氛其實都不太差。當然，他們都以為伊語在開玩笑．．．不過有伊語在，我的確舒服一點。