女神從Online Game走出來了: 08 期限
「今晚要介紹朋友比我識？」變小了的伊語坐在我的桌子上說
「係呀，佢都係玩《奢華online》嘅，所以信得過。」我說
「好嘢！」伊語對於認識新朋友感到很高興，我在遊戲中也一樣呢，不過現實中卻相反
就在我正準備放工之時，Apple突然走過來！
Apple邊走邊說：「流主，唔好走住．．．」
「死．．．匿喺堆文件後面先！！」我放下伊語，她也立即跑到文件後面
「流主，啲單入好未呀？我要睇下啲單．．．」Apple說著竟然伸手想把文件拿走！
「咪住！」我立即一手按住文件
如果Apple把文件搬開，就會看到伊語了！一定要阻止她！
「點解咪住？」Apple皺眉問道
「因為．．．」我把腦袋裡爛藉口創造器的功能全開：「我未入好啲單！」我說
「咁仲好，我就係見到好似有錯所以先要睇。」Apple再想把文件拿開
我再按住文件：「咪住！」
「．．．又點呢？」Apple開始不耐煩
「其實．．．我頭先講大話，啲單已經入好晒．．．」我說
「咁就更加要快啲搵返張錯嘅出黎。」Apple說著又再次拿起文件
「咪住！」我依然死不放棄
「．．．你係咪玩嘢呀流主。」Apple瞪眼怒視著我
「唔係唔係．．．」我立即迫出一個服務業大師的專業級笑容說：「搵嘢依啲粗重嘢，緊係我做啦．．．你放心交比我，我搞唔掂會交返比妳！」
Apple想了一下，便放開手說：「．．．都好，咁你OT啦。」
「無問題！」我鬆了一口氣
豈料，這時Apple竟然乘我鬆懈了的一刻把文件拿起！！
「OT到你咁開心，肯定有古惑！就等我拆穿你嘅西洋鏡！」Apple竟然有此一著
然而，文件後面卻甚麼都沒有！為甚麼？．．．啊！我知道了！伊語用閃空術傳送到別的地方了吧！聰明！
「流主．．．依個係．．．」Apple指著我桌子的另一邊．．．伊語就站在那裡！！
「呃．．．」怎麼辦！！
「依個公仔．．．」Apple一臉猜疑
「公仔．．．係囉，咪就係公仔囉！Apple姐妳都知我毒架啦．．．鍾意玩依啲公仔呀嘛．．．我又怕比人睇到會笑我．．．」我冒著冷汗說
但是Apple依然狠狠盯著伊語．．．
「算啦，唔好掛住玩公仔唔做嘢呀。仲有你咁大個人就唔好玩依啲嘢啦，無女仔鍾意架。」Apple說著便拿著文件走了
幸好沒事．．．每天都被這樣重擊，早晚會受不住猝死．．．
晚上又再約了阿立吃飯，因為不用OT的關係，這次不用求撚奇車我了。我和伊語決定乘港鐵去，這也是伊語第一次乘搭港鐵。雖然伊語十分期待，但是我卻有點後悔．．．因為放工時間．．．港鐵站的人多得恐怖．．．
「哇！好多人呀！」伊語也嚇了一跳
「唔好走失呀，拖實我啦．．．」雖然已經跟伊語相處了一星期，但我還是感到不好意思
「知道主人！」伊語乖乖拖著我
不知怎的我感到十分緊張！我拖住了伊語！外人看過來我們不就像情侶一般嗎？想不到原來拖著女朋友會是這麼爽的！可是啊，現在的我同時卻又非常緊張，會不會太大力弄痛伊語呢？她有甚麼感覺呢？．．．啊！那邊的毒男看著我們了，他絕對是在妒忌我！哇哈哈哈！
伊語突然說：「主人．．．你係咪好熱呀？你隻手好多汗呀．．．一係我幫你拎住件褸啦？」
「呃．．．唔係．．．」我尷尬說
良久等候，我們終於上到車了，而且一如預期，十分多人，二十分擠迫！
「好迫呀！」伊語興奮地埋怨著．．．這是甚麼樣的情緒？
此時，我才發現伊語身後清一色全都是男人！！不知道是我自己敏感還是甚麼，我就是覺得他們絕對會對伊語出手！於是我慢慢把伊語轉向車門旁邊的玻璃屏．．．
