女神從Online Game走出來了: 03 買衣服
經過昨天的流血事件，你說我見識少也好，道德撚也好，我決定要帶伊語去買衣服。幸好作為宅男的我，除了屋租水電煤伙食和online game，幾乎沒有其他使費，所以儲了些許流動資金，應該夠買些生活衣服。
伊語穿著我的衣服，明顯有點不太喜歡。但是在我的角度看來卻別有一番風味．．．大件得把橡筋短褲都遮掩的衛衣，使比我矮些少的她看起來更加嬌小．．．配合那對過大的紅黑色人字拖．．．不但沒有減低束起了頭髮的她的魅力，反而使她變得更加可愛．．．而且．．．而且．．．她是真空上陣的！嗚呀！！
一切準備好，我們先走到附近的茶餐廳吃早餐。由家門到茶餐廳只有十分鐘路程，但意想不到竟然比逃離喪屍追捕更加吃力！先不說伊語的《十萬個「是」甚麼》，途人的怪異目光、兇狠眼神也讓我精神緊繃．．．絕不排除當中有些人可能是毒撚！雖然看著他們也有點心涼和自豪．．．
「依個就係沙嗲牛肉麵啦？」伊語興奮地看著我替她點的早餐
「係呀，好食過我煮架。」我說
「食完之後我地去邊呀？」伊語一邊吃一邊問
「唔．．．．．．買．．．底褲．．．」我小聲說
「買底褲？」伊語無知地放聲說
「噗！！」我嚇得把麵也噴出來！餐廳的人也都用詭異的眼神看著我．．．
「哎呀．．．無事呀嘛！係咪嗆親呀．．．咁唔小心嘅．．．」伊語拿起紙巾替我抹咀．．．附近的眼神邊得更詭異了．．．
辛苦地吃完早餐，我們走到附近商場的內衣店。我小心翼翼地步進店舖．．．你說我見識少也好，道德撚也好，這是我二十多年人生第一次走進內衣店，我連正視店內的貨品也都不太夠膽．．．
「歡迎光臨！」店員熱情招呼
「哇！好多好靚呀！」伊語雙眼發光說
「唔．．．是但揀幾套啦．．．」我才是這個世界的人啊，怕甚麼．．．真沒用！
「又係你要我買．．．又唔幫我揀．．．」伊語有點抱怨說．．．我已經不敢看店員的眼神了．．．
「或者我幫小姐揀啦，小姐妳戴開咩cup嘅bra架？」店員帶著專業的笑容問道．．．這也使我沒這麼尷尬。
「cup？bra？唔知喎．．．」伊語聽不明白，側著頭說
「咁妳宜家戴緊嘅呢？」店員問
「我無戴咩bra呀。」天真的伊語如此說．．．那店員的表情明顯有點驚訝
「咁．．．唔緊要呀，外國人有啲都鍾意唔戴bra嘅。或者我幫妳度下，妳跟我入嚟更衣室啦。」店員處變不驚，看來我真的要多多學習
伊語跟店員走到更衣室，我只有在店面等候．．．我以為總算可以鬆口氣．．．但原來現在才更加難堪．．．有數個師奶用一個「該燴囉」的眼神看著獨個兒站在內衣店的我，而且還在竊竊私語．．．危急關頭，聰明的我立即拿起手提電話裝作若無其事地通電話。
鈴～鈴～鈴～
聰明反被聰明誤！電話偏偏在這個時候響起！Fuck That Shit！
「邊個仆街呀．．．」我接了電話不耐煩地說
「Apple。」對方說
「呃．．．妳好呀Apple姐．．．咩貴幹．．．」怎麼又是這樣
「你仆我街呀？」Apple說
「緊係唔係啦！我．．．我訂左本書．．．以為係書商打嚟．．．咪問係咪Book Guy囉．．．」我一定是傻了
「．．．算啦，聽你把聲好似無咩嘢，咁就放心啦。星期一記得拎醫生紙返嚟。」Apple說
「知道知道！無問題！」我說著便把電話掛掉
「主人！好唔好睇呀！」只穿著內衣的伊語絲毫不感尷尬地走出來！那個店員也用一種看著變態的眼神看著我．．．
而且．．．
主甚麼人！大庭廣眾！成何體統！我真的要暈了．．．我閉上眼也可以看到那些師奶是用甚麼眼神看著我．．．
「是但啦．．．妳點著都好睇架啦．．．」我快要死了，牧師呢？牧師！補血啊！
「咁．．．有無啲加精神力同魔法強度．．．」伊語詢問店員
「得得得！！！要依套依套嗰套同著住依套！！」我絕對已經短命了
幾經波折，終於買完內衣，比打副本做主坦的壓力還要大．．．剛才的仇恨度總值已經大得我應付不了．．．
「你做咩好似好攰咁嘅？」伊語的心情卻好像很好
「唉．．．妳唔會明．．．」我都沒氣了
「頭先個店員幫我度身嗰陣呢，見我無著底褲，點解好似好驚訝咁嘅？」伊語不解問道
「唔怪得佢頭先用咁嘅眼神望住我．．．妳都係唔明架啦．．．」我體會到被爆擊的感覺了
「咁之後去邊呀？」伊語高興地問
「買啲去街衫呀．．．鞋呀．．．襪呀嗰啲囉．．．」我無力氣回答
「好呀好呀！一定好開心！」伊語拍著手說
我們在商場逛了一整天，雖然很累人，但其實也滿快樂的。這是我第一次跟女孩子約會，也是第一次跟精靈約會。看著她快樂地試穿衣服，還有看著那些羨慕我的目光，我也開心起來了。
「我地仲有無嘢要買呀？」伊語問
我點算著手上十多袋衣服說：「唔．．．應該都齊架啦。」
「咁主人呢？你淨係買比我，你自己呢？」伊語看著我問
「我？我唔使啦，毒撚著咩都係毒撚。」我說
「咩嘢係毒撚呀？」伊語好奇問
「唔．．．總之好似我咁就係毒撚囉．．．唔好問啦，去食嘢啦。」我也懶得解釋
然後我們走到附近吃港式排餐，我替伊語點了鐵板肉眼排，她一定會喜歡的。
「哇！依個就係肉眼排啦？好大塊呀！」伊語十分興奮
就在侍應倒汁的時候，伊語被滾熱的醬汁彈到了！
「呀！」伊語嚇了一跳，右手一捏，竟然用魔法把整個鐵板瞬間變成冰塊！！我和侍應都嚇得呆住了．．．
「．．．．．．哇！你地啲鐵板搞咩呀！？仲唔換左佢？望望望！信唔信我投訴你呀！」我立即隨機應變。那侍應慌忙道歉並把冰塊拿走．．．
「．．．對唔住．．．一下嚇親．．．自然反應就．．．」伊語低下頭伸出舌頭道歉
唉．．．算了．．．