「嘻．．．」伊語突然傻笑了
「做咩傻笑？」我問
伊語笑著說：「因為主人喺度保護緊我囉！我感覺到！」
「唔．．．我講過要保護妳架嘛．．．」說著，我自己也臉紅起來，不敢正視伊語
旁邊的人聽到都竊笑了，特別是附近數個中年女性．．．笑甚麼笑．．．保護女神是兵應該做的！
此時列車又再進站，沒有多少人下車，卻有很多人上車！他們迫啊迫，我們都被擠得不能動彈．．．現在我幾乎是抱著伊語的狀態了．．．她無懈可擊的身材，我完全可以用身體去感受得到．．．加上伊語天生便有一種難以言喻的花香味．．．
伊語突然說：「咦？有嘢頂．．．」「SHHHHHHHHHHHHHH．．．好快落車．．．」我當然知道她想說甚麼！！幸好我反應快！不然這卡車數十人的仇恨度我可坦不住啊．．．
經過理性與欲望的掙扎，幾經「艱苦」我們終於來到約定的餐廳了．．．幸好伊語天然呆．．．不知道剛才發生了甚麼事．．．
「喂！流主！」阿立果然又早到了．．．咦，他身邊有一個女性啊．．．難道是他的女朋友？
「喂！」我回應他，從他的表情看得出他也對我有女伴感到一點驚訝
阿立說：「坐底叫嘢食先！今日咁準時嘅？」
我坐下來回答：「係呀，好彩今日唔駛OT．．．」
「喂等我嚟介紹先，依個係我女朋友華女；依個係我打online game嘅朋友流主。」阿立介紹著
「喂Hello，我都介紹，依個係．．．伊語；依個係阿立。」我也介紹說
「佢係你女朋友？」阿立說著，但是他很明顯發現了伊語不是人類
「佢係我主人。」伊語突然笑著說，華女嚇得把水都噴出來了
我立即搶著說：「唔係唔係．．．主人係我花名啫，我地係朋友。」氣氛多尷尬啊伊語．．．天然呆殺傷力真的很大呢．．．
我們甚麼也聊著，直到伊語突然說想去廁所．．．我原本想著帶伊語去的，怎料阿立卻叫華女陪她去．．．阿立果然有察覺到甚麼了．．．
阿立欲言又止：「喂流主．．．伊語佢．．．」
「嗯．．．你無估錯．．．」我說
「果然．．．一睇個樣就認得出啦，嗰陣成日同你打副本．．．名又一樣，樣又一樣．．．但係點解．．．」阿立大感不惑
「我都唔知點解．．．嗰晚同你食完飯佢就突然間喺我屋企出現．．．佢自己都唔知咩事．．．而且，佢真係用得出魔法．．．」我說
「嗰晚有無發生左啲咩事呀？」阿立問
「無喎．．．最特別係嗰張搵笨嘅月卡，都充唔到值．．．」我無奈說
「你又係呀？我又係呀．．．仲搞到我個角色唔見左．．．」阿立抱怨說
「唔見左？咪住！！我知啦！我又係充值完之後入game，伊語就唔見左．．．之後佢就喺我張床度出現．．．點解我會宜家先諗到架！」我恍然大悟
「原來咁樣．．．．．．唔係喎，咁我個角色去左邊呀？我又唔覺佢有嚟到現實世界，但係遊戲入面又真係唔見左喎．．．」阿立不解
「你唔見左邊個呀？」我問
「韋迪亞囉，人類男性狂戰士嚟嘅。」阿立說
「唔．．．唔通女性角色先出到嚟？」我思考著
「唔會咁老土掛？依個唔係甜故嚟喎．．．仲有，你睇下．．．張月卡我仲袋住．．．」阿立拿出月卡續說：「佢寫住三月十四日．．．」
我有不好的預感：「唔係啦，去返間舖度睇下啦。」
剛好伊語她們回來了，我們便結帳然後走到那天那家店的位置．．．．．．然而．．．那家店竟然憑空消失了，現場只剩下一片空地！
「點會咁架．．．」阿立愣怔說
「咩事呀？」華女好奇問
我們都沒有回答．．．
那晚我們都帶著疑問回家，伊語也明顯察覺到有事情出現了．．．但就算她再三追問，我依然不肯告訴她．．．因為我怕我猜對了．．．我怕．．．三月十四日是一個期限．．．是伊語留在這裡的期限．．．